YS Jagan: స్కిల్ స్కామ్ సూత్రధారి చంద్రబాబే.. ములాఖత్‌లో మిలాఖత్ చేసుకున్నారు.. సీఎం జగన్ సంచలన వ్యాఖ్యలు..

YS Jagan on Chandrababu Arrest: స్కిల్ డవలప్‌మెంట్ స్కామ్ కేసులో చంద్రబాబు నాయుడు అరెస్టు నాటినుంచి ఏపీ రాజకీయాలు మరింత హీటెక్కాయి. కావాలనే మాజీ సీఎం, టీడీపీ అధినేత చంద్రబాబు నాయుడును అరెస్టు చేశారంటూ టీడీపీ, జనసేన సహ ప్రతిపక్ష పార్టీలు అధికారపార్టీ వైసీపీపై ఫైర్ అవుతున్నాయి. స్కిల్ స్కామ్ కేసులో చంద్రబాబు అరెస్టయి ఆరు రోజులు గడుస్తోంది. ఇప్పటివరకు చంద్రబాబు అరెస్టుపై మాట్లాడని సీఎం జగన్ మోహన్ రెడ్డి తాజాగా స్పందించారు. అవినీతి కేసులో ఆధారాలతో చంద్రబాబు అరెస్టయ్యారంటూ పేర్కొన్నారు. చంద్రబాబు తప్పు చేసి అడ్డంగా దొరికిపోయారని.. అలాంటి వ్యక్తికి కొందరు కాపాడేందుకు ప్రయ్నతిస్తున్నారంటూ ఫైర్ అయ్యారు. చంద్రబాబు ఎన్నో మోసాలకు పాల్పడ్డారని.. ఇన్నాళ్లు చంద్రబాబును పలుకుబడి కలిగిన ముఠా కాపాడింది అంటూ సీఎం జగన్ పేర్కొన్నారు. చట్టం ఎవరికైనా సమానమేనని.. చంద్రబాబును కాపాడేందుకు కొందరు ప్రయత్నిస్తున్నారంటూ ఆగ్రహం వ్యక్తంచేశారు. సాక్ష్యాలు, ఆధారాలు చూసి కోర్టు రిమాండ్ కు పంపించిందని.. అవినీతి కేసులో చంద్రబాబు అరెస్టయ్యారంటూ గుర్తుచేశారు. స్కిల్ స్కామ్ పాత్రధారి, సూత్రధారి చంద్రబాబేనని.. దర్యాప్తులో ఐటీ అధికారులు పీఏ నుంచి కీలక సమాచారం రాబట్టారని పేర్కొన్నారు. కోర్టులో పది గంటల పాటు వాదనలు జరిగాయని.. బాబుకు ఇన్‌కమ్ ట్యాక్స్ అధికారులు సరైన ఆధారాలతో నోటీసులు ఇచ్చారంటూ పేర్కొన్నారు.

చంద్రబాబు అరెస్టయినా.. ప్రశ్నిస్తానన్న వ్యక్తి ప్రశ్నించడంటూ జనసేన అధినేత పవన్ కల్యాణ్ పై పరోక్షంగా విమర్శలు గుప్పించారు సీఎం జగన్.. అవినీతి పరుడికే మద్దతిస్తున్నారంటూ ఫైర్ అయ్యారు. ఎంత దోపిడీ చేసినా, ఎన్ని వెన్నుపోట్లు పొడిచినా చంద్రబాబును రక్షించుకునేందుకు కొందరు ప్రయత్నించినా.. చట్టం ఎవరికైనా ఒక్కటేనని వైఎస్ జగన్ స్పష్టంచేశారు. గతంలో జరిగిన తెలంగాణ MLC ఎన్నికల్లో నల్లధనం ఇస్తూ చంద్రబాబు అడ్డంగా దొరికిపోయారన్నారు సీఎం జగన్. ఆ ఆడియో టేపులో ఉన్న వాయిస్‌ చంద్రబాబుదే అని ఫోరెన్సిక్‌ సర్టిఫికేట్‌ ఇచ్చినా.. కొందరు బాబు చేసింది నేరమే కాదని వాదించేందుకు సిద్ధమయ్యారన్నారు. గజదొంగను కాపాడేందుకు దొంగల ముఠా ప్రయత్నిస్తోందని.. అవినీతిపై ఆధారాలు కనిపిస్తున్నా బుకాయిస్తారన్నారు. ప్రశ్నిస్తా, ప్రశ్నిస్తానన్న దత్తపుత్రుడు ప్రశ్నించడు అంటూ జగన్ విమర్శించారు.

శనివారం తూర్పుగోదావరి జిల్లా నిడదవోలులో వైఎస్సార్‌ కాపు నేస్తం నిధులు విడుదల చేసిన ముఖ్యమంత్రి వైఎస్‌ జగన్‌ మోహన్ రెడ్డి.. ఈ సందర్భంగా జరిగిన సభలో ప్రసంగించారు.

మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..