AP News: స‌చివాల‌యాల్లోనే ఓపెన్ టెన్త్, ఇంట‌ర్ అడ్మిష‌న్లు.. ఇకపై ఫ్రీ ఆన్‌లైన్ క్లాసెస్ కూడా

అమరావతి, ఆగస్టు 28: చ‌దువుకోవాల‌ని ఆశ ఉన్నా.. వివిధ కారణాల వల్ల బ‌డి ఈడు దాటిపోయిన వారికోసం ఆంధ్ర‌ప్ర‌దేశ్ సార్వ‌త్రిక విద్యాపీఠం ద్వారా ఓపెన్ టెన్త్, ఇంట‌ర్‌కు అవ‌కాశం క‌ల్పిస్తుంది. 14 ఏళ్లు దాటిన వారు నేరుగా అడ్మిష‌న్లు తీసుకుని టెన్త్ లేదా ఇంట‌ర్ ప‌రీక్ష‌ల‌కు హాజ‌రుకావ‌చ్చు. వివిధ కార‌ణాల‌తో బ‌డికి వెళ్ల‌లేక‌పోయినా, చ‌దువు మ‌ధ్య‌లో మానేసిన వారికి ఓపెన్ టెన్త్, ఓపెన్ ఇంట‌ర్ మంచి అవ‌కాశంగా అధికారులు చెబుతున్నారు. అయితే ఆయా త‌ర‌గ‌తుల్లో ప్ర‌వేశాల‌కు ఇప్ప‌టివ‌ర‌కూ ఆన్ లైన్‌లో మాత్ర‌మే ద‌ర‌ఖాస్తు చేసుకునే అవ‌కాశం ఉంది.టెన్త్ లేదా ఇంట‌ర్‌కు అప్లై చేసుకుని అడ్మిష‌న్ తీసుకోవ‌ల‌సి ఉంటుంది. ఏడాదికి రెండుసార్లు ప‌రీక్ష‌లు నిర్వ‌హిస్తున్నారు. ఎలాంటి చ‌దువులేని వారు కూడా నేరుగా ప‌దో త‌ర‌గ‌తి అడ్మిష‌న్ తీసుకోవ‌చ్చు. ఇక టెన్త్ పాస‌యిన వారు ఓపెన్ ఇంట‌ర్ అడ్మిష‌న్ తీసుకునే అవ‌కాశం ఉంది. తాజాగా ఓపెన్ టెన్త్, ఓపెన్ ఇంట‌ర్ అడ్మిష‌న్లు తీసుకోనే వారికోసం ఆంధ్రప్ర‌దేశ్ ప్ర‌భుత్వం మ‌రో అవ‌కాశం క‌ల్పించింది. నేరుగా స‌చివాల‌యాల్లోనే రిజిస్ట‌ర్ చేసుకుని అడ్మిష‌న్ తీసుకునే అవ‌కాశం క‌ల్పించింది.

ఓపెన్ టెన్త్, ఓపెన్ ఇంట‌ర్ అడ్మిష‌న్ ఎలా తీసుకోవాలి

ఆంధ్ర‌ప్ర‌దేశ్ సార్వ‌త్రిక విద్యాపీఠం ద్వారా ఓపెన్ టెన్త్, ఓపెన్ ఇంట‌ర్ అడ్మిష‌న్ తీసుకోవ‌ల‌సి ఉంటుంది. దీనికోసం ఓపెన్ స్కూల్ సొసైటీ వెబ్ సైట్ లో ద‌ర‌ఖాస్తు చేసుకోవ‌ల‌సి ఉంటుంది. ఈ విద్యాసంవత్స‌రంలో ఇప్ప‌టికే ప్ర‌వేశాల ప్ర‌క్రియ ప్రారంభం అయింది. ఎలాంటి అద‌న‌పు ఫీజు లేకుండా ద‌ర‌ఖాస్తు చేసుకునేందుకు సెస్టెంబ‌ర్ 15 వ తేదీ వ‌ర‌కూ గ‌డువు ఉంది. అద‌న‌పు రుసుంతో క‌లిపి అక్టోబ‌ర్ 5వ తేదీ వ‌ర‌కూ అడ్మిష‌న్ల కోసం ద‌ర‌ఖాస్తు చేసుకోవ‌చ్చు. అయితే ఇప్ప‌టివ‌ర‌కూ కాస్త కంప్యూట‌ర్ నాలెడ్జి ఉన్న‌వారు మాత్ర‌మే అడ్మిష‌న్ల కోసం నేరుగా ద‌ర‌ఖాస్తు చేసుకునేవారు. మిగిలిన వారు ఇంట‌ర్ నెట్ సెంట‌ర్ కు వెళ్లాల్సి వ‌చ్చేది. అయితే ఈ ఏడాది నుంచి గ్రామ‌, వార్డు స‌చివాల‌యాల్లో కూడా అడ్మిష‌న్లు పొందేలా ఏర్పాట్లు చేసారు. దీనికోసం గ్రామ, వార్డు స‌చివాల‌యాల శాఖ‌తో ఆంధ్ర‌ప్ర‌దేశ్ సార్వ‌త్రిక పీఠం ఒప్పందం చేసుకుంది. సార్వ‌త్రిక పీఠం ద్వారా ప‌దో త‌ర‌గ‌తి,టెన్త్ అడ్మిష‌న్లు తీసుకోవాల‌నుకునే వారు ద‌గ్గ‌ర్లోని గ్రామ లేదా వార్డు స‌చివాల‌యానికి వెళ్లి ద‌ర‌ఖాస్తు చేసుకోవ‌చ్చ‌ని అధికారులు తెలిపారు.

ఓపెన్ టెన్త్, ఇంట‌ర్ ప‌రీక్ష‌ల కోసం మొద‌టిసారి ఆన్ లైన్‌లో ఫ్రీ కోచింగ్

ప‌దో త‌ర‌గ‌తి, ఇంట‌ర్ అడ్మిష‌న్ల‌ కోసం ద‌ర‌ఖాస్తు చేసుకున్న త‌ర్వాత ఆన్ లైన్ లోనే వాటిని ప‌రిశీలించి అర్హులైన వారికి అడ్మిష‌న్లు ఇస్తారు. ఇలా అడ్మిష‌న్లు పొందిన వారికోసం ఈ ఏడాది ఓపెన్ స్కూల్ సొసైటీ అఫీషియ‌ల్ వెబ్ సైట్ లో ఆన్ లైన్ పాఠాల బోధ‌న వీడియోల‌ను ఉంచ‌నున్న‌ట్లు సార్వ‌త్రిక పీఠం అధికారులు తెలిపారు. ఈ పాఠాల‌ను నేర్చుకోవ‌డం ద్వారా ప‌రీక్ష‌ల‌కు హాజ‌రుకావ‌డం సులువుగా ఉంటుంద‌ని అధికారులు చెబుతున్నారు.

మరిన్ని ఆంధ్రప్రదేశ్ వార్తల కోసం క్లిక్ చేయండి..