తనను తాను సూపర్‌మ్యాన్‌లా భావిస్తున్న ట్రంప్‌

తనకు తాను ప్రొజెక్ట్‌ చేసుకోవడంలో అమెరికా అధ్యక్షుడు డొనాల్డ్‌ ట్రంప్‌ అగ్రగణ్యులు.. కరోనా నుంచి కోలుకున్న తర్వాత తానో శక్తిమమ్యాన్‌లా, సూపర్‌మ్యాన్‌లా ఫీలవుతున్నారు.. ఫీలవుతే అయ్యారు కానీ అది బయటకు చెప్పుకుంటున్నారు.. కరోనా వైరస్‌ చికిత్స తీసుకున్న తర్వాత తనకి తానే ఓ సూపర్‌మ్యాన్‌లా అనిపిస్తున్నానని, ఆ చికిత్సతో రోగ నిరోధక శక్తి పెరిగి తనలో శక్తి బాగా వచ్చేసిందని ట్రంప్‌ చెప్పుకొచ్చారు. పెన్సిల్వేనియా ఎన్నికల సభలో తన మద్దతుదారులతో మాట్లాడుతూ చాలా గొప్పలు చెప్పుకున్నారు.. కరోనా తగ్గడానికి తనకు ఇచ్చిన మందులు అద్భుతంగా పని చేశాయని, అందుకు వైద్యులకు ధన్యవాదాలు తెలుపుకుంటున్నానని చెప్పారు. యాంటీ బాడీస్‌ చికిత్స కోసం ఏ మందులు ఇచ్చారో తెలియదు కానీ అవి తీసుకున్నాక మాత్రం ఆరోగ్యం బాగా మెరుగయ్యిందని ట్రంప్‌ సెలవిచ్చారు. ప్రపంచంలోనే అత్యుత్తమ డాక్టర్లు వాల్టర్‌ రీడ్‌ హాస్పిటల్‌లో ఉన్నారని చెప్పారు. తాను కూడా వైట్‌హౌస్‌లో ఓ గదిలో కూర్చోవచ్చు కానీ తాను అలా చేయలేనని అన్నారు. ఈ దేశానికి అధ్యక్షుడిని కాబట్టి ప్రజలను కలుసుకోవలసిన బాధ్యత తనమీద ఉందని తెలిపారు. క్షణం తీరిక లేకుండా ట్రంప్‌ ఎన్నికల ప్రచారంలో పాల్గొంటున్నారు.. కారణం సర్వేలు జో బైడెన్‌ ఆధిక్యంలో ఉన్నారని చెప్పడమే! రాబోయే ఎన్నికల్లో ఇండో అమెరికన్లు డెమొక్రాటిక్‌ అభ్యర్థి జో బైడెన్‌కే మద్దతు తెలపబోతున్నారని తాజా సర్వే తెలిపింది. 72 శాతం మంది ఇండో అమెరికన్లు బైడెన్‌కే ఓటు వేస్తామని చెప్పారట! ట్రంప్‌కు 22 శాతం మంది మాత్రమే మద్దతు ఇస్తున్నారట! డెమొక్రాటిక్‌ నుంచి ఉపాధ్యక్ష పదవికి పోటీపడుతున్న కమలా హ్యారిస్‌కు జై కొడుతున్నవారు ఎక్కువయ్యారు.