కరోనా రహిత భారత్ కోసం.. ఆ డేట్ దాకా ఆగాల్సిందే.!

యావత్ ప్రపంచాన్ని అతలాకుతలం చేస్తున్న కరోనా వైరస్ మహమ్మారి అంతమయ్యది ఎప్పుడు.? ఇదే ఇప్పుడు మానవజాతి ముందున్న ఏకైక ప్రశ్న. దీనికి ‘సింగపూర్ యూనివర్సిటీ అఫ్ టెక్నాలజీ అండ్ డిజైన్(ఎస్‌యూటీడీ) పరిశోధకులు సమాధానం ఇస్తున్నారు. ఒక్క భారతదేశమే కాకుండా మొత్తం ప్రపంచానికి కరోనా రక్కసి పీడ ఎప్పుడు వదులుతుందన్న అంశంపై వీరు పలు ఆసక్తికరమైన విషయాలను వెల్లడించారు. ఈ వర్సిటీ పరిశోధకుల అంచనా ప్రకారం జూలై 25న భారత్ కరోనా ఫ్రీ కంట్రీగా.. అలాగే డిసెంబర్ 8 నాటికి ప్రపంచానికి కరోనా నుంచి విముక్తి దక్కుతుందని వారు చెబుతున్నారు.

రోజూవారి కేసుల నమోదు, మరణాలు, కోలుకుంటున్నవారి సంఖ్య, వైరస్ వ్యాప్తి రేటు, లాక్ డౌన్ ఆంక్షలు, ఇతర పరిస్థితులను పరిగణనలోకి తీసుకుని ఆయా దేశాల్లో వైరస్ ఎప్పుడు అంతమవుతుందన్న దానిపై వారు అంచనాలను రూపొందించారు. వర్సిటీ నివేదిక ప్రకారం మే 21 నాటికి 97 శాతం, అలాగే మే 31కి 99 శాతం భారత్‌లో కరోనా కేసులు తగ్గుముఖం పడతాయని.. ఇక జూలై 25 నాటికి భారత్ కరోనాను పూర్తిగా నిర్మూలిస్తుందని పేర్కొంది. ఈ అధ్యయనాన్ని అటుంచితే.. మే నెలాఖరు దాకా కేంద్రం లాక్ డౌన్‌ను పొడిగించే అవకాశాలు లేకపోలేదు. మరోవైపు ప్రపంచవ్యాప్తంగా కరోనా వైరస్ ఎప్పుడు అంతమవుతుందన్న దానిపై కూడా సింగపూర్ వర్సిటీ తన నివేదికను వెల్లడించింది. ఈ రిపోర్ట్ ప్రకారం అగ్రరాజ్యం అమెరికా కరోనా నుంచి ఆగష్టు 26న విముక్తి పొందుతుందని.. డిసెంబర్ 8 నాటికి ప్రపంచం నుంచి కరోనా కనుమరుగైపోనుందని వెల్లడించింది. ప్రపంచవ్యాప్తంగా మే 29 నాటికి 97 శాతం కేసులు, అలాగే జూన్ 16 నాటికి 99 శాతం కేసులు తగ్గుతాయని పేర్కొంది.

Read Also: 

అలెర్ట్: మే నెలలో బ్యాంక్ సెలవులు ఇవే.. ఎప్పుడెప్పుడంటే..

కరోనా వేళ బయటపడ్డ పాకిస్తాన్ భారీ కుట్ర.. ‘ఆరోగ్య సేతు’ యాప్‌తో..