నీళ్లతో నడిచే రైలు.. భారత రైల్వే ప్రారంభం

నీటి నుంచి ఇంధనాన్ని తయారు చేసుకుంటుంది హైడ్రోజన్ రైలు. ఇందు కోసం జింద్‌లో ఒక ప్రత్యేక ప్లాంట్‌ను నిర్మించారు. 9 లీటర్ల నీటిని విద్యుత్ విశ్లేషణ చేయడం ద్వారా 900 గ్రాముల హైడ్రోజన్‌ను తయారు చేస్తారు. ఈ 900 గ్రాముల హైడ్రోజన్.. రైలును 1 కిలోమీటర్ దూరం నడిపించేందుకు సరిపోతుంది. ఈ రైలు పొగకు బదులుగా నీటి ఆవిరి, వేడిని మాత్రమే విడుదల చేస్తుంది. దీని వల్ల పర్యావరణానికి ఎలాంటి హాని ఉండదు. ఈ హైడ్రోజన్ రైలు.. డీజిల్ ఇంజిన్ల లాగా భారీ శబ్దాలు చేయకుండా.. మెట్రో రైలు లాగా చాలా నిశ్శబ్దంగా ప్రయాణిస్తుంది. చెన్నైలోని ఇంటెగ్రల్ కోచ్ ఫ్యాక్టరీ లో పూర్తి స్వదేశీ టెక్నాలజీతో తయారు చేశారు. ఈ హైడ్రోజన్ రైలులో మొత్తం 10 కోచ్‌లు ఉంటాయి. అందులో 2 డ్రైవింగ్ పవర్ కార్లు, 8 ప్యాసింజర్ కోచ్‌లు ఉంటాయి. ఈ హైడ్రోజన్ రైలు ఒకేసారి 2,600 మంది ప్రయాణికులను మోసుకెళ్లగలదు. మెట్రో రైళ్ల తరహాలో ఆటోమేటిక్ డోర్లు, ఏసీ, ఎల్‌ఈడీ లైటింగ్ వంటివి ఉంటాయి. ఈ రైలు టికెట్ ధర సాధారణ ప్యాసింజర్ రైళ్ల మాదిరిగానే 5 నుంచి 25 రూపాయల మధ్య ఉండే అవకాశం ఉందని రైల్వే వర్గాల ద్వారా తెలుస్తోంది.