Gujarat: బాలుడిపై కోతుల గుంపు దాడి.. చివరకు ఏం జరిగిందంటే.? గుజరాత్‌లో ఘటన..

మొన్నటివరకు వీధి శునకాలు జనాలపై దాడులు చేసి, తీవ్ర భయాందోళనకు గురి చేశాయి. ఇప్పుడు కోతుల వంతు వచ్చింది. తాజాగా గుజరాత్‌లో ఓ పదేళ్ల బాలుడిపై దాడిచేసి దారుణంగా హతమార్చాయి కోతులు. గాంధీనగర్లోని సల్కి గ్రామంలో ఈ ఘటన చోటుచేసుకుంది. దేగామ్‌ తాలూకాలోని ఓ గుడికి సమీపంలో బాలుడిపై కోతులు దాడి చేసినట్లు ఫారెస్ట్‌ అధికారులు తెలిపారు. అధికారులు తెలిపిన వివరాలు ప్రకారం.. దీపక్‌ ఠాకూర్‌ అనే బాలుడు స్నేహితులతో కలిసి ఆడుకుంటుండగా కోతుల గుంపు ఒకటి అక్కడికి వచ్చింది. పిల్లలంతా భయంతో పారిపోయారు. పదేళ్ల బాలుడు దీపక్‌ మాత్రం కోతులకు దొరికిపోయాడు. కోతులన్నీ కలిసి బాలుడిపై దూకాయి. అతడిపై దాడి చేస్తూ గోళ్లతో బాలుడి పొట్టను చీల్చి ఏకంగా పేగులను బయటకు లాగేశాయి. స్థానికులు కోతులను బెదిరించి బాలుడిని ఆస్పత్రికి తరలించారు. కానీ ఫలితం లేకపోయింది. అప్పటికే దీపక్‌ చనిపోయినట్లు వైద్యులు నిర్ధారించారు. సల్కి గ్రామంలో వారం వ్యవధిలోనే కోతులదాడికి సంబంధించి ఇది మూడో ఘటన అని ఫారెస్ట్ అధికారులు తెలిపారు. మిగతా రెండు ఘటనల్లో బాధితులను కాపాడినట్లు తెలిపారు. కోతులను బంధించేందుకు చర్యలు తీసుకుంటున్నట్టు తెలిపారు.