Brazil Election: బ్రెజిల్ ఎన్నికల్లో ట్రెండ్.. లూలాను గెలిపించిన వాట్సాప్ సైన్యం!
Brazil Election 2026: బ్రెజిల్ అధ్యక్ష ఎన్నికల్లో వాట్సాప్ ఛానల్ లూలా విజయంలో కీలక పాత్ర పోషించింది. ‘లూలా ఆర్మీ’ పేరున్న ఛానల్‌కు దాదాపు 1.1 కోట్ల మంది సభ్యులుగా చేరారు. ఓటర్లను చైతన్యపరచడం, మద్దతుదారులను ఏకతాటిపైకి తీసుకురావడం ఈ ప్రచారంలో ప్రధానంగా నిలిచాయి. అసలు ఈ వాట్సాప్ ఛానల్ ఎలా పనిచేసింది? ఎన్నికల ప్రచారాన్ని ఎలా ప్రభావితం చేసింది?
Updated on: Oct 28, 2026 | 8:20 AM
బ్రెజిల్ అధ్యక్ష ఎన్నికలు రాజకీయంగా తీవ్ర ఉత్కంఠను రేకెత్తించాయి. హోరాహోరీగా సాగిన పోరులో ప్రస్తుత అధ్యక్షుడు లూలా డా సిల్వా విజయం సాధించారు. నాలుగోసారి అధ్యక్ష బాధ్యతలు చేపట్టనున్నారు. ఎన్నికల ఫలితాలపై ప్రత్యర్థి బోల్సొనారో, అమెరికా అధ్యక్షుడు డొనాల్డ్ ట్రంప్ అనుమానాలు వ్యక్తం చేశారు. ఎన్నికల్లో లూలాకు 6.4 కోట్లకు పైగా ఓట్లు రాగా, బోల్సొనారోకు దాదాపు 6 కోట్ల ఓట్లు వచ్చాయి. ఇద్దరి మధ్య 44 లక్షల ఓట్ల తేడా ఉంది. లూలా విజయానికి రాజకీయ ప్రచారంతో పాటు ‘లూలా ఆర్మీ’ పేరుతో వాట్సాప్ ఛానల్ దోహదపడింది.
1.1 కోట్ల మందికి చేరిన ‘లూలా ఆర్మీ’
బ్రెజిల్‌కు చెందిన పార్లమెంటు సభ్యుడు ఆండ్రే జానోనెస్ ‘లూలా ఆర్మీ’ పేరుతో ప్రారంభించిన ఛానల్‌కు దాదాపు 1.1 కోట్ల మంది చేరారు. లూలాకు మద్దతుగా ప్రచారం చేయడం, సోషల్ మీడియాలో సందేశాలను విస్తృతంగా పంచుకోవడం, ఓటర్లను చైతన్యపరచడంపై ఈ ఛానల్ దృష్టి పెట్టింది. మొదటి విడత ఎన్నికల్లో ఓటు వేయని వారిని, ఇతర అభ్యర్థులకు మద్దతిచ్చిన వారిని తమవైపు తిప్పుకునేందుకు ప్రచారం ఉపయోగపడింది.
మొదటి విడత ఫలితాలతో మారిన ప్రచార వ్యూహం
మొదటి విడత ఎన్నికల తర్వాత లూలా ప్రచార బృందం తమ వ్యూహాన్ని మార్చుకుంది. మొదటి విడత ప్రచారం ఆశించిన స్థాయిలో సాగలేదు. దీంతో రెండో విడతలో మరింత చురుగ్గా వ్యవహరించాల్సిన అవసరం ఏర్పడింది. ప్రత్యర్థి పక్షం అనుసరిస్తున్న దూకుడు రాజకీయ ప్రచార శైలిని లూలా మద్దతుదారులు అనుసరించారు. నిరంతరం సందేశాలను పంపడం, సోషల్ మీడియాలో చురుగ్గా ప్రచారం చేయడం, మద్దతుదారులను కార్యాచరణలో భాగస్వాములను చేయడంతో వారి వ్యూహం ఫలించింది.
రెండో విడతలో అదనంగా 1.41 కోట్ల మంది ఓటింగ్
లూలా విజయానికి మరో ముఖ్య కారణం రెండో విడత ఎన్నికల్లో పెరిగిన ఓటర్ల భాగస్వామ్యం. మొదటి విడతలో ఓటు వేయని వారు, గతంలో ఇతర అభ్యర్థులకు ఓటు వేసిన వారిలో చాలా మంది రెండో విడతలో తమ నిర్ణయాన్ని మార్చుకున్నారు. రెండో విడతలో అదనంగా 1.41 కోట్ల మంది ఓటింగ్‌లో పాల్గొన్నారు. వీరిలో దాదాపు 75 శాతం మంది లూలాకు ఓటు వేసి ఉంటారని విశ్లేషకులు అంచనా వేస్తున్నారు. ఈ ఓట్లు లూలా విజయానికి సహాయపడ్డాయి.
మెటాపై ఒత్తిడి
వాట్సాప్‌తో పాటు ఇన్‌స్టాగ్రామ్, ఫేస్‌బుక్ పాత్ర కూడా ఈ ఎన్నికల్లో చర్చనీయాంశమైంది. మెటా అల్గారిథమ్‌లు బోల్సొనారోకు అనుకూలంగా పనిచేసాయనీ లూలా మద్దతుదారుల ఆరోపించారు. వారు కోర్టుకు వెళ్లడంతో అక్టోబర్ 15న బ్రెజిల్ న్యాయస్థానం మెటాకు కీలక ఆదేశాలు జారీ చేసింది. ఇద్దరు అభ్యర్థుల విషయంలో సమానంగా వ్యవహరించాలని సూచించింది. అనంతరం ఈ ఆదేశాలను అమలు చేసినట్లు మెటా తెలిపింది.
ఫలితాలపై ట్రంప్ అనుమానాలు
బ్రెజిల్ ఎన్నికల ఫలితాలపై అమెరికా అధ్యక్షుడు డొనాల్డ్ ట్రంప్ ఓట్ల లెక్కింపు తీరుపై ప్రశ్నలు లేవనెత్తుతూ, ఎన్నికలు నిస్సందేహంగా, పారదర్శకంగా ఉండాలని వ్యాఖ్యానించారు. ఈ ఎన్నికలు సక్రమంగా జరగలేదని, రిగ్గింగ్ తో ఫలితాలు తారుమారైన ఎన్నికలా అనిపించిందని అన్నారు.
ఫలితాన్ని రద్దు చేయాలన్న బోల్సొనారో
లూలా విజయాన్ని సవాలు చేస్తూ ప్రత్యర్థి ఫ్లావియో బోల్సొనారో ముందుకు వచ్చినా ఎన్నిక ఫలితాన్ని రద్దు చేయించడం అంత సులభం కాదని విశ్లేషకులు అంటున్నారు. లూలాకు వచ్చిన 44 లక్షల ఓట్ల ఆధిక్యాన్ని ప్రభావితం చేసే స్థాయిలో అక్రమాలు జరిగాయని నిరూపించాల్సి ఉంటుంది. అలాగే బ్రెజిల్‌లోని ఎనిమిది మంది సభ్యుల ఎన్నికల న్యాయస్థానం ఆమోదం కూడా అవసరం. కాగా, ఎన్నికల ప్రచారంలో లక్షలాది మందికి ఒకేసారి సందేశాలను చేరవేయడం, మద్దతుదారులను సమన్వయం చేయడం, ఓటర్లను ప్రచారంలో భాగస్వాములను చేయడం వంటి అంశాల్లో డిజిటల్ వేదికలు కీలకంగా మారాయి.‘లూలా ఆర్మీ’ ప్రచారం బ్రెజిల్ ఎన్నికల్లో డిజిటల్ రాజకీయ ప్రచారం ఎంతటి ప్రభావాన్ని చూపగలదో నిదర్శనగా నిలిచింది.
