‘ఒక కాలు అయిపోయింది.. మరి రెండో కాలు?’.. చిన్నపిల్లవాడిలా మసాజ్ కోసం మారాం చేస్తున్న ముద్దుల ఏనుగు!

సోషల్ మీడియా ప్రపంచంలో ప్రతిరోజూ వేలాది వీడియోలు వస్తుంటాయి. కానీ, కొన్ని వీడియోలు మాత్రం చూసిన వెంటనే మన మనసుకు హత్తుకుని, పెదవులపై చిరునవ్వులు పూయిస్తాయి. అలాంటి ఒక అద్భుతమైన వీడియోనే ప్రస్తుతం ఇంటర్నెట్‌లో విపరీతంగా వైరల్ అవుతోంది. తమిళనాడులోని కుంభకోణంలో ఉన్న ప్రసిద్ధ ‘అరుల్మిగు ఆది కుంభేశ్వరర్’ ఆలయానికి చెందిన ఒక గజరాజు తన అమాయకత్వంతో రాత్రికి రాత్రే ఇంటర్నెట్ సంచలనంగా మారింది.

ఆ ఆలయంలో ఉండే ‘మంగళం’ అనే ఏనుగుకు సంబంధించిన వీడియోనే ఇప్పుడు నెటిజన్లను ఫిదా చేస్తోంది. వైరల్ అవుతున్న ఈ క్లిప్‌లో, మంగళం ఆలయ ప్రాంగణంలో తన మావటి పక్కన ఎంతో ఒద్దికగా నిలబడి ఉంది. నుదుటిపై సాంప్రదాయ తిలకం, మెడలో అందమైన గంటల దండ ధరించి, చూడముచ్చటగా కనిపిస్తోంది. ఇంతలో, మావటి దాని కాళ్లకు ఉపశమనం కలిగించేందుకు ఒక కాలికి మర్దన (మసాజ్) చేయడం మొదలుపెట్టాడు. మంగళం కూడా ఆ మర్దనను ఎంతో సుఖంగా, కళ్లు మూసుకుని ఆస్వాదించడం వీడియోలో కనిపించింది.

అయితే, అసలు ట్విస్ట్ ఇక్కడే మొదలైంది. ఒక కాలికి మసాజ్ పూర్తి కాగానే, ఆ ఏనుగు ఒక వీఐపీ తరహాలో రాజసం ఉట్టిపడేలా తన రెండో కాలిని మావటి వైపు ముందుకు చాచింది. “ఆ కాలు అయిపోయింది కదా.. మరి ఈ కాలికి కూడా మసాజ్ చెయ్” అని ఒక చిన్నపిల్లవాడిలా అది సైగ చేసిన తీరు చూస్తే ఎవరికైనా ముచ్చటేయక మానదు. ఆ ఏనుగు బాడీ లాంగ్వేజ్, అమాయకత్వం చూస్తుంటే జంతువులకు కూడా మానవ భావోద్వేగాలు ఎంతగా ఉంటాయో అర్థమవుతుంది.

ఈ సరదా వీడియోను ‘@lifewshroots’ అనే ఇన్‌స్టాగ్రామ్ పేజీలో “పెద్ద శరీరం, కానీ చిన్నపిల్ల మనసు” అనే క్యాప్షన్‌తో షేర్ చేశారు. ఈ వీడియో నెటిజన్ల మనసులను ఎంతగా గెలుచుకుందంటే, ఇప్పటివరకు దీనిని 15 లక్షలకు పైగా వీక్షించగా, 2 లక్షల 12 వేల మందికి పైగా లైక్ చేశారు. ఈ వీడియో చూసిన నెటిజన్లు కామెంట్ల వర్షం కురిపిస్తున్నారు. “ప్రకృతిలో ఏనుగులు అత్యంత తెలివైన, సున్నితమైన జంతువులు” అని ఒకరు కామెంట్ చేయగా, “ఈ ముద్దుల ఏనుగు అమాయకత్వం నా రోజంతా సంతోషంగా గడిచేలా చేసింది” అని మరొకరు రాసుకొచ్చారు. ఏదేమైనా మంగళం చేసిన ఈ క్యూట్ మసాజ్ స్టంట్ ఇప్పుడు సోషల్ మీడియాను షేక్ చేస్తోంది.

వీడియో ఇక్కడ చూడండి..

View this post on Instagram

A post shared by shru 🧚🏽‍♀️🌞🌱🐞 (@lifewshroots)

మరిన్ని ట్రెండింగ్ వార్తల కోసం ఇక్కడ క్లిక్ చేయండి..