వార్నీ ఇదెక్కడి వింత.. భూమిలోంచి ఉబికివస్తున్న వేడి నీరు.. ఈ ఊర్లో ఎక్కడ చూసినా ఇదే సీన్!

సాధారణంగా వేడి నీళ్లు కావాలంటే, మంటపై వేడి చేయడమో, లేదా హీటర్‌ పెట్టడమో, లేదా గీజర్‌ వాడడమో చేయాలి. కానీ ఇక్కడో గ్రామంలో మాత్రం.. ఎవరికీ గీజర్లు వాడాల్సిన అవసరం లేదట.. ఎందుకంటే ఆ గ్రామంలో ఏ ట్యాప్ తిప్పినా.. బోర్‌ ఆన్ చేసినా అందులోంచి వచ్చేవన్నీ వేడి నీళ్లేనట. అవును, భద్రాద్రి కొత్తగూడెం జిల్లా మణుగూరు మండలం పగిడేరు గ్రామంలో ఈ వింతను మీరు చూడొచ్చు. ప్రస్తుతం ఈ గ్రామంలో దాదాపు మూడు చోట్ల ఇలా భూమిలోంచి వేడి నీరు ఉబుకుతోందట.

అంతేకాదు ఈ గ్రామంలో వర్షాకాలం, లేదా చలికాలం వచ్చిందంటే.. ఊర్లోని కాలువల్లోని వేడి నీటి నుంచి వచ్చే ఆవిరి.. గ్రామం మొత్తాన్ని కమ్మేస్తుందట. ఈ గ్రామస్తులు కూడా ఆ వేడి నీటినే స్నానాలు చేసేందుకు, ఇతర అవసరాలకు వినియోగిస్తున్నారట. అయితే ఈ గ్రామంలో భూమిలోంచి వేడి నీరు ఎందుకు వస్తున్నాయనేది చూస్తే.. ఆ ప్రాంతంలో భూమి లోపల ఎక్కువగా బొగ్గు గనులు ఉన్నాయట. ఆ గనుల నుంచి వచ్చే వేడి కారణంగా ఆ చుట్టుపక్కల ప్రాంతాల్లో భూమి నుంచి వేడి నీరు వస్తున్నాయని స్థానికులు చెబుతున్న మాట.

అయితే ఇది కొన్ని రోజులు ఉండే తంతు కాదు.. ఈ పరిసర ప్రాంతాల్లో ఏడాది పొడవునా ఇలానే వేడి నీళ్లు వస్తాయట.. వాతావరణం కూడా అదే తరహాలో కనిపిస్తుందట. తాజాగా గురువారం వర్షం పడి ఆగిపోయిన తర్వాత స్థానికంగా ఉన్న ఓ పంపు నుంచి వేడి నీరు రావడంతో ఓ మహిళ వాటిని తీసుకెళ్తున్న దృశ్యాలు ఇప్పుడు సోషల్ మీడియాలో వైరల్‌గా మారాయి.

మరిన్ని తెలంగాణ వార్తల కోసం ఇక్కడ క్లిక్ చేయండి.