మీ ఇంటిలో గులాబీలు గుత్తులు గుత్తులుగా పూయాలంటే..? ఇది ఒక్కటి వేస్తే వద్దన్నా పూస్తాయ్..

గులాబీ అంటే ఇష్టపడని వారుండరు. కానీ కుండీలో గులాబీ మొక్కను పెంచడం ఒక ఆర్ట్. చాలామంది నర్సరీ నుంచి తెచ్చినప్పుడు బాగున్న మొక్క, ఇంట్లో పెట్టిన కొద్ది రోజులకే పూలు పూయడం ఆగిపోతుందని బాధపడుతుంటారు. గులాబీ మొక్క ఆరోగ్యంగా పెరిగి, కొమ్మ కొమ్మకు పూలు పూయాలంటే కొన్ని ప్రాథమిక సూత్రాలు పాటించాలి. మొదటగా, మొక్కను ఎంచుకునేటప్పుడు పూల కంటే ఎక్కువ కొమ్మలు ఉన్న మొక్కను ఎంచుకోండి. మట్టిని సిద్ధం చేసేటప్పుడు ఎర్రమట్టిలో ఇసుక, కంకరతో పాటు ‘కోకో పీట్’ తప్పనిసరిగా కలపాలి. ఇది వేర్లకు గాలి తగిలేలా చేసి మొక్క బలంగా పెరగడానికి సహాయపడుతుంది. అలాగే గులాబీ మొక్కకు రోజుకు కనీసం 6 నుంచి 7 గంటల ఎండ అవసరం. ఎండ తక్కువైతే ఆకులు పెరుగుతాయి కానీ పూలు పూయవు.

మొక్కకు కత్తిరింపు చాలా ముఖ్యం. పువ్వు ఎండిపోయిన తర్వాత దానిని అలాగే ఉంచకుండా, రెండు మూడు ఆకుల కిందకు కట్ చేయాలి. అప్పుడే అక్కడ కొత్త చిగురు వస్తుంది. నీటి విషయంలో కూడా జాగ్రత్త వహించాలి. ఎండాకాలంలో రెండు పూటలా నీరు పోయాలి, కానీ మిగతా సమయాల్లో మట్టి తేమను బట్టి పోయడం మంచిది.

గులాబీలకు మనం ఇచ్చే ఎరువులు కూడా చాలా కీలకం. ఇంట్లో ఉండే మజ్జిగ, బెల్లం, ఆవు పేడ కలిపిన మిశ్రమం మొక్కలకు అద్భుతమైన టానిక్‌లా పనిచేస్తుంది. అలాగే కిచెన్‌లో వచ్చే ఉల్లిపాయ పొట్టు, అరటి తొక్కలు, టీ వేస్ట్ వంటివి మట్టిలో పాతిపెడితే మొక్కలకు మంచి పోషకాలు అందుతాయి. తెగుళ్లు నివారించడానికి వారానికి ఒకసారి వేప నూనెను స్ప్రే చేయడం మర్చిపోవద్దు. నర్సరీలో దొరికే ఎప్సమ్ సాల్ట్, రోజ్ మిక్స్ వంటివి కూడా వారానికి ఒకసారి వాడితే మీ తోట గులాబీ వనంలా మారుతుంది.