Hyderabad: రేపు హైదరాబాద్‌లో ట్రాఫిక్‌ ఆంక్షలు.. ఈ రూట్లలో వాహనాల రాకపోకలు బంద్‌!

బక్రీద్‌ సందర్భంగా గురువారం (జూన్‌ 29న) నగరంలోని పలు ప్రాంతాల్లో పోలీసులు ట్రాఫిక్‌ ఆంక్షలు విధించారు. ముస్లిం సోదరులు ప్రత్యేక ప్రార్థనలు చేయనున్న నేపథ్యంలో హైదరాబాద్‌లోని పాత నగరంలోని పలు ప్రాంతాల్లో ట్రాఫిక్‌ ఆంక్షలు..

Traffic Restrictions

Srilakshmi C |
Updated on: Jun 28, 2023 | 9:15 AM

హైదరాబాద్‌: బక్రీద్‌ సందర్భంగా గురువారం (జూన్‌ 29న) నగరంలోని పలు ప్రాంతాల్లో పోలీసులు ట్రాఫిక్‌ ఆంక్షలు విధించారు. ముస్లిం సోదరులు ప్రత్యేక ప్రార్థనలు చేయనున్న నేపథ్యంలో హైదరాబాద్‌లోని పాత నగరంలోని పలు ప్రాంతాల్లో ట్రాఫిక్‌ ఆంక్షలు విధించారు. గురువారం ఉదయం 8 నుంచి 11.30 గంటల వరకు మీరాలం ట్యాంక్‌ ఈద్గా ప్రాంతంలో ట్రాఫిక్‌ ఆంక్షల కారణంగా ఆ రూట్లలో వచ్చే వాహనాలను రూట్లకు మళ్లిస్తారు. ప్రార్థనలు నిర్వహించే ఆయా సమయాల్లో ప్రత్యామ్నాయ మార్గాల్లో వెళ్లాలని సూచించారు.

ఏయే రూట్లలో ట్రాఫిక్‌ ఆంక్షలు ఉంటాయంటే..

బహదూర్‌పురా ఎక్స్‌ రోడ్డు మీదుగా ఉదయం 8 నుంచి 11.30 గంటల మధ్య పురానాపూల్‌, కామాటిపురా, కిషన్‌బాగ్‌ వైపు నుంచి ఈద్గాకు ప్రార్థనల కోసం వచ్చే వారిని అనుమతిస్తారు.
జూ పార్కు, మసీద్‌ అల్హా హో అక్బర్‌ ఎదురుగా వాహనాలను పార్కు చేయవల్సి ఉంటుంది. దీంతో ఈద్గా రోడ్డు వైపు వాహనాలకు అనుమతి ఉండదు.
ఆ రూట్లలోని ట్రాఫిక్‌ను బహదూర్‌పురా ఎక్స్‌ రోడ్డు వద్ద కిషన్‌బాగ్‌, కామాటిపూరా, పురానాపూల్‌ వైపు మళ్లిస్తారు.
శివరాంపల్లి, ధనమ్మ హట్స్‌ వైపు నుంచి ప్రార్థనల కోసం వచ్చే అన్ని వాహనాలను ఉదయం 8 నుంచి 11.30 గంటల వరకు ధనమ్మ హట్స్‌ రోడ్డు నుంచి అనుమతిస్తారు. ఈ రూట్లలోని ట్రాఫిక్‌కు ఈద్గా వైపు అనుమతిలేదు. ధనమ్మ హట్స్‌ క్రాస్‌రోడ్స్‌ నుంచి శాస్త్రిపురం, ఎన్‌ఎస్‌కుంట రూట్లలో ఆ వాహనాలను మళ్లిస్తారు.
పురానాపూల్‌ నుంచి బహదూర్‌పురా వైపు వెళ్లే ఆర్టీసీ బస్సులు, ఇతర వాహనాలను ఉదయం 8 నుంచి 11.30 గంటల వరకు పురానాపూల్‌ దర్వాజ వద్ద జియాగూడ, సిటీ కాలేజీ వైపు మళ్లిస్తారు.
ఈ సమయాల్లో శంషాబాద్‌, రాజేంద్రనగర్‌ వైపు నుంచి బహదూర్‌పురా వైపు వచ్చే వాహనాలను అరాంఘర్‌ జంక్షన్‌ నుంచి మళ్లిస్తారు.
కాలాపత్తర్‌ నుంచి ఈద్గాకు వచ్చే వాహనాలను కాలాపత్తర్‌ ఠాణా, మోచీ కాలనీ, బహదూర్‌పురా వైపు మళ్లిస్తారు.

మరిన్ని తెలంగాణ వార్తల కోసం క్లిక్‌ చేయండి.