భైంసా ఎఫెక్ట్.. ఎమ్మెల్యే రాజాసింగ్ హౌస్ అరెస్ట్..

హైదరాబాద్ గోషామహాల్ బీజేపీ ఎమ్మెల్యే రాజాసింగ్‌ను హౌస్ అరెస్ట్ చేశారు పోలీసులు. ఛలో భైంసాకు పిలుపునిచ్చిన నేపథ్యంలో ఆయన్ను పోలీసులు బయటకు రాకుండా అడ్డుకుంటున్నారు. ఆదివారం రాత్రి నిర్మల్ జిల్లా భైంసాలో ఇరు వర్గాల మధ్య ఘర్షణ తలెత్తిన విషయం తెలిసిందే. ఆందోళనకారులు పలు వాహనాలకు, ఇళ్లకు నిప్పు పెట్టారు. ఈ క్రమంలో నిరసనకారులను అదుపుచేసే క్రమంలో పలువురు పోలీసు అధికారులు కూడా గాయాలపాలయ్యారు. పరిస్థితులు అదుపులోకి వచ్చాయనుకున్న సమయంలో.. సోమవారం మధ్యాహ్నం మళ్లీ వదంతులు వ్యాపించడంతో.. మళ్లీ పలుచోట్ల ఘర్షణలు చోటుచేసుకున్నాయి. దీంతో పట్టణంలో ఇంటర్నెట్ సేవలను నిలిపివేసి.. మూడు రోజులపాటు కర్ఫ్యూ విధించారు. ఘటనకు సంబంధించి 25మందిని అదుపులోకి తీసున్నట్లు పోలీసులు వెల్లడించారు. కర్ఫ్యూ సమయంలో పోలీసుల ఆదేశాలు ధిక్కరించి.. ఎవరు బయట తిరిగినా అరెస్టు చేస్తామని హెచ్చరించారు. ఈ క్రమంలో రాజాసింగ్ ఛలో భైంసాకు పిలుపునివ్వడంతో.. శాంతి భద్రతలకు విఘాతం కల్గుతుందన్న అభిప్రాయంతో ఆయన్ను హౌస్ అరెస్ట్ చేశారు.