నగరం నిద్రపోవద్దా? పోలీసుల తనిఖీలు సరే.. మరి వీటికి అనుమతులెక్కడవి?

Hyderabad Police Inspections Late Night

హైదరాబాద్‌లో రాత్రివేళ పోలీసులు విస్తృతంగా తనిఖీలు చేపడుతున్నారు. అనుమానాస్పదంగా తిరిగే వ్యక్తులు, వాహనాలను చెక్ చేస్తూ నేరాల నియంత్రణపై ప్రత్యేకంగా దృష్టి పెడుతున్నారు. పోలీసుల ఈ చర్యలను నగరవాసులు స్వాగతిస్తున్నారు. అయితే ఇదే సమయంలో రాత్రివేళ వ్యాపారాల నిర్వహణపై కొందరు నగరవాసులు అధికారుల ముందు పలు ప్రశ్నలు పెడుతున్నారు.

ఫంక్షన్ హాల్ పేరుతో హోటల్..?

నగరంలోని కొన్ని ప్రాంతాల్లో ఫంక్షన్ హాళ్లకు అనుబంధంగా లేదా వాటి ప్రాంగణాల్లో రాత్రి ఆలస్యంగా ఆహార విక్రయాలు జరుగుతున్నాయనే ఆరోపణలు వినిపిస్తున్నాయి. అవి ఏ అనుమతులతో కొనసాగుతున్నాయి? వాటికి వర్తించే పని వేళలు ఏమిటి? నిబంధనల ప్రకారమే నిర్వహిస్తున్నారా? అనే విషయాలపై సంబంధిత శాఖలు తనిఖీలు చేయాలని ప్రజలు కోరుతున్నారు.

అర్ధరాత్రి దాటినా ఇడ్లీ.. దోశ.. వడ!

మరోవైపు నగరవ్యాప్తంగా కొన్ని ప్రాంతాల్లో అర్ధరాత్రి దాటిన తర్వాత కూడా ఇడ్లీ, దోశ, వడ బండ్లు, టిఫిన్ సెంటర్లు కొనసాగుతున్నాయి. కొన్ని బిర్యానీ, పాయా హోటళ్ల దగ్గర తెల్లవారుజాము వరకు జనసంచారం కనిపిస్తోందని స్థానికులు చెబుతున్నారు. రాత్రంతా వ్యాపారం చేయడానికి వీరికి అనుమతి ఉందా? ఉంటే ఏ శాఖ అనుమతి ఇచ్చింది? నిర్ణీత సమయాలను పాటిస్తున్నారా?” అనే ప్రశ్నలు ఇప్పుడు తెరపైకి వస్తున్నాయి.

పాన్ డబ్బాల దగ్గర కూడా..

కొన్ని ప్రాంతాల్లో పాన్ డబ్బాలు, టీ స్టాళ్లు కూడా అర్ధరాత్రి తర్వాత కొనసాగుతుండటంతో రోడ్లపై జనసంచారం తగ్గడం లేదని స్థానికులు అంటున్నారు. వ్యాపారాలు నిబంధనల ప్రకారం కొనసాగితే తమకు అభ్యంతరం లేదని, అయితే అనుమతులు లేకుండా లేదా నిర్ణీత సమయాలను దాటి నడిచే వాటిపై అధికారులు దృష్టి పెట్టాలని కోరుతున్నారు.

ఓవైపు పోలీసుల తనిఖీలు.. మరోవైపు రాత్రంతా జనసంచారం

రాత్రివేళ పోలీసులు వాహనాలను ఆపి తనిఖీలు చేస్తున్నారు. అనుమానాస్పద వ్యక్తుల కదలికలను పరిశీలిస్తున్నారు. నేరాల నియంత్రణ కోసం పోలీసులు రాత్రంతా రోడ్లపై విధులు నిర్వహిస్తున్న సమయంలో, మరోవైపు తెల్లవారుజాము వరకు వ్యాపార కేంద్రాల వద్ద జనసంచారం కొనసాగితే పోలీసులపై అదనపు భారం పడుతుందనే అభిప్రాయం కూడా వ్యక్తమవుతోంది. అందుకే రాత్రివేళ వ్యాపారాలపై ఒక స్పష్టమైన విధానం ఉండాలని నగరవాసులు కోరుతున్నారు. ఏ వ్యాపారం ఎంత సమయం వరకు కొనసాగవచ్చు? ఎవరికి ప్రత్యేక అనుమతులు ఉన్నాయి? అనుమతులు లేని వ్యాపారాల పరిస్థితి ఏమిటి? అనే అంశాలపై సంబంధిత అధికారులు స్పష్టత ఇవ్వాలని అంటున్నారు.

అయ్యా.. నగరాన్ని ప్రశాంతంగా నిద్రపోనివ్వండి

పోలీసుల తనిఖీలను స్వాగతిస్తున్నాం. అదే సమయంలో నిబంధనలకు విరుద్ధంగా అర్ధరాత్రి తర్వాత నడిచే వ్యాపారాలపైనా తనిఖీలు చేయండి. అనుమతులు ఉన్నవాటిని కొనసాగించండి.. లేనివాటిపై నిబంధనల ప్రకారం చర్యలు తీసుకోండి. రాత్రివేళ నగరాన్ని ప్రశాంతంగా నిద్రపోనివ్వండి” అని పలువురు నగరవాసులు అధికారులను కోరుతున్నారు. వ్యాపారాలు జరగాలి.. ప్రజలకు ఉపాధి ఉండాలి.. అదే సమయంలో స్థానికులకు ఇబ్బందులు లేకుండా, శాంతిభద్రతలకు సమస్య తలెత్తకుండా నిబంధనలు కూడా అమలు కావాలి. రాత్రి నగరంలో పోలీసుల తనిఖీలతో పాటు వ్యాపార సమయాల అమలుపైనా అధికారులు దృష్టి పెడతారా? అన్నది ఇప్పుడు నగరవాసుల ప్రశ్న.