వణుకు పుట్టించే దృశ్యాలు.. మినీ వ్యాన్ బీభత్సం.. సెకన్ల వ్యవధిలో యువకుడు దుర్మరణం!
భాగ్యనగరంలో అతివేగం మరో నిండు ప్రాణాన్ని బలిగొంది. ముషీరాబాద్ పోలీస్ స్టేషన్ పరిధిలో జరిగిన ఒక భీకర రోడ్డు ప్రమాదం స్థానికంగా తీవ్ర కలకలం రేపింది. అతివేగంతో దూసుకొచ్చిన ఒక మినీ డీసీఎం వాహనం, మెకానిక్ షాపులో పని చేసుకుంటున్న యువకుడిని ఢీకొట్టింది. ఈ ఘటనలో యువకుడు అక్కడికక్కడే మరణించాడు.
భాగ్యనగరంలో అతివేగం మరో నిండు ప్రాణాన్ని బలిగొంది. ముషీరాబాద్ పోలీస్ స్టేషన్ పరిధిలో జరిగిన ఒక భీకర రోడ్డు ప్రమాదం స్థానికంగా తీవ్ర కలకలం రేపింది. అతివేగంతో దూసుకొచ్చిన ఒక మినీ డీసీఎం వాహనం, మెకానిక్ షాపులో పని చేసుకుంటున్న యువకుడిని ఢీకొట్టింది. ఈ ఘటనలో యువకుడు అక్కడికక్కడే మరణించాడు. ఈ హృదయవిదారక ఘటనకు సంబంధించిన దృశ్యాలు సిసిటివి కెమెరాలో రికార్డ్ అయ్యాయి.
22 ఏళ్ల మహ్మద్ లతీఫ్ అహ్మద్ అనే యువకుడు ముషీరాబాద్లోని ఒక మెకానిక్ షాపులో మెకానిక్గా పనిచేస్తూ కుటుంబాన్ని పోషించుకుంటున్నాడు. ఎప్పటిలాగే తన పనిలో నిమగ్నమై ఉండగా, అదుపుతప్పిన ఒక మినీ డీసీఎం వాహనం మృత్యువులా దూసుకొచ్చింది. అత్యంత వేగంగా వచ్చిన ఆ వాహనం మొదట షాపు గేటును బలంగా ఢీకొట్టి, ఆ తర్వాత లోపల ఉన్న లతీఫ్పై నుంచి దూసుకెళ్లింది. ప్రమాదం జరిగిన వెంటనే స్థానికులు లతీఫ్ను ఆసుపత్రికి తరలించే ప్రయత్నం చేసినప్పటికీ, తీవ్ర గాయాలవడంతో చికిత్స అందకముందే అతను ప్రాణాలు కోల్పోయాడు. ప్రమాద తీవ్రతకు మెకానిక్ షాపు ముందు భాగం పూర్తిగా ధ్వంసమైంది.
సమాచారం అందుకున్న ముషీరాబాద్ పోలీసులు ఘటనా స్థలానికి చేరుకుని విచారణ చేపట్టారు. ఈ ఘటనపై ముషీరాబాద్ ఎస్హెచ్ఓ మాట్లాడుతూ.. “అతివేగం, డ్రైవర్ అశ్రద్ధే ఈ ప్రమాదానికి ప్రధాన కారణమని ప్రాథమికంగా నిర్ధారించాము” అని తెలిపారు. నిందితుడైన డ్రైవర్పై IPC సెక్షన్ 304A కింద కేసు నమోదు చేశారు. ప్రస్తుతం డ్రైవర్ పరారీలో ఉన్నాడు, సీసీటీవీ ఫుటేజ్ ఆధారంగా వాహనాన్ని గుర్తించి నిందితుడిని త్వరలోనే అరెస్ట్ చేస్తామని ఇన్స్పెక్టర్ తెలిపారు.
చేతికి వచ్చిన కొడుకు అకాల మరణంతో లతీఫ్ కుటుంబం కన్నీరుమున్నీరవుతోంది. పోస్టుమార్టం నిమిత్తం మృతదేహాన్ని గాంధీ ఆసుపత్రికి తరలించారు. కాగా, మహానగరంలో పెరుగుతున్న అతివేగ వాహనాలపై స్థానికులు ఆగ్రహం వ్యక్తం చేస్తున్నారు. కాలనీ రోడ్లపై సైతం డ్రైవర్లు బాధ్యతారాహిత్యంగా వాహనాలు నడుపుతున్నారని, పోలీసుల నిఘా వైఫల్యం వల్లే ఇలాంటి ఘటనలు పునరావృతమవుతున్నాయని వారు ఆవేదన వ్యక్తం చేస్తున్నారు. హైదరాబాద్ వంటి రద్దీ నగరాల్లో ట్రాఫిక్ నిబంధనలు కఠినంగా అమలు చేయాలని, ముఖ్యంగా భారీ వాహనాల వేగంపై నియంత్రణ ఉండాలని సామాజిక కార్యకర్తలు కోరుతున్నారు. ఒకరి నిర్లక్ష్యం ఒక నిరుపేద కుటుంబంలో తీరని చీకటిని నింపింది.
మరిన్ని క్రైమ్ వార్తల కోసం ఇక్కడ క్లిక్ చేయండి..