సమ్మక్క-సారక్క జాతర హూండీల లెక్కింపు.. 6 రోజుల్లో రూ.12.64 కోట్ల ఆదాయం

మేడారం, ఫిబ్రవరి 11: సమ్మక్క–సారక్క జాతర 2026 సందర్భంగా భక్తులు సమర్పించిన కానుకల హూండీల లెక్కింపు హనుమకొండలోని TTD కళ్యాణ మండపంలో  కొనసాగుతోంది. దేవాదాయ శాఖ అధికారులు, సేవా సమితి సభ్యుల పర్యవేక్షణలో ఈ ప్రక్రియ ప్రశాంతంగా సాగుతోందని అధికారులు తెలిపారు. జాతరకు సంబంధించి మొత్తం 828 హూండీలు ఏర్పాటు చేయగా, వాటిలో 780 ఇనుప హూండీలు, 45 వస్త్ర హూండీలు, 3 బియ్యం హూండీలు ఉన్నట్లు వెల్లడించారు. ఇప్పటివరకు అన్ని 828 హూండీలను తెరిచి లెక్కించగా మొత్తం రూ.12,64,67,051 కోట్ల ఆదాయం సమకూరినట్లు అధికారులు తెలిపారు.

ఫిబ్రవరి 10న లెక్కించగా రూ.80,81,935 నగదును పర్యవేక్షణాధికారుల సమక్షంలో బ్యాంకు అధికారులకు అప్పగించినట్లు తెలిపారు. బంగారం, వెండి కానుకలను వేర్వేరుగా ఇనుప హూండీలలో భద్రపరిచారు. వాటి విలువ నిర్ధారణ (అప్రైజ్‌మెంట్) ప్రక్రియ కొనసాగుతోంది. నాణేల లెక్కింపు, E-హుండీ లెక్కింపు ఇంకా ప్రారంభం కాలేదని అధికారులు స్పష్టం చేశారు. హూండీల లెక్కింపు ప్రక్రియ పూర్తిగా పారదర్శకంగా, ప్రశాంతంగా కొనసాగుతోందని, అన్ని నిబంధనల మేరకు ఈ ప్రక్రియను పూర్తి చేస్తామని దేవాదాయ శాఖ అధికారులు తెలిపారు.