Telangana News: ఉండేదేమో గుడిసెలో.. కానీ రూ.40 వేలతో సీసీ కెమెరాలు పెట్టించాడు.. ఎందుకంటే?

అసలే పేదరికం.. దీనికి తోడు వృద్ధాప్యం కూడా మీద పడటంతో దిక్కు తోచని స్థితిలో ఒక సూపర్ ఐడియా వాళ్ల జీవితాన్నే మార్చేసింది. పందెం పుంజులకు సెక్యూరిటీగా సీసీ కెమెరాలు ఏర్పాటు చేసిన ఐడియా సోషల్ మీడియాలో వైరల్ అవుతుంది. సంక్రాంతి పండుగ వస్తుందంటే చాలు.. పందెం పుంజులు హడావుడి మొదలవుతుంది. సంక్రాంతి బరిలో కాళ్ళు దువ్వెందుకు పందెం పుంజులు ముందుంటాయి. మరి అలాంటి కోడి పుంజులను జాగ్రత్తగా పెంచుకునే ఒక వృద్ధుడు గుడిసెలో దొంగలు పడ్డారు. వేల రూపాయలు విలువ చేసే పందెం కోళ్లును దొంగలు ఎత్తుకెళ్లారు. కోడి పుంజులను అమ్మితే వచ్చే డబ్బులే ఆ పేద కుటుంబానికి ఆధారం. అలాంటి ఆ కుటుంబానికి హై పవర్ సెక్యూరిటీలుగా సీసీ కెమెరాలు పని చేస్తున్నాయి. అవును మీరు విన్నది నిజమేనండి. ఇంతకు ఇదంతా ఎక్కడ అనేదే కదా..! అయితే మీరు ఈ కథనం చదవాల్సిందే మరి.

ఖమ్మం జిల్లా పెనుబల్లి మండలం బయ్యన్నగూడెం గ్రామానికి చెందిన పామార్తి సత్యం అనే వృద్ధుడు గుడిసెలో నివాసం ఉంటున్నాడు. వయసు మీద పడటంతో బయట పనులకు వెళ్ళలేని పరిస్థితి. దీంతో కుటుంబ పోషణకు ఇంటి వద్దే కోళ్ళు, మేకలు పెంచుకుంటూ ఆర్థికంగా కొంత కుటుంబానికి ఆసరా అవుతుంది. అయితే కొద్ది రోజుల క్రితం పట్ట పగలే గుర్తు తెలియని వ్యక్తులు కొందరు చొరబడి కప్పిన కోళ్లను ఎత్తుకెళ్లారు. ఒకొక్క కోడి పుంజు రూ.25 వేలు నుంచి 50 వేలు, 60 వేలు పైగానే ఉండటంతో చాలా వరకు నష్టపోయినట్లు పామర్తి సత్యం తన గోడు వెళ్ళబుచ్చాడు. అప్పుడే తనకు ఒక మంచి ఆలోచన వచ్చింది. ఎలాగైనా దొంగల బారిన నుంచి తమ పెంపుడు కోళ్ళు, మేకలను కాపాడుకోవాలంటే సీసీ కెమెరాలు ఏర్పాటు చెయ్యాలని నిర్ణయించుకున్నాడు. వచ్చిందే తడువుగా వెంటనే రూ.40 వేలు అప్పు చేసి మరి సీసీ కెమెరాలను కొనుగోలు చేసి ఆ గుడిసెకు అమర్చాడు. అంతే ఆనాటి నుంచి ఏ ఒక్క అజ్ఞాత వ్యక్తి ఆ ఇంటి దరిదాపుల్లోకి రాలేదని, కోళ్ళు, మేకలు కూడా పోవడం లేదని, చాలా సంతోషంగా ఉన్నామని తన ఆనందాన్ని వ్యక్తం చేస్తున్నారు.

మరిన్ని తెలంగాణ వార్తల కోసం ఇక్కడ క్లిక్ చేయండి