ఒక్కసారి ఛార్జ్​ చేస్తే 250 కిలోమీటర్లు​.. VLF Strada ఎలక్ట్రిక్​ స్కూటర్​ ధర ఎన్ని లక్షలంటే

పెట్రోల్ ఖర్చు తగ్గించుకోవాలని ఎలక్ట్రిక్ స్కూటర్ వైపు చూస్తున్నారా? అయితే VLF తీసుకొచ్చిన కొత్త Strada EV గురించి తెలుసుకోవాలి. City, Max అనే రెండు వేరియంట్లలో వచ్చిన ఈ స్కూటర్‌లో గరిష్ఠంగా 4.32kWh బ్యాటరీ సామర్థ్యం, TFT డిస్‌ప్లే, మూడు రైడింగ్ మోడ్‌లు ఉన్నాయి. దీని ధరలు, ఛార్జింగ్ సమయం, ఫీచర్లు ఎలా ఉన్నాయో చూద్దాం.

ఎలక్ట్రిక్ ద్విచక్ర వాహన మార్కెట్లోకి మరో కొత్త స్కూటర్‌ వచ్చేసింది. ఇటాలియన్ బ్రాండ్ VLF భారత మార్కెట్లో Strada పేరుతో కొత్త ఎలక్ట్రిక్ స్కూటర్‌ను విడుదల చేసింది. City, Max అనే రెండు వేరియంట్లలో అందుబాటులోకి వచ్చిన ఈ స్కూటర్‌ ధరలు రూ.1.20 లక్షల నుంచి ప్రారంభమవుతున్నాయి. రిమూవబుల్ బ్యాటరీలు, 85 kmph గరిష్ఠ వేగం, 250 కిలోమీటర్ల వరకు IDC రేంజ్‌ దీని ప్రధాన ఆకర్షణలు. ఈ స్కూటర్‌ ధరలు, ఫీచర్లు, బ్యాటరీ వివరాలపై ఓ లుక్కేద్దాం.

రెండు వేరియంట్లు..

VLF Strada ఎలక్ట్రిక్ స్కూటర్‌ను రెండు వేరియంట్లలో విడుదల చేశారు. City వేరియంట్ ధర రూ.1.20 లక్షలు కాగా, Max వేరియంట్ ధర రూ.1.55 లక్షలుగా ఉంది. City మోడల్‌లో 2.16kWh సామర్థ్యం ఉన్న ఒక రిమూవబుల్ బ్యాటరీని అందించారు. Max వేరియంట్‌లో రెండు బ్యాటరీలు ఉండటంతో మొత్తం సామర్థ్యం 4.32kWhకు చేరుతుంది.

కంపెనీ వెల్లడించిన వివరాల ప్రకారం, City వేరియంట్‌ 130 కిలోమీటర్ల వరకు IDC రేంజ్‌ను అందిస్తుంది. Max వేరియంట్‌లో ఈ పరిధి 250 కిలోమీటర్ల వరకు ఉంటుంది. అయితే, ఇవి IDC పరీక్షా ప్రమాణాల ఆధారంగా పేర్కొన్న గణాంకాలు. వాస్తవ వినియోగంలో రైడింగ్ వేగం, రోడ్డు పరిస్థితులు, ప్రయాణికుల బరువు, వాతావరణం వంటి అంశాల ఆధారంగా రేంజ్ మారవచ్చు.

రెండు వేరియంట్లలోనూ 4.8kW గరిష్ఠ పవర్‌, 34Nm టార్క్‌ అందించే BLDC హబ్ మోటార్‌ను అమర్చారు. ఇందులో Eco, City, Sport అనే మూడు రైడింగ్ మోడ్‌లు ఉన్నాయి. Eco మోడ్‌లో గరిష్ఠ వేగం గంటకు 45 కిలోమీటర్లు కాగా, City మోడ్‌లో 65 కిలోమీటర్లు, Sport మోడ్‌లో 85 కిలోమీటర్ల వరకు ప్రయాణించవచ్చు.

TFT డిస్‌ప్లే..

VLF Stradaలో బ్యాటరీ ఛార్జింగ్‌కు సంబంధించిన వివరాలు కూడా ఆసక్తికరంగా ఉన్నాయి. ఒక బ్యాటరీని 20 శాతం నుంచి 100 శాతం వరకు ఛార్జ్ చేయడానికి సుమారు మూడు గంటలు పడుతుందని సమాచారం. రెండు బ్యాటరీలను ఛార్జ్ చేయడానికి సుమారు ఆరు గంటల సమయం అవసరమవుతుంది. అయితే, ఛార్జర్ పవర్‌కు సంబంధించిన పూర్తి వివరాలు వెల్లడికావాల్సి ఉంది.

డిజైన్‌, హార్డ్‌వేర్ విషయానికి వస్తే ఈ స్కూటర్‌లో 780mm సీట్ హైట్‌, 175mm గ్రౌండ్ క్లియరెన్స్ ఉన్నాయి. ముందు 16 అంగుళాల వీల్‌, వెనుక 14 అంగుళాల వీల్‌ను అందించారు. బ్రేకింగ్ కోసం ముందు 240mm, వెనుక 220mm డిస్క్ బ్రేకులు ఉన్నాయి. ABSకు బదులుగా CBS బ్రేకింగ్ సిస్టమ్‌ను ఉపయోగించారు.

ఫీచర్ల పరంగా 5 అంగుళాల TFT డిస్‌ప్లే, ఆల్ LED లైటింగ్‌, డ్యూయల్ ప్రొజెక్టర్ హెడ్‌ల్యాంప్స్‌, కీలెస్ ఇగ్నిషన్‌, విండ్‌షీల్డ్‌, లగేజ్ ర్యాక్ వంటి సదుపాయాలు ఉన్నాయి. Carbonio Black, Luna White, Titanio Grey, Urbano Silver అనే నాలుగు రంగుల్లో ఈ స్కూటర్‌ను అందిస్తున్నారు.

బుకింగ్‌ల విషయానికి వస్తే City వేరియంట్‌ను రూ.999తో, Max వేరియంట్‌ను రూ.1,999తో బుక్ చేసుకోవచ్చని సమాచారం. మార్కెట్లో TVS iQube, Bajaj Chetak, Ather, Vida వంటి ఎలక్ట్రిక్ స్కూటర్లకు VLF Strada పోటీ ఇవ్వనుంది.