మతిపోగొట్టే డిజైన్​తో కొత్త ఈవీ పేటెంట్‌ తీసుకున్న విన్​ఫాస్ట్.. లుక్‌ చూస్తే కొనాల్సిందే మరి

వియత్నాంకు చెందిన ప్రముఖ ఎలక్ట్రిక్ వాహన తయారీ సంస్థ విన్‌ఫాస్ట్ భారత మార్కెట్‌పై తన పట్టును మరింత బిగిస్తోంది. ఇందులో భాగంగా తాజాగా రసద్ ఎలక్ట్రిక్ మ్యాక్సీ స్కూటర్ డిజైన్‌కు భారత్‌లో పేటెంట్ పొందింది. స్పోర్టీ లుక్స్‌తో రానున్న ఈ సరికొత్త స్కూటర్ విశేషాలు తెలుసుకుందాం.

వియత్నాంకు చెందిన ప్రముఖ ఎలక్ట్రిక్ వాహన తయారీ సంస్థ విన్‌ఫాస్ట్ భారత మార్కెట్‌పై ప్రత్యేక దృష్టి సారించింది. ఇప్పటికే పలు ఎలక్ట్రిక్ టూ వీలర్లకు భారత్‌లో పేటెంట్లు పొందిన ఈ కంపెనీ, తాజాగా ‘రసద్’ (Rasad) అనే ఎలక్ట్రిక్ మ్యాక్సీ స్కూటర్ డిజైన్‌కు కూడా పేటెంట్ దాఖలు చేసింది. దీంతో భారత్‌లో పేటెంట్ పొందిన విన్‌ఫాస్ట్ ఎలక్ట్రిక్ టూ వీలర్ల జాబితాలో మరో అద్భుతమైన మోడల్ చేరినట్లయింది.

మ్యాక్సీ లుక్..

విన్‌ఫాస్ట్ రసద్ కాన్సెప్ట్‌ను 2026 ప్రారంభంలో తన భవిష్యత్ ఎలక్ట్రిక్ టూ వీలర్ లైనప్‌లో భాగంగా ఆవిష్కరించింది. ఈ స్కూటర్‌ను సాధారణ సిటీ కమ్యూటర్ కాకుండా పర్ఫార్మెన్స్‌పై ప్రత్యేకంగా దృష్టి పెట్టిన మ్యాక్సీ స్కూటర్‌గా రూపొందించినట్లు స్పష్టమవుతోంది. రసద్‌కు ముందు విన్‌ఫాస్ట్ వైపర్ ఎలక్ట్రిక్ స్కూటర్, సులాద్ కాన్సెప్ట్ ఆధారిత ఎలక్ట్రిక్ బైక్‌కు కూడా భారత్‌లో పేటెంట్లు పొందింది.

వరుసగా పేటెంట్లు దాఖలు చేస్తుండటం చూస్తే, భారత మార్కెట్ కోసం విన్‌ఫాస్ట్ ఒక పెద్ద ఎలక్ట్రిక్ టూ వీలర్ లైనప్‌ను సిద్ధం చేస్తున్నట్లు స్పష్టంగా తెలుస్తోంది. ఇక రసద్ డిజైన్ విషయానికి వస్తే, ఇది చాలా స్పోర్టీగా, దూకుడుగా కనిపిస్తుంది. పెద్ద టైర్లు, బాడీ డిజైన్, పొడవైన విండ్‌స్క్రీన్‌తో ఇది యమహా ఏరాక్స్ లాంటి మ్యాక్సీ స్కూటర్లను తలపిస్తుంది.

పవర్‌ఫుల్ పర్ఫార్మెన్స్

రైడర్‌కు అత్యధిక సౌకర్యం అందించేలా విశాలమైన స్టెప్డ్ సీట్‌ను ఇందులో అందించినట్లు పేటెంట్ చిత్రాల ద్వారా తెలుస్తోంది. బ్రేకింగ్ విషయానికి వస్తే ముందు, వెనుక రెండు వైపులా డిస్క్ బ్రేకులు ఉండే అవకాశం ఉంది. అలాగే ముందు భాగంలో టెలిస్కోపిక్ ఫోర్క్ సస్పెన్షన్, వెనుక భాగంలో ట్విన్ షాక్ అబ్జార్బర్లు అమర్చారు. విన్‌ఫాస్ట్ ఇప్పటివరకు దీనికి సంబంధించిన పూర్తి సాంకేతిక వివరాలను అధికారికంగా వెల్లడించనప్పటికీ, వియత్నామీస్ మీడియా నివేదికల ప్రకారం ఇందులో మధ్యలో అమర్చిన ఎలక్ట్రిక్ మోటార్ ఉంటుందని తెలుస్తోంది.

ఇది గరిష్ఠంగా 7.1kW శక్తిని ఉత్పత్తి చేయడంతో పాటు గంటకు 100 కిలోమీటర్ల వేగాన్ని అందుకుంటుందని సమాచారం. భారత మార్కెట్లోకి ఈ సరికొత్త మ్యాక్సీ స్కూటర్ ఎంట్రీ ఇస్తే ఎలక్ట్రిక్ టూ వీలర్ రంగంలో పోటీ మరింత తీవ్రమవడం ఖాయం.