లగ్జరీ కార్ల మార్కెట్‌లోకి రీఎంట్రీ ఇస్తున్న దిగ్గజ సంస్థ! ఆటోమొబైల్ లవర్స్‌కు పండగే ఇక

గతంలో అనేక ఇబ్బందులను ఎదుర్కొన్న ప్రముఖ దిగ్గజం ఇప్పుడు సరికొత్త రూపంలో మార్కెట్లోకి అడుగుపెట్టింది. మాంటెరీ కార్ వీక్‌ కార్యక్రమంలో ఆవిష్కరించిన ఈ నూతన సూపర్ కార్ ప్రపంచవ్యాప్తంగా ఉన్న టెక్ ప్రియులను విశేషంగా ఆకర్షిస్తోంది. పరిమిత సంఖ్యలో మాత్రమే లభించనున్న ఈ అరుదైన మోడల్ ప్రత్యేకతలు ఏమిటో తెలుసుకుందాం.

శక్తివంతమైన ఇంజిన్

స్పైకర్ తీసుకువచ్చిన C8 ప్రిలియేటర్ XXV కూపేకి ఆడి నుంచి సేకరించిన 4.0 లీటర్ ట్విన్-టర్బో V8 పెట్రోల్ ఇంజిన్‌ను అమర్చారు. ఈ శక్తివంతమైన ఇంజిన్ గరిష్ఠంగా 800hp పవర్ మరియు 1,000Nm టార్క్‌ను ఉత్పత్తి చేస్తుంది. కేవలం 2.7 సెకన్లలోనే సున్నా నుంచి వంద కిలోమీటర్ల వేగాన్ని అందుకుంటుందని కంపెనీ స్పష్టం చేసింది.

దీని గరిష్ఠ వేగం గంటకు 349 కిలోమీటర్లకు మించి ఉంటుందని అధికారికంగా వెల్లడించారు. ప్రసిద్ధ ఏవియేషన్ డిజైన్ ఈ కొత్త మోడల్‌లో కూడా కొనసాగించడం విశేషం. ప్రొపెల్లర్ తరహా అల్లాయ్ వీల్స్, ఎయిర్ డక్ట్స్, ఫైటర్ జెట్‌ను తలపించే టెయిల్ ల్యాంప్స్ దీనికి ప్రత్యేకమైన లుక్‌ను అందిస్తున్నాయి. క్వెయిల్ గ్రీన్ రంగులో రోజ్ గోల్డ్ యాక్సెంట్స్‌తో ఈ కారు అత్యంత అందంగా కనిపిస్తుంది.

అనలాగ్ క్యాబిన్

ప్రస్తుత కాలంలో సూపర్‌ కార్లలో పెద్ద పెద్ద డిజిటల్ స్క్రీన్లు వస్తున్నాయి. కానీ ఈ సంస్థ మాత్రం పూర్తిగా భిన్నమైన విధానాన్ని ఎంచుకుంది. క్యాబిన్‌లో అనలాగ్ గేజ్‌లు, ఫిజికల్ బటన్లు, రాకర్ స్విచ్‌లతో కూడిన డాష్‌బోర్డ్‌ను ఏర్పాటు చేశారు. టర్బైన్ తరహా ఏసీ వెంట్లు దీని ఏవియేషన్ థీమ్‌ను మరింత హైలైట్ చేస్తున్నాయి. ఇంటీరియర్‌లో టస్కన్ శాడిల్ అని పిలిచే ఆరెంజ్ బ్రౌన్ లెదర్‌ను ఉపయోగించారు.

కేవలం 25 యూనిట్లకు మాత్రమే పరిమితమైన ఈ కారు ప్రతి యూనిట్‌లోనూ 6 స్పీడ్ మాన్యువల్ గేర్‌బాక్స్ ఉంటుంది. భవిష్యత్తులో GT3 స్థాయి ఎండ్యూరెన్స్ రేసింగ్‌లోకి తిరిగి వెళ్లాలని, అలాగే D8 పెకింగ్-టు-పారిస్ సూపర్ SUV ప్రాజెక్టును మళ్లీ ప్రారంభించాలని కంపెనీ భావిస్తోంది. ఈ రీఎంట్రీ ఆటోమొబైల్ మార్కెట్లో సరికొత్త సంచలనాలు సృష్టిస్తుందని నిపుణులు అంచనా వేస్తున్నారు.