ఒక్క నెలకు రూ.32 వేలు నెట్‌ బిల్.. ప్రపంచంలో అత్యంత ఖరీదైన ఇంటర్నెట్‌ ఎక్కడో తెలుసా

నేటి డిజిటల్ యుగంలో విద్యుత్తు ఎంత అవసరమో, ఇంటర్నెట్ కూడా అంతే అనివార్యంగా మారింది. అయితే, ప్రపంచవ్యాప్తంగా అన్ని దేశాల్లో ఇంటర్నెట్ ధరలు ఒకేలా లేవు. కొన్ని దేశాల్లో హై-స్పీడ్ డేటా అతి తక్కువ ధరకే అందుబాటులో ఉంటే, మరికొన్ని దేశాల్లో ఇంటర్నెట్ వాడాలంటే వేల రూపాయలు ఖర్చు చేయాల్సి వస్తోంది. ఈ నేపథ్యంలో, ప్రపంచంలోనే అత్యంత ఖరీదైన ఇంటర్నెట్ కలిగిన దేశాలేవి? మన దేశం ఏ స్థానంలో ఉందో వివరంగా తెలుసుకుందాం.

అత్యంత ఖరీదైన దేశాలు..

• యునైటెడ్ అరబ్ ఎమిరేట్స్ (UAE)- ప్రతి Mbps వేగానికి ఇక్కడ సుమారు 4.31 డాలర్లు (భారత కరెన్సీలో రూ. 360) వసూలు చేస్తారు. అంటే భారత్‌లో ఒక నెల రీఛార్జ్ ప్లాన్ ధర అక్కడ కేవలం 1 Mbps వేగానికే ఖర్చు చేయాల్సి ఉంటుంది. ఇక్కడ పోటీ తక్కువగా ఉండటమే ఇందుకు ప్రధాన కారణం.
• సోలమన్ ఐలాండ్స్‌‌- నెలకు సగటున ఇంటర్నెట్ బిల్లు 457 డాలర్ల (సుమారు రూ. 38,000) వరకు ఉంటుంది. ఇదొక మారుమూల ద్వీప దేశం కావడం వల్ల సముద్ర అంతర్భాగ కేబుల్స్ మరియు శాటిలైట్ లింక్స్ ఏర్పాటుకు భారీ ఖర్చవుతుంది.
• జింబాబ్వే & ఘనా- ఆఫ్రికా దేశాల్లోనూ ధరలు విపరీతంగా ఉన్నాయి. జింబాబ్వేలో ఒక GB మొబైల్ డేటా ధర ఏకంగా 43.75 డాలర్ల (సుమారు రూ. 3,600) వరకు ఉంటుంది.
• స్విట్జర్లాండ్- ఇక్కడ పర్వత ప్రాంతాల్లో ఫైబర్ ఆప్టిక్ కేబుల్స్ వేయడం చాలా ఖరీదైన పని కావడంతో ఇంటర్నెట్ ధరలు ఎక్కువగా ఉంటాయి.
• పాకిస్థాన్ ఈ జాబితాలో 10వ స్థానంలో ఉంది. అక్కడ సగటున 1 Mbps వేగానికి 0.53 డాలర్లు ఖర్చవుతుంది. ఆర్థిక సంక్షోభం మరియు పరిమిత నెట్‌వర్క్ కవరేజ్ కారణంగా అక్కడ సేవలు ఖరీదైనవిగా మిగిలిపోయాయి.

భారత్ – డిజిటల్ విప్లవానికి చిరునామా..

ప్రపంచంతో పోలిస్తే భారత్‌లో ఇంటర్నెట్ అత్యంత చౌకగా లభిస్తోంది. ఇక్కడ 1 Mbps వేగానికి సగటున కేవలం 0.08 డాలర్లు (రూ. 7 లోపు) మాత్రమే ఖర్చవుతుంది. ప్రపంచవ్యాప్తంగా భారత్ 41వ స్థానంలో ఉన్నప్పటికీ, అత్యంత సరసమైన ధరలకు డేటా అందించే దేశాల్లో ఒకటిగా నిలిచింది. దీనికి కారణం జియో, ఎయిర్‌టెల్, వి (Vi) వంటి కంపెనీల మధ్య ఉన్న తీవ్రమైన పోటీ వల్ల ధరలు భారీగా తగ్గాయి. ప్రస్తుతం భారత్‌లో 90 కోట్ల మందికి పైగా ఇంటర్నెట్ వినియోగదారులు ఉండటానికి ఇదే ప్రధాన కారణం.