టూ వీలర్​ కొనాలని ప్లాన్ చేస్తున్నారా? మార్కెట్‌లోకి వచ్చే కొత్త బైక్‌లు, స్కూటర్ల వివరాలివే

సాధారణ ప్రయాణికుల బైకుల నుంచి అత్యాధునిక స్పోర్ట్స్ బైకుల వరకు అనేక ఆకర్షణీయమైన మోడళ్లు ఈ నెలలో లాంచ్ కానున్నాయి. ఆకర్షణీయమైన డిజైన్, శక్తివంతమైన ఇంజిన్లతో అడుగుపెట్టనున్న ఈ అద్భుతమైన వాహనాల పూర్తి వివరాలను తెలుసుకుందాం.

కొత్త వాహనాలు..

భారతీయ టూ-వీలర్ మార్కెట్‌లో ఆగస్టు నెలలో పలు కొత్త వాహనాలు విడుదల కాబోతున్నాయి. ఈ జాబితాలో సరసమైన ఎలక్ట్రిక్ స్కూటర్లు, ఫ్యామిలీ ఈవీలు, కొత్త తరహా కమ్యూటర్ బైకులు, చిన్న కపాసిటీ స్పోర్ట్స్ బైకులు ఉన్నాయి. ఈ3 ట్రియన్ ఎలక్ట్రిక్ స్కూటర్ ఆగస్టు ఆరున మార్కెట్లోకి రానుంది. ఇది పట్టణ ప్రాంత ప్రయాణాలకు అనుకూలంగా ఉంటుందని భావిస్తున్నారు. సింగిల్ ఛార్జ్‌పై వంద నుంచి నూట ఇరవై కిలోమీటర్ల దూరం ప్రయాణించే సామర్థ్యాన్ని కలిగి ఉంది. దీని ధర సుమారు తొంభై వేల రూపాయల నుంచి లక్ష రూపాయల మధ్య ఉండొచ్చని అంచనా.

అలాగే బజాజ్ ఆటో నూతన తరం పల్సర్ సిరీస్‌ను ఈ నెలలో లాంచ్ చేయనుంది. ఇప్పటికే పల్సర్ 125 రోడ్లపై టెస్టింగ్ సమయంలో కనిపిచింది. అత్యాధునిక ఎల్ఈడీ హెడ్‌ల్యాంప్, స్ప్లిట్-సీట్ సెటప్, మోనోషాక్ సస్పెన్షన్‌తో ఇది రూపుదిద్దుకుంది. పల్సర్ 125 ధర సుమారు 95 వేల రూపాయల నుంచి లక్షా ఐదు వేల రూపాయల వరకు ఉండొచ్చు. కంపెనీ తన ఇరవై ఐదవ వార్షికోత్సవాన్ని పురస్కరించుకుని పల్సర్ 150 కొత్త వెర్షన్‌ను కూడా పరిచయం చేసే అవకాశం ఉంది.

ఏథర్ ఫ్యామిలీ ఈవీ, యమహా ఆర్2

ఏథర్ ఎనర్జీ సంస్థ తన సరికొత్త మాస్ మార్కెట్ ఎలక్ట్రిక్ స్కూటర్‌ను ఆగస్టు 29న లాంచ్ చేయనుంది. ఈఎల్ ప్లాట్‌ఫామ్ ఆధారంగా తయారైన ఈ స్కూటర్ కుటుంబ అవసరాలను దృష్టిలో ఉంచుకుని రూపొందించారు. విశాలమైన సీటు, పెద్ద ఫ్లోర్‌బోర్డ్ దీని ప్రత్యేకతలు. ఒక్కసారి ఛార్జ్ చేస్తే నూట యాభై కిలోమీటర్లకు పైగా ప్రయాణించవచ్చని సమాచారం. దీని ధర లక్షా పదిహేན་ వేల రూపాయల నుంచి లక్షా నలభై వేల రూపాయల మధ్య ఉండవచ్చు.

మరోవైపు యమహా సంస్థ వైజఎఫ్-ఆర్2 స్పోర్ట్స్ బైక్‌ను ఆగస్టు 27న విడుదల చేసే అవకాశం ఉంది. రెండు వందల సీసీ లిక్విడ్-కూల్డ్ ఇంజిన్‌తో రానున్న ఈ బైక్ ధర సుమారు రెండు లక్షల రూపాయల నుంచి రెండు లక్షల ముప్పై వేల రూపాయల వరకు ఉండొచ్చని అంచనా వేస్తున్నారు.

హోండా సీబీ350..

హోండా సంస్థ తన 2026 సీబీ350, సీబీ350ఆర్‌ఎస్, సీబీ350సీ మోడళ్లను భారత మార్కెట్లో ప్రవేశపెట్టింది. ఈ నెలలో వీటి విక్రయాలు ప్రారంభం కానున్నాయి. ప్రధానంగా కొత్త రంగుల ఎంపికలు, ఆకర్షణీయమైన గ్రాఫిక్స్‌తో ఇవి వస్తున్నాయి. మెకానికల్ పరంగా ఇందులో 348.36 సీసీ ఇంజిన్ కొనసాగుతోంది. ఇది రాయల్ ఎన్‌ఫీల్డ్ క్లాసిక్ 350 బైక్‌లకు గట్టి పోటీ ఇవ్వనుంది. మొత్తంగా ఈ నెలలో వస్తున్న కొత్త వాహనాలు ఆటోమొబైల్ ప్రియులను ఎంతగానో ఆకట్టుకోనున్నాయి.