AI ఎక్కువగా వాడేవారిలో బ్రెయిన్ ఫ్రై అనే కొత్త రోగం! దాని లక్షణాలు ఏంటంటే?
కార్యాలయాల్లో AI సాధనాల విస్తరణ ఉత్పాదకతను పెంచుతున్నప్పటికీ, ఉద్యోగుల్లో 'AI బ్రెయిన్ ఫ్రై' అనే మానసిక అలసటను కలిగిస్తోంది. అధిక AI వినియోగం ఒత్తిడి, ఏకాగ్రత లోపం, తప్పులకు దారితీస్తోందని తాజా అధ్యయనం హెచ్చరిస్తోంది. AIని కేవలం సహాయక సాధనంగా ఉపయోగిస్తే ప్రయోజనం, లేదంటే మానసిక ఆరోగ్యంపై ప్రతికూల ప్రభావం తప్పదు.
ఆర్టిఫిషియల్ ఇంటెలిజెన్స్ (AI) సాధనాలు కార్యాలయాల్లో వేగంగా విస్తరిస్తున్నాయి. సాఫ్ట్వేర్ డెవలపర్లు, అకౌంటెంట్లు, మార్కెటింగ్ నిపుణులు, హెచ్ఆర్ సిబ్బంది ఇలా దాదాపు ప్రతి రంగంలో ఉద్యోగులు రోజువారీ పనుల్లో AI సాధనాలను ఉపయోగిస్తున్నారు. అయితే ఈ సాంకేతికత ఉత్పాదకతను పెంచుతున్నప్పటికీ, దీర్ఘకాలంలో ఉద్యోగుల మానసిక స్థితిపై ప్రతికూల ప్రభావం చూపే ప్రమాదం ఉందని తాజా పరిశోధన హెచ్చరిస్తోంది. హార్వర్డ్ బిజినెస్ రివ్యూలో ప్రచురితమైన తాజా అధ్యయనం ప్రకారం.. అధికంగా AI సాధనాలను ఉపయోగించడం వల్ల AI బ్రెయిన్ ఫ్రై అనే కొత్త రకమైన మానసిక అలసట ఏర్పడుతోంది. ఈ అధ్యయనంలో అమెరికాలోని 1,488 మంది ఉద్యోగులను సర్వే చేసి, వారి పనిలో AI వినియోగం, దాని ప్రభావాలను పరిశీలించారు.
AI బ్రెయిన్ ఫ్రై అంటే ఏమిటి?
పరిశోధకుల ప్రకారం ఉద్యోగులు ఒకేసారి అనేక AI సాధనాలను పర్యవేక్షిస్తూ పనిచేసేటప్పుడు మెదడుపై అదనపు ఒత్తిడి పడుతుంది. దీనివల్ల మానసిక అలసట, దృష్టి కేంద్రీకరణలో ఇబ్బంది, నిర్ణయాలు తీసుకోవడంలో ఆలస్యం, అలాగే తలనొప్పి వంటి సమస్యలు తలెత్తుతాయి. అధ్యయనంలో పాల్గొన్న వారిలో సుమారు 14 శాతం మంది ఈ రకమైన మానసిక అలసటను అనుభవిస్తున్నట్లు తెలిపారు. అన్ని రంగాల్లో ప్రభావం ఒకేలా లేదని అధ్యయనం వెల్లడించింది. మార్కెటింగ్ రంగంలో పనిచేసేవారిలో 26 శాతం మంది ఈ సమస్యను ఎదుర్కొంటున్నారు. తరువాత మానవ వనరుల విభాగంలో 19.3 శాతం, ఆపరేషన్స్లో 17.9 శాతం, సాఫ్ట్వేర్ డెవలపర్లలో 17.8 శాతం మంది ఈ సమస్యను నివేదించారు. న్యాయ నిపుణులలో మాత్రం కేవలం 5.6 శాతం మందికి మాత్రమే ఈ సమస్య కనిపించింది.
పనితీరుపై ప్రభావం
AI బ్రెయిన్ ఫ్రైని ఎదుర్కొంటున్న ఉద్యోగులు సాధారణంగా 14 శాతం ఎక్కువ మానసిక శ్రమ వెచ్చించాల్సి వస్తోంది. అలాగే 12 శాతం ఎక్కువ మానసిక అలసట అనుభవిస్తున్నట్లు తేలింది. దీనివల్ల చిన్న తప్పులు 11 శాతం పెరగగా, పెద్ద తప్పులు 39 శాతం వరకు పెరిగినట్లు పరిశోధన పేర్కొంది. అంతేకాకుండా, ఈ సమస్యను ఎదుర్కొంటున్న ఉద్యోగులు ఉద్యోగం వదిలే అవకాశాలు కూడా 39 శాతం ఎక్కువగా ఉన్నాయని అధ్యయనం తెలిపింది. అయితే అన్ని సందర్భాల్లో AI ప్రతికూల ప్రభావమే చూపుతుందని కాదు. పునరావృతమయ్యే చిన్న పనులను తగ్గించేందుకు AIను ఉపయోగించినప్పుడు ఉద్యోగులలో బర్న్అవుట్ స్థాయి 15 శాతం వరకు తగ్గినట్లు పరిశోధన వెల్లడించింది. నిపుణుల అభిప్రాయం ప్రకారం AIను సహాయక సాధనంగా ఉపయోగిస్తే ప్రయోజనం ఉంటుంది కానీ దానిపై పూర్తిగా ఆధారపడితే మానసిక ఒత్తిడి పెరిగే ప్రమాదం ఉంది.
మరిన్ని టెక్ వార్తల కోసం ఇక్కడ క్లిక్ చేయండి