Wimbledon: 57 నిమిషాల్లోనే మ్యాచ్ క్లోజ్.. 114 ఏళ్ల తర్వాత తొలిసారి.. చరిత్ర సృష్టించిన పోలిష్ బ్యూటీ
Iga Swiatek: సెమీ-ఫైనల్లో ప్రపంచ నంబర్ 1 ఆర్యనా సబలెంకాను ఓడించి సంచలనం సృష్టించిన అనిసిమోవా, ఫైనల్లో స్వైటెక్ ముందు నిలబడలేకపోయింది. మ్యాచ్ ముగిసిన తర్వాత అనిసిమోవా భావోద్వేగానికి లోనై కన్నీళ్లు పెట్టుకుంది. అయినప్పటికీ, ఈ టోర్నమెంట్లో ఆమె ప్రదర్శన అద్భుతం.
Wimbledon: వింబుల్డన్ 2025 మహిళల సింగిల్స్ ఫైనల్ చరిత్రలో నిలిచిపోయే మ్యాచ్గా మారింది. పోలిష్ సంచలనం ఇగా స్వైటెక్, అమెరికాకు చెందిన అమండా అనిసిమోవాను 6-0, 6-0 అనే అద్భుతమైన, ఏకపక్ష స్కోరుతో ఓడించి తన మొదటి వింబుల్డన్ టైటిల్ను గెలుచుకుంది. కేవలం 57 నిమిషాల్లో మ్యాచ్ ముగియడం విశేషం. వింబుల్డన్ చరిత్రలో 1911 తర్వాత మహిళల సింగిల్స్ ఫైనల్లో 6-0, 6-0తో గెలిచిన మొదటి క్రీడాకారిణిగా స్వైటెక్ నిలిచింది. ఓపెన్ ఎరాలో గ్రాండ్ స్లామ్ ఫైనల్లో “డబుల్ బేగెల్” (ఒక గేమ్ కూడా ఇవ్వకుండా గెలవడం) సాధించిన రెండవ మహిళా క్రీడాకారిణిగా (1988 ఫ్రెంచ్ ఓపెన్లో స్టెఫీ గ్రాఫ్ తర్వాత) ఆమె చరిత్ర సృష్టించింది.
క్లే కోర్ట్కు క్వీన్గా పేరుగాంచిన స్వైటెక్, గడ్డి కోర్ట్పై కూడా తన ఆధిపత్యాన్ని చాటింది. ఆమె తన కెరీర్లో ఆరో గ్రాండ్ స్లామ్ టైటిల్ను గెలుచుకుంది. ఇప్పటికే నాలుగు ఫ్రెంచ్ ఓపెన్ టైటిళ్లు, ఒక యూఎస్ ఓపెన్ టైటిల్ ఆమె ఖాతాలో ఉన్నాయి. ఈ విజయంతో స్వైటెక్ అన్ని రకాల కోర్ట్లలో (క్లే, హార్డ్, గ్రాస్) గ్రాండ్ స్లామ్ టైటిళ్లను గెలిచిన అత్యంత చిన్న వయస్కురాలిగా (2002లో సెరెనా విలియమ్స్ తర్వాత) నిలిచింది.
మ్యాచ్ ప్రారంభం నుంచే స్వైటెక్ దూకుడుగా ఆడింది. అనిసిమోవాకు ఏ మాత్రం అవకాశం ఇవ్వకుండా పాయింట్ల వర్షం కురిపించింది. అనిసిమోవా తన మొదటి గ్రాండ్ స్లామ్ ఫైనల్ ఆడుతున్నందున ఆమెపై ఒత్తిడి స్పష్టంగా కనిపించింది. ఆమె అనేక అన్ఫోర్స్డ్ ఎర్రర్లు చేయగా, స్వైటెక్ తన పదునైన సర్వీసులు, పవర్ హిట్టింగ్తో ఆధిపత్యాన్ని ప్రదర్శించింది. మొదటి సెట్ను 26 నిమిషాల్లో 6-0తో గెలుచుకున్న స్వైటెక్, రెండవ సెట్లో కూడా అదే జోరును కొనసాగించింది.
సెమీ-ఫైనల్లో ప్రపంచ నంబర్ 1 ఆర్యనా సబలెంకాను ఓడించి సంచలనం సృష్టించిన అనిసిమోవా, ఫైనల్లో స్వైటెక్ ముందు నిలబడలేకపోయింది. మ్యాచ్ ముగిసిన తర్వాత అనిసిమోవా భావోద్వేగానికి లోనై కన్నీళ్లు పెట్టుకుంది. అయినప్పటికీ, ఈ టోర్నమెంట్లో ఆమె ప్రదర్శన అద్భుతం. ఏడాది క్రితం టాప్ 400లో కూడా లేని అనిసిమోవా, ఇప్పుడు టాప్ 10లోకి అడుగుపెట్టనుంది.
విజేతగా నిలిచిన స్వైటెక్, తన జట్టుతో కలిసి విజయాన్ని పంచుకుంది. ఈ గెలుపు ఆమె కెరీర్లో ఒక మైలురాయిగా నిలిచింది. గడ్డి కోర్ట్పై అంతకుముందు క్వార్టర్ ఫైనల్స్కు మించి వెళ్లని స్వైటెక్, వింబుల్డన్ విజేతగా నిలిచి తన నైపుణ్యాన్ని నిరూపించుకుంది. పోలాండ్ నుంచి వింబుల్డన్ సింగిల్స్ టైటిల్ గెలిచిన మొదటి క్రీడాకారిణిగా కూడా స్వైటెక్ చరిత్ర సృష్టించింది. ఈ విజయం ఆమెను ప్రస్తుత తరం అత్యుత్తమ ఆల్రౌండ్ క్రీడాకారిణిగా నిలబెట్టింది.
మరిన్ని క్రికెట్ న్యూస్ కోసం ఇక్కడ క్లిక్ చేయండి..