Saina Nehwal: ఇక నావల్ల కాదు.. రిటైర్మెంట్ ప్రకటించిన బ్యాడ్మింటన్‌ క్వీన్..

Saina Nehwal Knee Injury: భారతీయ క్రీడా రంగంలో ఒక అద్భుత అధ్యాయం ముగిసింది. ఎందరో యువతులకు స్ఫూర్తిగా నిలిచి, అంతర్జాతీయ స్థాయిలో భారత బ్యాడ్మింటన్ సత్తా చాటిన సైనా నెహ్వాల్ (35) రిటైర్మెంట్ ప్రకటించారు. గత రెండు సంవత్సరాలుగా ఆమె క్రమంగా ఆటకు దూరమైనప్పటికీ, ఇప్పుడు అధికారికంగా తన నిర్ణయాన్ని వెల్లడించడం క్రీడా లోకాన్ని కలిచివేస్తోంది.

గాయంతో సుదీర్ఘ పోరాటం..

ఒక పోడ్‌కాస్ట్‌లో మాట్లాడిన సైనా, తన రిటైర్మెంట్‌కు ప్రధాన కారణం మోకాలి గాయమేనని స్పష్టం చేసింది. “నా మోకాలిలోని కార్టిలేజ్ పూర్తిగా దెబ్బతింది. నాకు ఆర్థరైటిస్ సమస్య ఉంది. ప్రపంచంలోనే అత్యుత్తమంగా ఉండాలంటే రోజుకు 8-9 గంటలు ప్రాక్టీస్ చేయాలి. కానీ ఇప్పుడు గంటో రెండు గంటలకే నా మోకాలు వాచిపోతోంది. ఆ నొప్పితో నేను ఇక పోరాడలేను” అని ఆమె ఆవేదన వ్యక్తం చేశారు. 2016 రియో ఒలింపిక్స్ సమయంలోనే ఆమె మోకాలికి పెద్ద గాయమైంది. ఆ తర్వాత సర్జరీ చేయించుకుని కోలుకున్నా, ఆ సమస్య పదేపదే ఆమెను వేధిస్తూనే ఉంది.

సైనా – భారత బ్యాడ్మింటన్ రారాణి..

సైనా నెహ్వాల్ కేవలం ఒక క్రీడాకారిణి మాత్రమే కాదు, భారత బ్యాడ్మింటన్ చరిత్రలో విప్లవాన్ని తీసుకొచ్చిన వ్యక్తి. పుల్లెల గోపీచంద్ అకాడమీలో శిక్షణ పొందిన ఆమె సాధించిన విజయాలు అద్భుతం:

ఇవి కూడా చదవండి

సూర్య, బుమ్రా కాదు.. టీ20 ప్రపంచ కప్‌లో టీమిండియా ట్రంప్ కార్డ్?

టీమిండియా చెత్త ఓటమికి ఆ ఇద్దరే నిజమైన ద్రోహులు?

టీమిండియా ఓటమికి అతిపెద్ద విలన్ ఇతడే.. వన్డేల నుంచి రిటైర్మెంట్?

అసాధ్యమైన రికార్డు భయ్యో.. సచిన్ 100 సెంచరీల కంటే డేంజరస్

2012 లండన్ ఒలింపిక్స్: బ్యాడ్మింటన్‌లో భారత్ తరపున తొలిసారిగా ఒలింపిక్ కాంస్య పతకాన్ని సాధించి చరిత్ర సృష్టించారు.

వరల్డ్ నంబర్ 1: 2015లో ప్రపంచ నంబర్ వన్ ర్యాంకును అందుకున్న తొలి భారతీయ మహిళా బ్యాడ్మింటన్ ప్లేయర్‌గా రికార్డు నెలకొల్పారు.

కామన్వెల్త్ గేమ్స్: 2010 మరియు 2018లో స్వర్ణ పతకాలు సాధించారు.

అవార్డులు: పద్మభూషణ్, పద్మశ్రీ, రాజీవ్ గాంధీ ఖేల్ రత్న వంటి ప్రతిష్టాత్మక పురస్కారాలను అందుకున్నారు.

సొంత నిబంధనలతోనే నిష్క్రమణ..

చాలా మంది స్టార్ ప్లేయర్లు గ్రాండ్ విడ్కోలు కోరుకుంటారు. కానీ సైనా మాత్రం భిన్నంగా ఆలోచించారు. “నేను నా సొంత నిబంధనలతో ఆటకు వచ్చాను, అలాగే నా సొంత నిబంధనలతోనే నిష్క్రమించాలని భావిస్తున్నాను. అందుకే దీని గురించి పెద్దగా అనౌన్స్‌మెంట్ చేయాల్సిన అవసరం లేదనిపించింది” అని ఆమె చెప్పుకొచ్చారు. 2023 సింగపూర్ ఓపెన్ తర్వాత ఆమె మళ్లీ టోర్నమెంట్లు ఆడలేదు.

ముగిసిన ఒక అద్భుత శకం..

సైనా నెహ్వాల్ అందించిన స్ఫూర్తితోనే పీవీ సింధు వంటి ఎంతో మంది స్టార్ ప్లేయర్లు ప్రపంచ వేదికలపై సత్తా చాటారు. కోర్టులో ఆమె చూపించే పోరాట పటిమ, పట్టుదల ఎప్పటికీ మరువలేనివి. గాయం కారణంగా ఆమె కెరీర్ అర్ధాంతరంగా ముగిసినా, భారత బ్యాడ్మింటన్ చరిత్రలో ఆమె పేరు శాశ్వతంగా నిలిచిపోతుంది.