IND vs AUS: విరాట్‌ కోహ్లీకి ఇదే చివరి అవకాశం..! ఒక వేళ అలా చేయకుంటే మళ్లీ ఎప్పుడూ..

భారత్, ఆస్ట్రేలియా మధ్య రెండో వన్డేకు రంగం సిద్ధమైంది. తొలి వన్డేలో ఎదురైన ఓటమికి బదులు తీర్చుకుంటూ.. సిరీస్‌ను సమం చేయాలని టీమిండియా పట్టుదలతో ఉంది. అడిలైడ్‌లోని ది ఓవల్ వేదికగా జరగనున్న రెండో వన్డేలో విరాట్ కోహ్లీ చరిత్ర సృష్టించే అవకాశం ఉంది. అది కూడా అద్భుతమైన సెంచరీ సాధించడం ద్వారా..! అవును, ఆస్ట్రేలియా పిచ్‌పై విదేశీయుడి అత్యధిక సెంచరీల రికార్డును నెలకొల్పడానికి కింగ్ కోహ్లీకి మరో సెంచరీ అవసరం.

ఆస్ట్రేలియాతో జరిగే 2వ వన్డేలో కోహ్లీ సెంచరీ చేస్తే ఆస్ట్రేలియా పిచ్‌పై అత్యధిక సెంచరీలు చేసిన విదేశీ బ్యాట్స్‌మన్‌గా నిలుస్తాడు. విరాట్ కోహ్లీ ప్రస్తుతం ఈ రికార్డును ఇంగ్లాండ్‌కు చెందిన జాక్ హాబ్స్‌తో పంచుకున్నాడు. ఇంగ్లాండ్ మాజీ ఆటగాడు జాక్ హాబ్స్ మెల్‌బోర్న్ క్రికెట్ గ్రౌండ్‌లో 5 టెస్ట్ సెంచరీలు సాధించాడు. దీనితో ఒకే ఆస్ట్రేలియా మైదానంలో ఒక విదేశీ బ్యాట్స్‌మన్ అత్యధిక సెంచరీలు చేసిన రికార్డును అతను సృష్టించాడు.

ఇదిలా ఉండగా విరాట్ కోహ్లీ ఇప్పటివరకు అడిలైడ్ ఓవల్‌లో 5 సెంచరీలు సాధించాడు. కింగ్ కోహ్లీ వన్డే క్రికెట్‌లో 2 సెంచరీలు, టెస్ట్‌లలో 3 సెంచరీలు సాధించి జాక్ హాబ్స్ రికార్డును సమం చేశాడు. ఇప్పుడు అతను 2వ వన్డేలో సెంచరీ చేస్తే, ఒకే ఆస్ట్రేలియా మైదానంలో అత్యధిక సెంచరీలు చేసిన విదేశీ బ్యాట్స్‌మన్ అవుతాడు. అంతే కాదు ఆస్ట్రేలియాలోని ఒకే మైదానంలో 1000 పరుగులు చేసిన తొలి విదేశీ బ్యాట్స్‌మన్‌గా నిలిచేందుకు విరాట్ కోహ్లీకి కేవలం 25 పరుగులు మాత్రమే అవసరం. అంటే అడిలైడ్‌లో 17 ఇన్నింగ్స్‌లు ఆడిన కింగ్ కోహ్లీ ఇప్పటివరకు 975 పరుగులు చేశాడు.

ఆస్ట్రేలియాతో జరిగే రెండో వన్డేలో అతను 25 పరుగులు చేస్తే, కంగారూ నేషన్‌లోని ఒకే మైదానంలో వెయ్యి పరుగులు చేసిన తొలి విదేశీ ఆటగాడిగా రికార్డు సృష్టిస్తాడు. అయితే కోహ్లీకి ఇదే చివరి ఆసీస్‌ పర్యటన అని చాలా మంది భావిస్తున్న తరుణంలో ఈ రికార్డ్‌ సాధించడానికి ఇదే కోహ్లీ లాస్ట్‌ ఛాన్స్‌గా భావించాలి. ఒక వేళ ఇప్పుడు మిస్‌ అయితే ఇక కోహ్లీ ఆ రికార్డును అందుకోవడం కష్టమే. ఎందుకంటే మళ్లీ ఆసీస్‌ టూర్‌ వరకు కోహ్లీ టీమిండియాలో ఉండకపోవచ్చు.

మరిన్ని క్రికెట్‌ వార్తల కోసం ఇక్కడ క్లిక్‌ చేయండి