Suryakumar Yadav: సూర్యకుమార్ యాదవ్‌కు బంపర్ ఆఫర్.. మళ్లీ కెప్టెన్సీ అవకాశం

Suryakumar Yadav: భారత టీ20 ప్రపంచకప్ విజయంలో కీలక పాత్ర పోషించిన స్టార్ బ్యాటర్ సూర్యకుమార్ యాదవ్‌కు మరో కీలక బాధ్యత దక్కనుంది. రాబోయే దేశవాళీ క్రికెట్ టోర్నీల్లో ముంబై జట్టుకు అతడే కెప్టెన్ గా వ్యవహరించనున్నాడు. సయ్యద్ ముస్తాక్ అలీ ట్రోఫీ(SMAT), విజయ్ హజారే ట్రోఫీ (VHT) టోర్నీలకు సూర్యను కెప్టెన్‌గా చేయాలని ముంబై క్రికెట్ సంఘం సెలక్షన్ కమిటీ నిర్ణయించినట్లు ప్రముఖ మీడియా వెల్లడించింది.ఇటీవల భారత టీ20 జట్టు కెప్టెన్సీ బాధ్యతల నుంచి తప్పుకున్న సూర్యకు ఈ నిర్ణయం కొత్త ఉత్సాహాన్ని ఇచ్చే అవకాశం ఉంది.

సూర్యకుమార్‌కు ముంబై జట్టు కెప్టెన్సీ అప్పగించాలనే నిర్ణయం ఆసక్తికరంగా మారింది. ఎందుకంటే ఇటీవలే అతడికి రంజీ ట్రోఫీ 2026-27 జట్టులో చోటు దక్కలేదు. తాను అందుబాటులో ఉంటానని సూర్య చెప్పినా సెలక్టర్లు మాత్రం అతడిని పక్కన పెట్టారు. లాంగ్ ఫార్మాట్‌లో ఇటీవల తగినన్ని మ్యాచ్‌లు ఆడకపోవడమే ఇందుకు కారణమని వెల్లడించారు. అయితే ఇప్పుడు టీ20, వన్డే ఫార్మాట్లలో జరిగే రెండు ప్రధాన దేశవాళీ టోర్నీలకు అతడికి నాయకత్వ బాధ్యతలు అప్పగించనున్నట్లు వార్తలు రావడం విశేషం.

గత దేశవాళీ సీజన్‌లో ముంబై జట్టు ఆశించిన స్థాయిలో రాణించలేదు. 2025-26 సయ్యద్ ముస్తాక్ అలీ ట్రోఫీలో క్వార్టర్ ఫైనల్ దశలోనే ఇంటిదారి పట్టింది. విజయ్ హజారే ట్రోఫీలోనూ కర్ణాటక చేతిలో ఓటమి ఎదురైంది. ఈ నేపథ్యంలో కొత్త సీజన్‌లో మెరుగైన ప్రదర్శన చేయాలని ముంబై జట్టు భావిస్తోంది. అనుభవజ్ఞుడైన సూర్యకుమార్ నాయకత్వం జట్టుకు ఉపయోగపడుతుందని సెలక్టర్లు భావిస్తున్నట్లు సమాచారం. నవంబర్ 14న హైదరాబాద్ జట్టుతో ముంబై తన సయ్యద్ ముస్తాక్ అలీ ట్రోఫీ ప్రయాణాన్ని ప్రారంభించనుంది. ఛత్తీస్‌గఢ్, గోవా, గుజరాత్, ఒడిశా, విదర్భ, ఉత్తరాఖండ్ జట్లు కూడా ఇదే గ్రూపులో ఉన్నాయి.

మరోవైపు సూర్యకుమార్ వ్యక్తిగత ప్రదర్శనపై కూడా అందరి దృష్టి నెలకొంది. టీ20 ప్రపంచకప్ 2026లో భారత జట్టు విజయం సాధించినప్పటికీ బ్యాటర్‌గా సూర్య ఆశించిన స్థాయిలో రాణించలేకపోయాడు. ఆ టోర్నీలో తొమ్మిది మ్యాచ్‌లు ఆడి 242 పరుగులు మాత్రమే చేశాడు. 30 సగటు, 136.72 స్ట్రైక్ రేట్ నమోదు చేశాడు. ఐపీఎల్ 2026లోనూ అతడి ప్రదర్శన అంతంత మాత్రంగానే ఉంది. ముంబై ఇండియన్స్ తరఫున 13 మ్యాచ్‌లు ఆడి 270 పరుగులు చేశాడు. 20 సగటు, 147.54 స్ట్రైక్ రేట్ నమోదు చేశాడు. ఈ గణాంకాలు అతడి బ్యాటింగ్ ఫామ్‌పై ప్రశ్నలు లేవనెత్తాయి.

ప్రస్తుతం సూర్యకుమార్ ముందున్న ప్రధాన లక్ష్యం తిరిగి తన పాత ఫామ్‌ను అందుకోవడమే. సయ్యద్ ముస్తాక్ అలీ ట్రోఫీ, విజయ్ హజారే ట్రోఫీల్లో మంచి ప్రదర్శన చేస్తే భారత జట్టులోకి తిరిగి వచ్చే అవకాశాలు మెరుగుపడవచ్చు. ముఖ్యంగా 2028 టీ20 ప్రపంచకప్‌ను దృష్టిలో పెట్టుకుని ఇప్పటి నుంచే తన ఆటతీరును మెరుగుపరుచుకోవాల్సిన అవసరం ఉంది. ముంబై కెప్టెన్‌గా జట్టును విజయాల బాట పట్టించడంతో పాటు బ్యాటర్‌గా పరుగుల వరద పారిస్తే సూర్యకు మళ్లీ టీమిండియాలో కీలక స్థానం దక్కే అవకాశం ఉంటుంది. అయితే అతడి రీఎంట్రీ పై ఇప్పుడే క్లారిటీ లేదు. రాబోయే దేశవాళీ టోర్నీల్లో సూర్య ఎలా ఆడతాడన్నది ఆసక్తికరంగా మారింది.