Shreyas Iyer: వామ్మో.. జపాన్ తోపు.. సింగిల్స్, డబుల్స్తోనే మ్యాచ్ గెలిచామన్న టీమిండియా కెప్టెన్
Shreyas Iyer: జపాన్పై ఉత్కంఠభరిత విజయానంతరం టీమిండియా కెప్టెన్ శ్రేయస్ అయ్యర్ ఆసక్తికర విషయాలు వెల్లడించారు. పిచ్పై బంతి బాగా టర్న్ కావడంతో బ్యాటింగ్ కష్టంగా మారిందన్నారు. భారీ షాట్లకు బదులుగా సింగిల్స్, డబుల్స్తో స్ట్రైక్ రొటేట్ చేయడమే తమ వ్యూహమని తెలిపారు. జపాన్ జట్టు అద్భుతంగా పోరాడిందని శ్రేయస్ ప్రశంసించారు. చివరి ఓవర్లో బౌలర్లు అద్భుతంగా రాణించారని పేర్కొన్నారు.
Updated on: Sep 22, 2026 | 5:15 PM
Shreyas Iyer: జపాన్లోని సానో అంతర్జాతీయ క్రికెట్ మైదానంలో భారత్, జపాన్ జట్ల మధ్య జరిగిన ఇరు దేశాల తొలి చారిత్రక టీ20 మ్యాచ్ ఎంతో ఉత్కంఠభరితంగా సాగింది. వర్షం కారణంగా ఈ మ్యాచ్ను కేవలం 5 ఓవర్లకు కుదించగా, అందరూ భారత్ ఈజీగా గెలుస్తుందని భావించారు. అయితే ఊహించని విధంగా జపాన్ బౌలర్లు, బ్యాటర్లు టీమిండియాకు చుక్కలు చూపించారు. ఆఖరి ఓవర్ వరకు సాగిన ఈ హోరాహోరీ పోరులో భారత్ కేవలం 2 పరుగుల తేడాతో అతికష్టం మీద విజయం సాధించింది. ఈ అనూహ్య పరిణామంతో మ్యాచ్ ముగిసిన తర్వాత భారత జట్టు కెప్టెన్ శ్రేయస్ అయ్యర్ ఊపిరి పీల్చుకున్నారు.
పిచ్ పరిస్థితులపై కెప్టెన్ స్పందన
మ్యాచ్ ముగిసిన అనంతరం పోస్ట్ మ్యాచ్ ప్రెజెంటేషన్లో మాట్లాడిన కెప్టెన్ శ్రేయస్ అయ్యర్ పిచ్ తీరుపై ఆసక్తికర విషయాలను వెల్లడించారు. ఈ పిచ్పై బ్యాటింగ్ చేయడం నిజంగా చాలా కష్టంగా ఉందని ఆయన అంగీకరించారు. పిచ్పై బంతి బాగా టర్న్ అవుతోందని, బాల్స్ సరిగ్గా బ్యాట్కు రాలేదని తెలిపారు. మైదానంలో నిలదొక్కుకున్న ఓపెనర్లు కూడా స్పిన్ వేగాన్ని అంచనా వేయడంలో ఇబ్బంది పడ్డారని శ్రేయస్ పేర్కొన్నారు. కఠినమైన పరిస్థితుల్లో బంతి వేగాన్ని బట్టి ఆడేందుకు తాను పక్కా ప్రణాళికతో బరిలోకి దిగానని తెలిపారు.
సింగిల్స్, డబుల్స్పై దృష్టి పెట్టాం
పిచ్ పరిస్థితులు బ్యాటింగ్కు అనుకూలంగా లేకపోవడంతో తాను ఏ విధంగా బ్యాటింగ్ ప్లాన్ మార్చుకున్నారో శ్రేయస్ వివరించారు. క్రీజులోకి రాగానే పెద్ద షాట్లు కొట్టడం కంటే, సింగిల్స్, డబుల్స్ తీస్తూ స్ట్రైక్ రొటేట్ చేయడమే ముఖ్యమని భావించానని చెప్పారు. బంతి పరిస్థితిని అర్థం చేసుకుని క్రీజులో వెనుకకు జరిగి ఆడే ప్రయత్నం చేశానని, ఈ వ్యూహమే తమను గెలుపు గీత దాటించేందుకు సహాయపడిందని ఆయన వెల్లడించారు. వికెట్లు పడుతున్న సమయంలో పరిస్థితులకు తగినట్లుగా సర్దుకుపోవడం చాలా కీలకమని శ్రేయస్ అభిప్రాయపడ్డారు.
జపాన్ జట్టును కొనియాడిన శ్రేయస్
ఐదు ఓవర్ల చిన్న ఫార్మాట్ మ్యాచ్లో ఏ జట్టు ఎప్పుడైనా గెలవచ్చని, ప్రత్యర్థి ఎంతటి బలహీనమైనదైనా తక్కువ అంచనా వేయకూడదని శ్రేయస్ అయ్యర్ అభిప్రాయపడ్డారు. ఈ మ్యాచ్లో జపాన్ జట్టు కనబరిచిన ఆటతీరు, వారి పోరాట పటిమ అద్భుతంగా ఉందని ప్రశంసించారు. జపాన్ ఆటగాళ్ల అప్రోచ్ చాలా బాగుందని, వారు ఆడిన తీరు నిజంగా అభినందనీయమన్నారు. ఏదేమైనా ఆఖరి క్షణంలో బౌలర్లు కట్టదిట్టంగా బౌలింగ్ చేసి జట్టును గెలిపించడం పట్ల తాను ఎంతో సంతోషంగా ఉన్నానని శ్రేయస్ ముగించారు.
మరిన్ని క్రికెట్ వార్తల కోసం ఇక్కడ క్లిక్ చేయండి..
