Champions Trophy 2025: ‘త్వరలోనే ఛాంపియన్స్ ట్రోఫీ షెడ్యూల్’.. మరోసారి భారత్‌ను కవ్వించిన పీసీబీ ఛైర్మన్
భారతదేశం, పాకిస్తాన్ దేశాల మధ్య నెలకొన్న వివాదం కారణంగా, ఛాంపియన్స్ ట్రోఫీ షెడ్యూల్ పై ఇప్పటివరకు అధికారిక సమాచారం బయటకు రాలేదు. పాకిస్థాన్‌కు తమ జట్టును పంపేందుకు బీసీసీఐ నిరాకరిస్తోంది. హైబ్రిడ్ మోడల్‌కు పాకిస్థాన్ ససేమిరా అంటోంది.
ఛాంపియన్స్ ట్రోఫీ జరగడానికి ఇంకా కొన్ని రోజుల సమయమే ఉంది. కానీ ఈ టోర్ని నిర్వహణపై తలెత్తిన వివాదాలకు ఇప్పట్లో పరిష్కారం దొరికేలా లేదు. టీమిండియాను పాకిస్థాన్‌కు పంపేందుకు బీసీసీఐ సిద్ధంగా లేదు. అందువల్ల ఈ టోర్నీని హైబ్రిడ్ మోడల్‌లో నిర్వహించాలన్నది బీసీసీఐ వాదన. అయితే ఇందుకు అంగీకరించని పాకిస్థాన్.. హైబ్రిడ్ మోడల్ కు మేం సిద్ధంగా లేమని మొదటి నుంచి చెబుతోంది. మరోసారి బహిరంగంగానే ఆ ప్రకటన చేసిన పీసీబీ చైర్మన్ మొహ్సిన్ నఖ్వీ.. హైబ్రిడ్ ఛాంపియన్స్ ట్రోఫీని నిర్వహించడానికి మేము సిద్ధంగా లేమని కరాఖండిగా చెప్పేశారు. లాహోర్‌లోని గడ్డాఫీ స్టేడియంలో జరుగుతున్న పునరుద్ధరణ పనులను పరిశీలించేందుకు పీసీబీ చైర్మన్ మొహ్సిన్ నఖ్వీ వచ్చారు. ఈ సందర్భంగా ఆయన స్థానిక మీడియాతో మాట్లాడుతూ.. ‘పాకిస్థాన్‌కు వెళ్లడంపై బీసీసీఐ వివరణ కోరుతూ ఐసీసీకి లేఖ రాశాం. ఇప్పుడు మేము ICC నుండి సమాధానం కోసం ఎదురు చూస్తున్నాము. ఐసీసీ నుంచి సమాధానం వచ్చిన తర్వాతే తదుపరి చర్యలు తీసుకుంటాం. హైబ్రిడ్ ఫార్మాట్‌లో టోర్నీని నిర్వహించేందుకు పాకిస్థాన్ సిద్ధంగా లేదు’ అని నొక్కి మరీ చెప్పాడు నఖ్వీ.
ఛాంపియన్స్ ట్రోఫీకి అర్హత సాధించిన ఇతర జట్లు పాకిస్థాన్‌కు రానున్నాయి. పాకిస్థాన్‌కు వచ్చేందుకు ఏ జట్టు ఆందోళన చెందడం లేదు. భారత్‌కు ఏదైనా సమస్య ఉంటే పరిష్కరిస్తాం. భారతదేశం పాకిస్థాన్‌ను ఎందుకు సందర్శించకూడదని నేను భావిస్తున్నాను. కాబట్టి ఛాంపియన్స్ ట్రోఫీ ఆడేందుకు అన్ని జట్లు పాకిస్థాన్‌కు రావాలని భావిస్తున్నారు.
ఛాంపియన్స్ ట్రోఫీ షెడ్యూల్‌ను త్వరలో ప్రకటిస్తామని నఖ్వీ ఆశాభావం వ్యక్తం చేశాడు. ఐసీసీ త్వరలో ఛాంపియన్స్ ట్రోఫీ షెడ్యూల్‌ను ప్రకటించనుంది, తద్వారా పాకిస్థాన్ సన్నాహాలు చేస్తుంది. క్రీడలు, రాజకీయాలు రెండూ భిన్నమైనవని, దేశం వాటిని కలిపి చూడకూడదని నేను భావిస్తున్నాను. ఐసిసి షెడ్యూల్‌ను ప్రకటించాల్సి ఉంది. తద్వారా మేము సన్నాహాలను పూర్తి చేయవచ్చు. టోర్నీలో పాల్గొనడానికి సంబంధించి బీసీసీఐకి ఏవైనా సందేహాలు ఉన్నా, మేము వాటిని లిఖితపూర్వకంగా అడిగాం. ఛాంపియన్స్ ట్రోఫీని హైబ్రిడ్ ఫార్మాట్‌లో నిర్వహిస్తారా అని అడిగిన ప్రశ్నకు సూటిగా సమాధానం చెప్పని నఖ్వీ.. టోర్నీ మొత్తం పాకిస్థాన్‌లోనే జరుగుతుందన్న నమ్మకం ఉంది. దేశం గౌరవం మొదటిది, భవిష్యత్తులో ఏమి జరుగుతుందో మీరే చూస్తారు. మా స్టాండ్ చాలా స్పష్టంగా ఉంది. మేము గతంలో కూడా స్పష్టం చేసామని చెప్పుకొచ్చారు నఖ్వీ.
మరిన్ని క్రీడా వార్తల కోసం ఇక్కడ క్లిక్ చేయండి..