IPL 2027: ఐపీఎల్ 2027లో ధోని ఆడతాడా? క్లారిటీ ఇచ్చిన చెన్నై సూపర్ కింగ్స్ తలైవా

IPL 2027: ఐపీఎల్‌లో మహేంద్ర సింగ్ ధోనీ భవిష్యత్తుపై నెలకొన్న ఉత్కంఠ ఇంకా కొనసాగుతోంది. 2027 సీజన్‌లో చెన్నై సూపర్ కింగ్స్ తరఫున మాహీ మైదానంలోకి దిగుతారా? లేక ఐపీఎల్‌కు వీడ్కోలు పలుకుతారా? అనే ప్రశ్నలకు ఆయన తాజాగా స్పందించారు. వచ్చే సీజన్‌లో ఆడాలా వద్దా అనే విషయంపై డిసెంబర్‌లోపు నిర్ణయం తీసుకుంటానని ధోనీ స్పష్టం చేశారు. అయితే ఆయన మాటల్లో ఎక్కడా రిటైర్మెంట్ ప్రకటించిన సంకేతాలు లేవు. మరో సీజన్ ఆడే అవకాశం ఉందన్న ఆశను మాత్రం సజీవంగా ఉంచారు.

ఫిట్‌నెస్ పరీక్షల తర్వాతే తుది నిర్ణయం

బెంగళూరులో జరిగిన ఓ హెల్త్‌కేర్ కార్యక్రమానికి హాజరైన ధోనీని ఐపీఎల్‌లో తన భవిష్యత్తు గురించి ప్రశ్నించారు. దీనికి ఆయన తనదైన శైలిలో సమాధానం ఇచ్చారు. ముందుగా వైద్య పరీక్షలు చేయించుకోవాలని, వాటి నివేదికలు వచ్చిన తర్వాత తన శారీరక సామర్థ్యాన్ని అంచనా వేసుకుని నిర్ణయం తీసుకుంటానని చెప్పారు. డిసెంబర్‌లోపు మరో సీజన్ ఆడగలిగే స్థితిలో ఉన్నానా లేదా అనేది తేల్చుకుంటానని వెల్లడించారు. దీంతో ధోనీ 2027 సీజన్‌లో ఆడటం పూర్తిగా ఆయన ఫిట్‌నెస్‌పైనే ఆధారపడి ఉందని స్పష్టమైంది.

పాత బండి అంటూ ధోనీ సరదా వ్యాఖ్యలు

తన ఫిట్‌నెస్ గురించి మాట్లాడిన ధోనీ డాక్టర్లపై సరదాగా బాధ్యత పెట్టారు. తనలాంటి పాత వాహనం రోడ్డుపై సాఫీగా నడవాలంటే డాక్టర్లు అన్నీ సరిగ్గా చూసుకోవాలని చమత్కరించారు. వైద్య పరీక్షలు నిర్వహించి, అవసరమైన నివేదిక ఇవ్వాల్సింది వారేనని పేర్కొన్నారు. ధోనీ చేసిన ఈ వ్యాఖ్యలు అభిమానులను ఆకట్టుకున్నాయి. అయితే ఈ సరదా మాటలను ఆయన ఆడటం ఖాయమని ఇచ్చిన హామీగా భావించకూడదు. వైద్య పరీక్షల ఫలితాలు, తన శారీరక పరిస్థితిని బట్టి మాత్రమే తుది నిర్ణయం తీసుకోనున్నారు.

#WATCH | Bengaluru, Karnataka | On his IPL future, Former Indian Cricket Team Captain Mahendra Singh Dhoni says, “I’ll have to go through the tests. You’ll have to give me the report, and before December, I’ll need to assess how strong I am and whether I can play one more season. If I’m not fit enough, then you’ll have to make sure you do everything right to get this old vintage vehicle running smoothly on the road…”

(24.10)

— ANI (@ANI) October 24, 2026

గత సీజన్‌లో ఒక్క మ్యాచ్ కూడా ఆడని మాహీ

పిక్క కండరాల సమస్యతో ధోనీ 2026 ఐపీఎల్ సీజన్ మొత్తానికి దూరమయ్యారు. ఆయన మైదానంలో కనిపించకపోవడంతో చెన్నై అభిమానుల్లో నిరాశ నెలకొంది. అదే సమయంలో ఆయన ఐపీఎల్ కెరీర్‌కు ముగింపు పలకబోతున్నారనే ప్రచారం కూడా మొదలైంది. ధోనీ ఐపీఎల్ చరిత్రలో అత్యంత విజయవంతమైన కెప్టెన్లలో ఒకరు. ఆయన నాయకత్వంలో చెన్నై సూపర్ కింగ్స్ ఐదు ఐపీఎల్ టైటిళ్లు గెలిచింది. 2023లో చివరిసారిగా ధోనీ కెప్టెన్సీలో సీఎస్కే ఛాంపియన్‌గా నిలిచింది. ప్రస్తుతం రుతురాజ్ గైక్వాడ్ జట్టుకు నాయకత్వం వహిస్తున్నారు.

ధోనీ నిర్ణయం కోసం ఎదురుచూస్తున్న సీఎస్కే

ఐపీఎల్ 2027కు ముందు చెన్నై సూపర్ కింగ్స్ జట్టు కూర్పు, వ్యూహాల విషయంలో ధోనీ భవిష్యత్తు కీలకంగా మారనుంది. జట్టు ప్రధాన కోచ్‌గా జహీర్ ఖాన్‌ను నియమించిన నేపథ్యంలో కొత్త సీజన్‌పై అంచనాలు పెరిగాయి. ధోనీ ఆడతారా లేదా అన్నది తేలితేనే జట్టు యాజమాన్యానికి తదుపరి ప్రణాళికలు రూపొందించడం సులభమవుతుంది. సీఎస్కే సీఈవో కాశీ విశ్వనాథన్ గతంలోనూ ధోనీ భవిష్యత్తుపై తుది నిర్ణయం ఆయనదేనని చెప్పారు. ప్రస్తుతం అందరి దృష్టి మాహీ ఫిట్‌నెస్ పరీక్షలపైనే ఉంది. డిసెంబర్‌లోపు ఆయన ఏ నిర్ణయం తీసుకుంటారో చూడాలి.