Noor Ahmad : నూర్ అహ్మద్ స్పిన్ మాయాజాలం.. 7 బంతుల్లో 3 వికెట్లు.. చెపాక్లో కేకేఆర్ కకావికలం
IPL 2026 Noor Ahmad : ఐపీఎల్ 2026లో నూర్ అహ్మద్ సంచలనం సృష్టించాడు. కేకేఆర్ పై 7 బంతుల్లో 3 వికెట్లు తీసి మ్యాచ్ను సీఎస్కే వైపు తిప్పాడు. ఈ మ్యాచుతో 50 వికెట్ల మైలురాయిని చేరుకుని సరికొత్త రికార్డు సృష్టించాడు.
Noor Ahmad : ఐపీఎల్ 2026 సీజన్లో భాగంగా చెన్నైలోని చెపాక్ స్టేడియం వేదికగా జరిగిన మ్యాచ్లో అఫ్గానిస్థాన్ స్పిన్ సెన్సేషన్ నూర్ అహ్మద్ (Noor Ahmad) శివతాండవం చేశాడు. చెన్నై సూపర్ కింగ్స్ (CSK) తరఫున ఆడుతున్న ఈ యువ స్పిన్నర్, కోల్కతా నైట్ రైడర్స్ (KKR) బ్యాటర్లను తన గింగిరాలు తిరిగే బంతులతో ఉక్కిరిబిక్కిరి చేశాడు. కేవలం 7 బంతుల వ్యవధిలో 3 కీలక వికెట్లు పడగొట్టి మ్యాచ్ స్వరూపాన్ని పూర్తిగా మార్చేశాడు. నూర్ ధాటికి కేకేఆర్ టాప్ ఆర్డర్ కుప్పకూలిపోయింది.
కోల్కతా నైట్ రైడర్స్ ఇన్నింగ్స్ 11వ ఓవర్ వరకు సాఫీగానే సాగింది. కానీ నూర్ అహ్మద్ బంతిని చేతబట్టాక సీన్ మొత్తం మారిపోయింది. మొదట కేకేఆర్ కెప్టెన్ అజింక్యా రహానేను తన ఫ్లైట్ బంతితో ఊరించాడు. భారీ షాట్కు ప్రయత్నించిన రహానే, రుతురాజ్ గైక్వాడ్కు క్యాచ్ ఇచ్చి వెనుదిరిగాడు. ఆ మరుసటి బంతికే డేంజరస్ బ్యాటర్ కామెరాన్ గ్రీన్ క్లీన్ బౌల్డ్ అయ్యాడు. ఇక 13వ ఓవర్లో సిక్సర్ల కింగ్ రింకూ సింగ్ కూడా నూర్ చేతికి దొరికిపోయాడు. ఇలా కేవలం 7 బంతుల్లోనే ముగ్గురు కీలక ఆటగాళ్లను పెవిలియన్ పంపి మ్యాచ్ను సీఎస్కే వైపు తిప్పాడు.
నూర్ అహ్మద్ నయా రికార్డ్
ఈ మ్యాచ్లో 3 వికెట్లు పడగొట్టడం ద్వారా నూర్ అహ్మద్ ఐపీఎల్లో ఒక అరుదైన మైలురాయిని చేరుకున్నాడు. లీగ్లో 50 వికెట్ల మార్కును అతను అందుకున్నాడు. ఐపీఎల్ చరిత్రలో అతి తక్కువ మ్యాచ్ల్లో (42 మ్యాచ్లు) 50 వికెట్లు తీసిన లెఫ్ట్ ఆర్మ్ స్పిన్నర్గా నూర్ అహ్మద్ రికార్డు సృష్టించాడు. ఓవరాల్గా సునీల్ నరైన్ (32 మ్యాచ్లు), అమిత్ మిశ్రా (37 మ్యాచ్లు) అగ్రస్థానంలో ఉన్నప్పటికీ, లెఫ్ట్ ఆర్మ్ విభాగంలో నూర్ ఇప్పుడు అగ్రస్థానానికి చేరుకున్నాడు.
Come for the wickets, stay for the celebration 😉
🎥 Noor Ahmad is 𝙏𝙪𝙧𝙣𝙞𝙣𝙜 𝙩𝙝𝙚 𝙂𝙖𝙢𝙚 for the Super Kings 💛
Updates ▶️ https://t.co/jWkXVCPxj5#TATAIPL | #KhelBindaas | #CSKvKKR | @ChennaiIPL | @noor_ahmad_15 pic.twitter.com/IJa0OhBJWP
— IndianPremierLeague (@IPL) April 14, 2026
చెపాక్ పిచ్పై స్పిన్ మంత్రం
చెన్నైలోని చెపాక్ పిచ్ ఎప్పుడూ స్పిన్నర్లకు స్వర్గధామం. దీనిని నూర్ అహ్మద్ అద్భుతంగా వాడుకున్నాడు. కేవలం వికెట్లు తీయడమే కాకుండా, పరుగులను కూడా నియంత్రించి కేకేఆర్ బ్యాటర్లను ఉక్కిరిబిక్కిరి చేశాడు. తన 4 ఓవర్ల కోటాలో కేవలం 21 పరుగులు మాత్రమే ఇచ్చి 3 వికెట్లు తీసి అత్యంత పొదుపుగా బౌలింగ్ చేశాడు. ఐపీఎల్ 2026 ప్రారంభంలో వికెట్ల కోసం తడబడిన నూర్, ఈ మ్యాచ్తో మళ్ళీ ఫామ్లోకి రావడం చెన్నై అభిమానులకు పెద్ద ఊరటనిచ్చింది.
మరిన్ని క్రీడా వార్తల కోసం ఇక్కడ క్లిక్ చేయండి..