India vs Japan: భారత్-జపాన్ మ్యాచ్‌లో వైడ్ వివాదం.. అసలు నిజం బయటపెట్టిన ఆకాష్ చోప్రా

India vs Japan: క్రికెట్ చరిత్రలో సెప్టెంబర్ 22న సరికొత్త అధ్యాయం మొదలైంది. భారత్, జపాన్ దేశాల మధ్య తొలిసారిగా ఒక టీ20 మ్యాచ్‌ జరిగింది. కేవలం 5 ఓవర్ల పాటు జరిగిన ఈ ఉత్కంఠభరితమైన పోరులో టీమిండియా కేవలం 2 పరుగుల తేడాతో అతికష్టం మీద విజయం సాధించింది. అయితే ఈ మ్యాచ్‌లో చివరి ఓవర్‌లో జరిగిన ఒక సంఘటన ప్రపంచవ్యాప్తంగా పెద్ద దుమారమే రేపింది. అంపైర్ ఇచ్చిన నిర్ణయంపై భారత ఆటగాళ్లు నిరసన తెలపడం, ఆ తర్వాత అంపైర్ తన నిర్ణయాన్ని మార్చుకోవడం కలకలం రేపింది. దీంతో సోషల్ మీడియాలో కొందరు భారత జట్టుపై చీటింగ్ చేస్తున్నారంటూ తీవ్రమైన ఆరోపణలు చేశారు.

అసలు చివరి ఓవర్‌లో ఏం జరిగింది?

మ్యాచ్ చివరి ఓవర్‌లో జపాన్ విజయానికి కేవలం 8 పరుగులు మాత్రమే అవసరమయ్యాయి. ఆ సమయంలో అక్షర్ పటేల్ బౌలింగ్ వేస్తున్నాడు. జపాన్ బ్యాటర్ అలెగ్జాండర్ షిరాయ్ పాట్‌మోర్ రివర్స్ స్వీప్ షాట్ ఆడడానికి ప్రయత్నించగా, బంతి చాలా ఎక్కువ టర్న్ అయి లెగ్ సైడ్ వెళ్ళింది. దీంతో ఫీల్డ్ అంపైర్ దానిని వైడ్‌గా ప్రకటించాడు. అయితే భారత కెప్టెన్, ఇతర ఆటగాళ్లు దీనిని తీవ్రంగా వ్యతిరేకించారు. ఆటగాళ్ల ఒత్తిడితో అంపైర్లు తమ నిర్ణయాన్ని మార్చుకుని, ఆ బంతిని వైడ్ కాకుండా లీగల్ డెలివరీగా ప్రకటించారు. ఈ నిర్ణయమే వివాదానికి ప్రధాన కారణమైంది.

ఐసీసీ కొత్త నిబంధనలు ఏం చెబుతున్నాయి?

ఈ వివాదంపై చాలా మందికి సరైన అవగాహన లేకపోవడంతో సోషల్ మీడియాలో తప్పుడు ప్రచారం జరిగిందని చెప్పవచ్చు. ఐసీసీ నిబంధనల ప్రకారం.. బ్యాటర్ రివర్స్ స్వీప్ లేదా స్విచ్ హిట్ ఆడినప్పుడు ఆఫ్-సైడ్ వైడ్ రూల్స్ మారుతుంటాయి. ఒకవేళ లెఫ్ట్ హ్యాండ్ బ్యాటర్ రివర్స్ స్వీప్ ఆడితే, అతనికి సంబంధించిన ఆఫ్-సైడ్ దిశ మారుతుంది. ఈ కారణంగానే అక్షర్ పటేల్ వేసిన ఆ బంతిని లీగల్ బాల్‌గా పరిగణించడం జరిగింది. చాలా మందికి ఈ రూల్స్ సరిగ్గా తెలియక భారత జట్టుపై అనవసర విమర్శలు గుప్పించారు.

ఆకాష్ చోప్రా వివరణతో క్లారిటీ

ఈ వివాదంపై ప్రముఖ క్రికెట్ విశ్లేషకుడు, మాజీ క్రికెటర్ ఆకాష్ చోప్రా తన యూట్యూబ్ ఛానెల్ ద్వారా క్లారిటీ ఇచ్చారు. ఈ సంఘటన జరిగినప్పుడు తనకూ కొంత గందరగోళం ఉండేదని, రివర్స్ స్వీప్ ఆడినప్పుడు నిబంధనలు వేరుగా ఉంటాయని తాను కూడా పొరపడ్డానని ఆయన అంగీకరించారు. అయితే ఐసీసీ కొత్త నిబంధనలను క్షుణ్ణంగా చదివాక తనకు అసలు విషయం అర్థమైందని తెలిపారు. బౌలర్ బంతిని విసిరే సమయంలో బ్యాటర్ తన దిశ మార్చుకున్నాడా లేదా అనేది ఇప్పుడు ముఖ్యం కాదని, మ్యాచ్ సమయంలో ఏ క్షణంలోనైనా బ్యాటర్ తన దిశను మారిస్తే అంపైర్లు దానికి తగినట్లుగా రివర్స్ స్వీప్, స్విచ్ హిట్‌లను ఒకే కోణంలో చూస్తారని ఆకాష్ చోప్రా వివరించారు.

మరిన్ని క్రికెట్ వార్తల కోసం ఇక్కడ క్లిక్ చేయండి..