W,W,W,W,W.. క్రికెట్ చరిత్రలో కనీవినీ ఎరుగని విధ్వంసం.. ఒకే ఓవర్లో 5 వికెట్లతో ప్రపంచ రికార్డు..!
Historical Feat in T20I Cricket: ప్రస్తుతం క్రికెట్ ప్రపంచం మొత్తం ఈ ఇండోనేషియా పేసర్ గెడె ప్రియందన (Gede Priandana) వైపు ఆశ్చర్యంగా చూస్తోంది. అతి తక్కువ కాలంలోనే అసోసియేట్ దేశాల నుంచి ఇలాంటి ప్రతిభావంతులు రావడం క్రికెట్ అభివృద్ధికి శుభసూచకమని విశ్లేషకులు భావిస్తున్నారు.
5 Wickets in One Over: అంతర్జాతీయ క్రికెట్లో సరికొత్త చరిత్ర నమోదైంది. టీ20 అంతర్జాతీయ క్రికెట్ (T20I) చరిత్రలో ఇప్పటివరకు ఎవరికీ సాధ్యం కాని అద్భుతమైన ఫీట్ను ఇండోనేషియా బౌలర్ గెడె ప్రియందన (Gede Priandana) సాధించాడు. ఒకే ఓవర్లో ఏకంగా 5 వికెట్లు పడగొట్టి ప్రపంచ రికార్డును తిరగరాశాడు.
రికార్డుల వేటలో గెడె ప్రియందన..
బాలి వేదికగా కాంబోడియాతో జరిగిన మ్యాచ్లో 28 ఏళ్ల ఈ రైట్ ఆర్మ్ పేసర్ ఈ అద్భుత ప్రదర్శన చేశాడు. గతంలో లసిత్ మలింగ, రషీద్ ఖాన్, జేసన్ హోల్డర్ వంటి దిగ్గజ బౌలర్లు ఒకే ఓవర్లో 4 వికెట్లు తీసిన రికార్డులు ఉన్నాయి. కానీ, పురుషుల లేదా మహిళల అంతర్జాతీయ క్రికెట్లో ఒకే ఓవర్లో 5 వికెట్లు తీసిన మొట్టమొదటి బౌలర్గా ప్రియందన చరిత్ర సృష్టించాడు.
మ్యాచ్ సాగిందిలా..
168 పరుగుల లక్ష్యంతో బరిలోకి దిగిన కాంబోడియా జట్టు 106/5 స్కోరు వద్ద ఉండగా, ఇన్నింగ్స్ 16వ ఓవర్ను ప్రియందన వేశాడు.
మొదటి 3 బంతులు: వరుసగా మూడు వికెట్లు తీసి హ్యాట్రిక్ నమోదు చేశాడు. షా అబ్రార్ హుస్సేన్, నిర్మల్జిత్ సింగ్, చాంథూన్ రతనక్లను అవుట్ చేశాడు.
4వ బంతి: డాట్ బాల్.
చివరి 2 బంతులు: మోంగ్దారా సోక్, పెల్ వెన్నాక్లను అవుట్ చేసి కాంబోడియా ఇన్నింగ్స్కు తెరదించాడు.
ఈ ఓవర్లో అతను కేవలం ఒక వైడ్ రూపంలో ఒక్క పరుగు మాత్రమే ఇచ్చాడు. ఫలితంగా ఇండోనేషియా 60 పరుగుల తేడాతో ఘన విజయం సాధించింది.
దేశవాళీ క్రికెట్లో గత రికార్డులు..
అంతర్జాతీయ స్థాయిలో ఇదే తొలిసారి అయినప్పటికీ, గతంలో దేశవాళీ టీ20ల్లో ఇద్దరు బౌలర్లు ఈ ఫీట్ సాధించారు.
బంగ్లాదేశ్కు చెందిన అల్-అమీన్ హొస్సేన్ (2013).
భారత మాజీ క్రికెటర్ అభిమన్యు మిథున్ (2019-20 సయ్యద్ ముస్తాక్ అలీ ట్రోఫీలో కర్ణాటక తరపున).
బ్యాటింగ్లోనూ మెరుపులు..
ఈ మ్యాచ్లో తొలుత బ్యాటింగ్ చేసిన ఇండోనేషియా జట్టులో వికెట్ కీపర్ బ్యాటర్ ధర్మ కేసుమ 68 బంతుల్లో 110 పరుగులతో అజేయ సెంచరీ సాధించి జట్టు భారీ స్కోరు సాధించడంలో కీలక పాత్ర పోషించాడు. బౌలింగ్లో వీరవిహారం చేసిన ప్రియందన, అంతకుముందు ఓపెనర్గా వచ్చి 6 పరుగులు చేశాడు.
ప్రస్తుతం క్రికెట్ ప్రపంచం మొత్తం ఈ ఇండోనేషియా పేసర్ వైపు ఆశ్చర్యంగా చూస్తోంది. అతి తక్కువ కాలంలోనే అసోసియేట్ దేశాల నుంచి ఇలాంటి ప్రతిభావంతులు రావడం క్రికెట్ అభివృద్ధికి శుభసూచకమని విశ్లేషకులు భావిస్తున్నారు.
మరిన్ని క్రీడా వార్తల కోసం ఇక్కడ క్లిక్ చేయండి..