Champions Trophy: మొన్న ప్రిన్స్ ని స్లెడ్జింగ్.. కట్ చేస్తే.. ఇవాళ కోహ్లీ భక్తుడిగా కొత్త అవతారం ఎత్తిన పాక్ స్పిన్నర్!
పాకిస్తాన్ స్పిన్నర్ అబ్రార్ అహ్మద్, శుభ్మాన్ గిల్ను ఎగతాళి చేసినందుకు విమర్శలు ఎదుర్కొన్నాడు. కానీ అదే సమయంలో, విరాట్ కోహ్లీని తన చిన్ననాటి హీరోగా ప్రశంసిస్తూ అతనికి అద్భుతమైన నివాళి అర్పించాడు. కోహ్లీ తన 300వ వన్డేలో అరుదైన రికార్డు సాధించగా, ఛాంపియన్స్ ట్రోఫీలో 51వ వన్డే సెంచరీతో భారత్ విజయాన్ని సాధించింది. అబ్రార్ తన పోస్ట్లో కోహ్లీ వినయాన్ని, ఆటలో అతని గొప్పతనాన్ని ప్రేరణగా అభివర్ణించాడు.
పాకిస్తాన్ స్పిన్నర్ అబ్రార్ అహ్మద్, ఇటీవల భారత యువ బ్యాటర్ శుభ్మాన్ గిల్ను ఎగతాళి చేసినందుకు విమర్శల పాలయ్యాడు. ఛాంపియన్స్ ట్రోఫీలో భారత్-న్యూజిలాండ్ మధ్య జరిగిన మ్యాచ్లో గిల్కు వీడ్కోలు పలికిన అబ్రార్పై నెటిజన్లు మండిపడ్డారు. అయితే, ఈ విమర్శల నడుమ అతను భారత క్రికెట్ దిగ్గజం విరాట్ కోహ్లీకి అద్భుతమైన నివాళి అర్పించాడు. కోహ్లీ తన 300వ వన్డేలో ఆడుతున్న సందర్భంగా, అబ్రార్ అతన్ని తన చిన్ననాటి హీరోగా పేర్కొంటూ ఒక ప్రత్యేకమైన పోస్ట్ను షేర్ చేశాడు. “నా చిన్ననాటి హీరో విరాట్ కోహ్లీకి బౌలింగ్ చేయడం నా అదృష్టం. అతని ప్రశంసలకు కృతజ్ఞతలు. ఒక క్రికెటర్గా అతని గొప్పతనం మాత్రమే కాక, ఒక వ్యక్తిగా అతని వినయం కూడా నిజమైన ప్రేరణ!” అని అబ్రార్ తన పోస్ట్లో రాశాడు.
ఇక ఛాంపియన్స్ ట్రోఫీలో ఇండియా-పాకిస్తాన్ మ్యాచ్ హైవోల్టేజ్ ఎన్కౌంటర్గా మారింది. రోహిత్ శర్మ నేతృత్వంలోని భారత జట్టు విజయం సాధించగా, కోహ్లీ తన 51వ వన్డే సెంచరీతో మరోసారి తన సత్తా చాటాడు. పాకిస్తాన్ బౌలర్ అబ్రార్ అహ్మద్ 1/28 గణాంకాలతో ఓ మాదిరిగా ప్రదర్శన ఇచ్చాడు. ఇక దుబాయ్లో న్యూజిలాండ్తో జరిగిన చివరి గ్రూప్ దశ మ్యాచ్లో, ప్లేయింగ్ ఎలెవన్లో స్థానం దక్కించుకున్న కోహ్లీ మరో అరుదైన మైలురాయిని అందుకున్నాడు. 300 వన్డేలు ఆడిన ఏడో భారత ఆటగాడిగా అతను నిలిచాడు.
ఛాంపియన్స్ ట్రోఫీ ప్రారంభానికి ముందు విరాట్ కోహ్లీ ఫామ్ గురించి అనేక అనుమానాలు వ్యక్తమయ్యాయి. ఆస్ట్రేలియాలో టెస్ట్ సిరీస్లో పేలవమైన ప్రదర్శన తర్వాత, ఇంగ్లాండ్తో జరిగిన వన్డే సిరీస్లో అతను మెరుగైన బ్యాటింగ్ చేసినా, విమర్శకులను పూర్తిగా ఖండించలేకపోయాడు. బంగ్లాదేశ్తో తొలి మ్యాచ్లో 22(38) పరుగులకే ఔటైన కోహ్లీ, పాకిస్తాన్తో జరిగిన మ్యాచ్లో తన క్లాసిక్ ఇన్నింగ్స్తో తిరిగి ఫామ్లోకి వచ్చాడు.
ఈ మ్యాచ్ మెల్బోర్న్లో 2022 టీ20 వరల్డ్ కప్లో భారత్-పాకిస్తాన్ పోరును గుర్తు చేసింది. అప్పటిలాగే ఈసారి కూడా విరాట్ ఒత్తిడిని తట్టుకొని, మెరుపు ఇన్నింగ్స్తో జట్టును గెలిపించాడు. తన 51వ వన్డే సెంచరీని పూర్తి చేసిన కోహ్లీ, 14,000 వన్డే పరుగులు చేసే అత్యంత వేగమైన ఆటగాడిగా రికార్డు నెలకొల్పాడు. ఇప్పటివరకు 299 వన్డేల్లో 58.20 సగటుతో, 93.41 స్ట్రైక్ రేట్తో 14,085 పరుగులు చేసిన కోహ్లీ, 51 సెంచరీలు, 73 అర్ధ సెంచరీలతో తన కెరీర్ను మరింత ఘనతగా నిలిపాడు.
మరిన్ని క్రీడా వార్తల కోసం ఇక్కడ క్లిక్ చేయండి.