Jasprit Bumrah: స్క్వాడ్ లో ఉంటాడు కానీ ఆడటం డౌటేనా? స్టార్ పేసర్ పై అగార్కర్ క్లారిటీ!
చాంపియన్స్ ట్రోఫీ 2025 కోసం జస్ప్రీత్ బుమ్రా ఎంపిక అయినప్పటికీ, అతని ఫిట్నెస్ అనిశ్చితి కొనసాగుతోంది. వెన్నునొప్పి కారణంగా ఐదు వారాల విశ్రాంతి అవసరం అని వైద్య బృందం పేర్కొంది. ఫిబ్రవరి 11 నాటికి తుది జట్టును ప్రకటించాల్సి ఉండగా, బుమ్రా స్థితి కీలకం కానుంది. బుమ్రా లేనిపక్షంలో, హర్షిత్ రాణా ప్రత్యామ్నాయంగా ఎంపికయ్యాడు.
భారత క్రికెట్ జట్టు స్టార్ ఫాస్ట్ బౌలర్ జస్ప్రీత్ బుమ్రాను చాంపియన్స్ ట్రోఫీ 2025 కోసం 15 మంది సభ్యుల జట్టులో ఎంపిక చేసినప్పటికీ, అతని లభ్యత పూర్తిగా ఫిట్నెస్ స్థాయిపై ఆధారపడి ఉంటుంది అని చీఫ్ సెలెక్టర్ అజిత్ అగార్కర్ అన్నారు. ఇటీవలే ఆస్ట్రేలియాతో సిడ్నీలో జరిగిన చివరి టెస్టు మ్యాచ్లో, వెన్ను నొప్పి కారణంగా బుమ్రా ఐదో రోజు బౌలింగ్ చేయలేకపోయాడు.
బుమ్రా ఫిట్నెస్పై చీఫ్ సెలెక్టర్ అజిత్ అగార్కర్ ప్రకటన
చీఫ్ సెలెక్టర్ అజిత్ అగార్కర్ ఒక విలేకరుల సమావేశంలో మాట్లాడుతూ, “బుమ్రా ఐదు వారాల పాటు విశ్రాంతి తీసుకోవాలని వైద్య బృందం సూచించింది. అతను ఇంగ్లాండ్తో జరిగే మొదటి రెండు వన్డేలకు అందుబాటులో ఉండడు. ఫిబ్రవరి ప్రారంభంలో అతని ఫిట్నెస్ స్థితి తెలియజేస్తామని బీసీసీఐకి స్పష్టం చేస్తాం” అని చెప్పారు.
బుమ్రా ఫిట్నెస్పై ఇంకా అనిశ్చితి కొనసాగుతుండగా, చాంపియన్స్ ట్రోఫీ కోసం తుది జట్టును ఫిబ్రవరి 11 నాటికి ICCకి సమర్పించాల్సి ఉంటుంది. రోహిత్ శర్మ మాట్లాడుతూ, “మేము బుమ్రా స్థితి ఖచ్చితంగా తెలియజేసే వరకు, అవసరమైన మార్పులు చేస్తాము” అని చెప్పారు.
భారత జట్టు స్ట్రాటజీకి బుమ్రా కీలకంగా ఉండటంతో, అతని ఆరోగ్య పరిస్థితి టోర్నమెంట్ విజయానికి ప్రధాన పాత్ర పోషించనుంది.
ఛాంపియన్స్ ట్రోఫీ ముందు సన్నాహాలు
ఇంగ్లాండ్తో మూడు వన్డే మ్యాచ్ల సిరీస్లో, బుమ్రా స్థానంలో హర్షిత్ రాణాను ఎంపిక చేశారు. మూడు మ్యాచ్లు ఫిబ్రవరి 6, 9, 12 తేదీల్లో నాగ్పూర్, కటక్, అహ్మదాబాద్లలో జరుగనున్నాయి.
గ్రూప్-Aలో భారత జట్టు
భారతదేశం గ్రూప్-Aలో ఉంది. పాకిస్తాన్కు వెళ్లడానికి ప్రభుత్వం అనుమతి ఇవ్వనందున, వారి మ్యాచ్లు దుబాయ్లో జరుగుతాయి. భారత్ ఫిబ్రవరి 20న బంగ్లాదేశ్తో తమ ఛాంపియన్స్ ట్రోఫీని ప్రారంభించనుంది. ఆ తర్వాత ఫిబ్రవరి 23న పాకిస్థాన్తో, మార్చి 2న న్యూజిలాండ్తో తలపడనుంది.
తుది జట్టు వివరాలు..చాంపియన్స్ ట్రోఫీకి భారత జట్టు:
రోహిత్ శర్మ (కెప్టెన్), శుభ్మన్ గిల్ (వైస్ కెప్టెన్), విరాట్ కోహ్లీ, శ్రేయాస్ అయ్యర్, కేఎల్ రాహుల్, హార్దిక్ పాండ్యా, అక్షర్ పటేల్, వాషింగ్టన్ సుందర్, కుల్దీప్ యాదవ్, జస్ప్రీత్ బుమ్రా, మహ్మద్ షమీ, అర్ష్దీప్ సింగ్, రవీంద్ర జడేజా, యశస్వి జైస్వాల్, రిషబ్ పంత్.
మరిన్ని క్రీడా వార్తల కోసం ఇక్కడ క్లిక్ చేయండి..