అయ్యో.. కన్నీరు పెట్టిస్తున్న టమాటా.. కిలో ధర ఇంత తక్కువనా?
టమోటా ధర రైతుల కంట కన్నీరు పెట్టిస్తుంది. కష్టపడి పండించిన పంటకు గిట్టుబాటు ధర లేకపోవడంతో రైతులు ఆవేదన వ్యక్తం చేస్తున్నారు. కష్టమంతా వృధా అయ్యిందంటూ, బాధపడుతున్నారు. ప్రస్తుతం చాలా చోట్ల కిలో టమాటా ధర రూ.5 ఉంది. ఒక్క టమాటా బాక్స్ ధర 40 రూపాయలకు కొనుగోలు చేస్తున్నారు. దీంతో చేసేదేమి లేక రైతులు టమాటాలను పశువులకు మేతగా వేస్తున్నారు.
ఆరు గాలం కష్టపడి పండించిన టమోటా పంట చేతికొచ్చింది. కానీ గిట్టుబాటు ధర లేకపోవడంతో వాటిని మార్కెట్లకు తీసుకెళ్లడం కూడా దండగే అనుకున్నారు. ఇంకేముంది పండించిన చేనులోనే పంటను, వదిలేస్తూ, టమోటాలను రోడ్డు పై వేస్తూ పశువులకు మేతగా వేసిన ఘటన కర్నూలు జిల్లాలో చోటు చేసుకుంది.
కర్నూలు జిల్లా గోనెగొండ్లకు చెందిన మున్సిస్వామి అనే రైతు తన ఎకరా పొలంలో ఎన్నో ఆశలు పెట్టుకొని టమోటా వేసి పంటను సాగుచేసాడు. పంట బాగా పండింది, టమోటాను మార్కెట్ కు వెళ్లి అమ్ముకుంటాం అనే లోపే టమోటా ధర పతనమైంది.
ఒక రోజు పంటను కూలీలను పెట్టి కొస్తే సుమారు మూడు వందల బాక్స్ లు టమోటాలు వస్తాయి. వాటిని అమ్ముకునేందుకు మార్కెట్ కు వెళ్ళాలి అంటే ఒక బాక్స్ రూ.50 రవాణా ఖర్చు అవుతుండగా, మార్కెట్ లో అదే టమోటా బాక్స్ రూ. 40 కొంటూ ఉంటే తాము ఎలా అమ్ముకోవాలి అని రైతులు ఆవేదన వ్యక్తం చేస్తున్నారు.
అటు రవాణా ఖర్చు, ఇటు పెట్టుబడులు రాక, చేతికి వచ్చిన టమోటా పంటను పొలంలోనే పారబోసి, మూగ జీవాలకు దానగా వేస్తున్నారు. ఎకరాకు సుమారు రూ.80 వేలు ఖర్చు చేస్తే, కనీసం పెట్టుబడులు కూడా రావడం లేదని రైతులు ఆందోళన చెందుతున్నారు.
టమాటా కేజీకి ఒక్క రూపాయి కూడా రైతులకు రావడం లేదని ఆవేదన వ్యక్తం చేస్తున్నారు. పండిన పంటను కనీసం కొనేవారే కరువయ్యారని వాపోతున్నారు. పెట్టుబడి కోసం చేసిన అప్పులు ఎలా తీర్చుకోవాలో తెలియడం లేదని రైతులు కన్నీటి పర్యంతమవుతున్నారు. ఇప్పటికైనా ప్రభుత్వం స్పందించి టమోటా కు గిట్టుబాటు ధర కల్పించాలని రైతులు కోరుతున్నారు.