Google Guidelines: గూగుల్ కీలక నిర్ణయం.. ఫేక్ యాప్స్‌కు చెక్ పెడుతూ కొత్త గైడ్ లైన్స్ రూపకల్పన..
Google Guidelines: ఫేక్ యాప్స్‌తో యూజర్లకు చిక్కులు.. చెక్ పెడుతూ కీలక నిర్ణయం తీసుకున్న గూగుల్..
కాలం మారుతోంది.. ప్రపంచమూ మారుతోంది.. దాంతోపాటే సాంకేతిక పరిజ్ఞానమూ దినిదినాభివృద్ధి చెందుతోంది. ప్రతీ ఒక్కరూ స్మార్ట్ ఫోన్‌ను ఉపయోగిస్తున్నారు. ఫలితంగా ప్రజల అవసరాలకు అనుగుణంగా పుట్టగొడుగుల్లా కొత్త కొత్త యాప్స్ పుట్టుకొస్తున్నాయి.
అయితే, ప్రజల అవసరాలను తమకు అనుగుణంగా మార్చుకుంటున్నారు కొందరు సైబర్ కేటుగాళ్లు. తమ స్వార్థం కోసం ఫేక్ యాప్స్‌ను సృష్టించి.. ఒరిజిన్ యాప్స్‌కు పోటీగా మార్కెట్‌లోకి విడుదల చేస్తున్నారు. దాంతో ఒరిజినల్ ఏదో.. డూప్లికేట్ ఏదో తేల్చుకోలేక ప్రజలు ఇబ్బందులు ఎదుర్కొంటున్నారు. కొందరైతే ఈ ఫేక్ యాప్స్ ద్వారా తీవ్రంగా నష్టపోతున్నారు.
అయితే, ప్రజల ఇబ్బందులను పరిగణనలోకి తీసుకున్న గూగుల్.. ఫేక్ యాప్స్ చెక్ పెడుతూ కీలక నిర్ణయం తీసుకుంది.
హ్యాకర్లు సృష్టిస్తున్న నకిలీ యాప్స్, స్పామ్ యాప్స్‌కు చెక్ పెడుతూ నయా గైడ్ లైన్స్ రూపొందించింది. ఈ గైడ్ లైన్స్‌ను 2021 చివరి నాటికి అమల్లోకి తీసుకురానున్నట్లు తెలుస్తోంది. ఇదే విషయాన్ని గూగుల్ సంస్థ వెల్లడించింది కూడా.
కొత్త గైడ్‌లైన్స్ ప్రకారం.. యాప్ టైటిల్ 30 క్యారెక్టర్లకు తగ్గించనున్నట్లు తెలుస్తోంది. అలాగే.. యాప్ పనితీరును సూచించే కీ వర్డ్స్‌ను కూడా గూగుల్ నియంత్రిస్తుందట. అలాగే వినయోగదారులు తప్పుదారి పట్టించేలా యాప్ ఐకాన్స్‌పై ఇచ్చే గ్రాఫిక్స్‌ను కూడా నిషేధించనున్నట్లు తెలుస్తోంది.
యాప్స్ డెవలపర్స్.. క్యాపిటల్ ఫాంట్స్, యాప్ పేరులో ఎమోజీలను వాడకూడదని గూగుల్ ఇప్పటికే స్పష్టం చేసింది. ఈ మేరకు మార్గదర్శకాలు విడుదల చేసిన గూగుల్.. వీటిని పాటించని యాప్స్‌ని గూగుల్ ప్లే స్టోర్‌లోకి అనుమతించేది లేదని స్పష్టం చేసింది. అలాగే, యాప్ డెవలపర్స్.. యూజర్లు సదరు యాప్‌కు సంబంధించి పూర్తి వివరాలను పేర్కొన్నాలని గూగుల్ స్పష్టం చేసింది.
ఈ నయా మార్గదర్శకాలు 2021 చివరి కల్లా పూర్తి స్థాయిలో అమల్లోకి వస్తాయని, దీనిపై మరిన్ని వివరాలను వెల్లడిస్తామని గూగుల్ తెలిపింది.