Kashmir Travel: వేసవిలో కశ్మీర్ అందాలను వీక్షించాలనుకుంటున్నారా.. ఈ ప్లేసెస్ చూడడం మరచిపోకండి..
భూతల స్వర్గంగా పిలుచుకునే కశ్మీర్‌కు విహారయాత్రగా వెళ్లడం నిజంగా స్వర్గంతో సమానమే అని అంటారు. కాశ్మీర్ లోని హిమపాతాన్ని ఆస్వాదించాలనుకుంటే.. నవంబర్ , మార్చి మధ్య కష్మీర్ పర్యటనను ప్లాన్ చేసుకోవాలి. అయితే తేమతో కూడిన వేడికి దూరంగా ప్రకృతి అందాల మధ్య చల్లని ప్రదేశానికి వెళ్లాలనుకుంటే.. ఏప్రిల్ నుంచి మే, ఆగస్టు నెలలలో కశ్మీర్ సందర్శించడానికి ప్లాన్ చేసుకోవచ్చు, ఎందుకంటే ఇక్కడి అందాలు ప్రతి సీజన్‌లోనూ హృదయాన్ని ఆహ్లాదపరుస్తాయి. కనులవిందు చేస్తాయి.
కుటుంబ సభ్యులతో లేదా స్నేహితులతో కశ్మీర్‌కు వెళుతున్నట్లయితే ఏఏ ప్రదేశాలను సందర్శించాలనుకుంటే ముందుగానే ఆ ప్రాంతాల గురించి తెలుసుకోవడం ముఖ్యం. ఇలా చేయడం వలన అక్కడకు వెళ్ళిన తర్వాత ఎటువంటి ఇబ్బందులు పడకుండా అందాలను వీక్షించవచ్చు. అక్కడ ఉన్న విభిన్న అందమైన ప్రదేశాలను సందర్శించి జ్ఞాపకాలను పదిల పరచుకోవచ్చు. కనుక కశ్మీర్‌లోని ఏ ప్రదేశాలు సందర్శిస్తే అందాలను కనువిందు చేస్తాయో ఈ రోజు తెలుసుకుందాం..
దాల్ లేక్ శ్రీనగర్: మీరు కశ్మీర్‌కు వెళ్లి దాల్ సరస్సులో షికారా రైడ్ చేయకపోతే.. ఆ ప్రయాణం అసంపూర్తిగా మిగిలిపోతుంది. దాల్ సరస్సులో నిర్మించిన ప్రపంచంలోని ఏకైక పోస్టాఫీసును సందర్శించడం మర్చిపోవద్దు. ఇక్కడ షాలిమార్ బాగ్ మొఘల్ గార్డెన్ నుంచి ఝల్ సరస్సు చాలా అందమైన దృశ్యంగా కనిపిస్తుంది.
గుల్మార్గ్ 'ప్లెయిన్ ఆఫ్ ఫ్లవర్స్': మీరు కాశ్మీర్‌కు వెళితే గుల్‌మార్గ్‌ని సందర్శించడం మర్చిపోవద్దు. గుల్మార్గ్ అంటే పూల క్షేత్రం. ఈ ప్రదేశం కాశ్మీర్‌లోని అత్యంత అందమైన ప్రదేశాల్లో ఒకటి.
ఇందిరా గాంధీ తులిప్ గార్డెన్: పూలను ప్రేమించని వారు ఎవరూ ఉండరు. మీరు కశ్మీర్ వెళుతున్నట్లయితే ఇందిరా గాంధీ మెమోరియల్ తులిప్ గార్డెన్‌ని సందర్శించవచ్చు. ఇక్కడ అనేక జాతులకు చెందిన వివిధ రంగుల పువ్వులు మిమ్మల్ని ఆకర్షిస్తాయి.
పహల్గామ్‌లోని వాడి-ఎ-హజన్‌: కశ్మీర్‌లో పహల్గామ్‌లోని అందమైన లోయ వాడి-ఎ-హజన్‌ని సందర్శించండి. ఈ అందమైన ప్రదేశంలో చాలా సినిమాలు కూడా చిత్రీకరించబడ్డాయి.
యుమార్గ్: కశ్మీర్‌లోని పశ్చిమ ప్రాంతంలో ఉన్న యుస్మార్గ్ అనే హిల్ స్టేషన్ పర్యాటకులను ఆకర్షిస్తుంది. శీతాకాలంలో ఈ ప్రదేశం తెల్లటి మంచుతో కప్పబడి ఉంటుంది, వేసవిలో చుట్టూ అందమైన పర్వత దృశ్యాలు, పచ్చని పొడవైన చెట్లు, విశాలమైన గడ్డి భూములు కనువిందు చేస్తాయి. ఇక్కడ ట్రెక్కింగ్‌తో పాటు గుర్రపు స్వారీ కూడా చేయవచ్చు.
కశ్మీర్ గ్రేట్ లేక్స్ ట్రాక్: భూమిపై స్వర్గంలో అత్యంత అందమైన, ఆశ్చర్యకరమైన దృశ్యాన్ని చూడాలనుకుంటే కశ్మీర్ గ్రేట్ లేక్స్ ట్రాక్‌ను ఖచ్చితంగా సందర్శించండి. ఇది కశ్మీర్‌లోని గందర్‌బల్ జిల్లాలో ఉంది. ఇది అత్యంత ప్రసిద్ధ ట్రెక్కింగ్ ప్రదేశాల్లో ఒకటి. అయితే..ఇక్కడ ట్రెక్కింగ్ కు వెళ్ళాలంటే పూర్తిగా ఆరోగ్యంగా, ఫిట్‌గా ఉండాలి.
గురెజ్ వ్యాలీ: కశ్మీర్‌కు వెళితే గురేజ్ వ్యాలీని సందర్శించడం మర్చిపోవద్దు. ఈ లోయలోని ఒక పర్వతాన్ని కవి హబ్బా ఖాతున్ అని పిలుస్తారు. ఈ ప్రదేశంలో ఒక ప్రేమ కథ ఉందని చెబుతారు. ఇక్కడ ప్రవహించే కిషన్‌గంగా అందమైన దృశ్యాన్ని చూడవచ్చు. అంతే కాదు హబ్బా ఖాటూన్ పర్వతంపై ఒక జలపాతం కూడా ప్రవహిస్తుంది.