తల తెగినా బతికే జీవులు ఇవి.. అణుదాడిని సైతం తట్టుకుంటాయా..?
వంటగదిలో, చీకటి మూలల్లో తరచుగా కనిపించే బొద్దింకలు ప్రపంచవ్యాప్తంగా 4,500 కంటే ఎక్కువ జాతులలో ఉన్నాయి. వీటిలో సుమారు 30 జాతులు మానవ నివాసాలలో కనిపిస్తాయి. ప్లాటోడియా జాతికి చెందిన ఈ కీటకాలు, చెదపురుగులతో సహా, భూమిపై అత్యంత పురాతన జీవులలో ఒకటిగా పరిగణించబడతాయి. వీటి మనుగడ, ప్రత్యేకతలు శాస్త్రవేత్తలను సైతం ఆశ్చర్యపరుస్తాయి.
మనకు ఇళ్లల్లోని వంట గదుల్లో తచ్చాడుతూ చిరాకు తెప్పించే బొద్దింకల పురాతన మూలాలు కార్బోనిఫెరస్ కాలంతో సంబంధం కలిగి ఉన్నాయని శిలాజ ఆధారాలు సూచిస్తున్నాయి. అంటే సుమారు 35 కోట్ల సంవత్సరాల క్రితమే ఇవి భూమిపై ఉనికిలో ఉన్నాయని అంచనా. నిపుణులు చెబుతున్న వివరాల ప్రకారం, డైనోసార్లు మిసోజోయిక్ యుగంలో ఉంటే, బొద్దింకలు అంతకు ముందున్న కార్బోనిఫెరస్ కాలం నుంచే ఉన్నాయి. కోట్లాది సంవత్సరాలలో వాతావరణ, పర్యావరణ పరిస్థితుల్లో భారీ మార్పులు సంభవించినప్పటికీ, అనేక జీవులు అంతరించిపోయినప్పటికీ (డైనోసార్ల వలె), బొద్దింకలు మాత్రం వాటి భౌతిక నిర్మాణంలో పెద్దగా మార్పు లేకుండా మనుగడ సాగించాయి. ఇది వాటి ప్రత్యేకమైన అడాప్టబిలిటీకి నిదర్శనం.
బొద్దింకల శరీరాన్ని ప్రకృతి అద్భుతమని చెప్పవచ్చు. దీని శరీరం తల, థొరాక్స్ (పొట్ట, తల మధ్య భాగం), అబ్డామిన్ (పొట్ట భాగం) అనే మూడు ప్రధాన భాగాలుగా విభజించబడింది. తలలోని రెండు యాంటెనాలు వాటికి ఇంద్రియావయవాలుగా పనిచేస్తాయి, చుట్టూ ఉన్న వాతావరణాన్ని, వస్తువులను అన్వేషించడానికి సహాయపడతాయి. వాటి శరీరానికి పైన కనిపించే నలుపు లేదా ముదురు గోధుమ రంగు పెంకును ఎక్సోస్కెలిటన్ అంటారు. కైటిన్తో తయారైన ఈ భాగం చాలా బలంగా ఉంటుంది, ఇది పర్యావరణ మార్పుల నుండి, శత్రువుల నుండి బొద్దింకలను రక్షిస్తుంది.
బొద్దింకల మనుగడ సామర్థ్యం ఆశ్చర్యకరమైనది. తల తెగిపోయినా అవి వారం రోజుల వరకు జీవించగలవు. మానవులకు మెదడు కీలకమైనది అయినప్పటికీ, బొద్దింకలలో గ్యాంగ్లియన్లు వాటి శరీరం అంతటా విస్తరించి ఉంటాయి. తల, థొరాక్స్, అబ్డామిన్ అన్నింటిలోనూ. తల తెగిపోయినప్పుడు, మిగిలిన గ్యాంగ్లియన్లు శరీరాన్ని నియంత్రించడం ప్రారంభిస్తాయి, ఇది తాత్కాలిక మనుగడకు వీలు కల్పిస్తుంది.
బొద్దింకలు రాత్రిపూట మాత్రమే ఎందుకు కనిపిస్తాయి అనే ప్రశ్నకు సమాధానం, అవి నిశాచర జీవులు కావడమే. రాత్రిపూట ఇవి మరింత చురుగ్గా ఉంటాయి. పగటిపూట చీకటిగా, తేమగా ఉండే వంటగది, బాత్రూం వంటి ప్రాంతాల్లో దాక్కుంటాయని నిపుణులు వివరించారు. ఇవి వ్యర్థ ఆహారాన్ని తిని జీవిస్తాయి, అందుకే ఆహారం, తేమ ఉన్న ప్రాంతాల్లో ఎక్కువగా కనిపిస్తాయి.
అణుదాడి నుంచి బొద్దింకలు బయటపడతాయనే సాధారణ నమ్మకంపై నిపుణులు వివరాలు తెలిపారు. అణుదాడి జరిగినప్పుడు ఇతర జీవుల మాదిరిగానే బొద్దింకలు కూడా వేడికి, కణజాల విచ్ఛిన్నానికి గురై చనిపోతాయి. అయినప్పటికీ, ఇతర జీవుల కంటే సుమారు 15 రెట్లు ఎక్కువ రేడియేషన్ను తట్టుకునే సామర్థ్యం వీటికి ఉందని నిపుణులు అంగీకరించారు. బొద్దింకల జన్యుపదార్థం, అడాప్టబిలిటీ వాటిని అధిక రేడియేషన్ ఉన్న పరిస్థితులలో కూడా జీవించడానికి అనుకూలంగా మారుస్తుంది. వాటి జీవితకాలం జాతులను బట్టి 150 రోజుల నుంచి ఒక సంవత్సరం వరకు ఉండవచ్చు.