సమ్మర్ టూర్ ప్లాన్ చేస్తున్నారా..? అయితే ఈ దక్షిణాది హిడెన్ నేచర్ స్పాట్స్ తప్పక చూడండి!
South India Travel Guide: ట్రాఫిక్ రద్దీ, పనిభారం వల్ల అలసట పెరిగినప్పుడు చాలా మంది ప్రశాంతతను ఇచ్చే ప్రదేశాల కోసం వెతుకుతుంటారు. అలాంటి సమయంలో ప్రకృతి మధ్యలో ఒకటి రెండు రోజులు గడపాలని అనిపిస్తుంది. అలాంటి విశ్రాంతి కోసం దక్షిణ భారతదేశంలో సందర్శించదగిన కొన్ని అద్భుతమైన ప్రదేశాలను ఇప్పుడు తెలుసుకుందాం.
నగర జీవనశైలిలోని ఒత్తిడి, ట్రాఫిక్ రద్దీ, నిరంతర పరుగుల మధ్య నుంచి బయటపడాలని చాలామంది ఆశపడుతుంటారు. అలాంటి వేళల్లో మనసుకు ప్రశాంతతను అందించే, ప్రకృతి ఒడిలోని అందమైన ప్రదేశాల కోసం చిన్న విరామం తీసుకోవడం ఉత్తమ మార్గం. అదృష్టవశాత్తు, మన దేశంలో అలాంటి ప్రకృతి సోయగాలతో నిండిన ఎన్నో అద్భుత గమ్యస్థానాలు ఉన్నాయి. ఒకటి రెండు రోజులు ప్రశాంతంగా గడిపి, మళ్లీ ఉత్సాహంగా తిరిగి రావాలనుకునే వారికి దక్షిణ భారతదేశంలో కొన్ని అద్భుతమైన ప్రదేశాలను పరిశీలిద్దాం.
కూనూర్: ఊటీకి సమీపంలో ఉన్న కూనూర్, పర్యాటకులు తప్పక సందర్శించాల్సిన అందమైన హిల్ స్టేషన్. సముద్ర మట్టానికి సుమారు 1,850 మీటర్ల ఎత్తులో ఉన్న ఈ ప్రాంతం ప్రశాంతతకు నిలయంగా ఉంటుంది. నగర గోల నుంచి దూరంగా, ఎక్కడ చూసినా విస్తరించి ఉన్న పచ్చని తేయాకు తోటలు ఇక్కడి ప్రత్యేక ఆకర్షణ. ఈ తోటల మధ్య విహరించడం మనసుకు అపూర్వమైన ఆనందాన్ని అందిస్తుంది.
గోకర్ణ: కర్ణాటకలోని ఉత్తర కన్నడ జిల్లాలో ఉన్న గోకర్ణ, ఆధ్యాత్మికత, ప్రకృతి అందాలు కలిసిన అరుదైన గమ్యస్థానం. ప్రశాంతమైన బీచ్లతో ప్రసిద్ధి చెందిన ఈ ప్రదేశం, విశ్రాంతి కోరుకునే వారికి ఎంతో అనుకూలం. ఒకవైపు పురాతన ఆలయాలు, మరోవైపు అలలతో అలరించే అరేబియా సముద్ర తీరాలు.. ఇవి గోకర్ణకు ప్రత్యేక శోభను తీసుకువస్తాయి. మహాబలేశ్వర ఆలయం, ఓం బీచ్, కుడ్లే బీచ్ వంటి ప్రదేశాలు తప్పక చూడాల్సినవే.
చిక్మంగళూరు: పశ్చిమ కనుమల ఒడిలో ఉన్న చిక్మంగళూరు, ప్రకృతి ప్రేమికులకు స్వర్గధామం. ఎత్తైన ప్రాంతంలో ఉండటంతో ఇక్కడి వాతావరణం ఎప్పుడూ చల్లగా, ఆహ్లాదకరంగా ఉంటుంది. విశాలమైన కాఫీ తోటలు, పచ్చని కొండలు ఈ ప్రాంతానికి ప్రత్యేక ఆకర్షణ. నిశ్శబ్దంగా ప్రకృతిని ఆస్వాదిస్తూ కొండల్లో నడకలు చేయడం ద్వారా మనసుకు కొత్త ఉల్లాసం లభిస్తుంది.
ఈ ప్రదేశాలు నగర జీవితపు అలసటను తగ్గించి, మనసుకు నూతన శక్తిని అందించే ప్రకృతి ప్రసాదాలు. కొద్దిసేపు అయినా ప్రకృతి మధ్య గడపడం జీవితం పట్ల కొత్త ఉత్సాహాన్ని నింపుతుంది.