ఈ టీతో జలుబు మాయం.. ఇమ్యూనిటీ కూడా పెరుగుతుంది..! రోగాలతో ఫైట్ చేయాలంటే ఇవి తీసుకోవాల్సిందే..!
వైరల్ ఫీవర్లు, ఫ్లూ, కోవిడ్ మళ్లీ పెరిగిపోతున్న తరుణంలో మన ఆరోగ్యం పట్ల జాగ్రత్త అవసరం. శరీర రోగనిరోధక శక్తిని బలంగా ఉంచడానికి కొన్ని సహజమైన ఆహార పదార్థాలను ప్రతి రోజు తీసుకోవడం అవసరం. ఇవి మన శరీరానికి అవసరమైన పోషకాలను అందిస్తాయి.
కాలిఫోర్నియా బాదం పప్పులు ఆరోగ్యానికి చాలా మంచివి. వీటిలో మన శరీరానికి అవసరమైన మంచి కొవ్వులు, ప్రోటీన్, జింక్, మెగ్నీషియం, విటమిన్ ఇ వంటి విలువైన పోషకాలు ఉంటాయి. బాదం తినడం వల్ల గుండె ఆరోగ్యం మెరుగుపడటమే కాకుండా.. రోగనిరోధక శక్తిని బలంగా ఉంచడంలో సహాయపడుతుంది.
పసుపులో ఉండే కర్క్యూమిన్ అనే పదార్థం మన శరీరాన్ని చాలా రకాల ఇన్ఫెక్షన్ల నుండి కాపాడుతుంది. ఇది యాంటీఆక్సిడెంట్ గుణాలతో ఉంటుంది కాబట్టి శరీరంలోని హానికరమైన చెడు పదార్థాలను తొలగించడంలో సహాయపడుతుంది. రోజూ పసుపును గోరువెచ్చని నీటిలో లేదా పాలలో కలిపి తాగితే మంచి ఫలితాలు కనిపిస్తాయి.
అల్లంలో సహజంగా యాంటీబాక్టీరియల్ గుణాలు ఉంటాయి. ఇది జీర్ణక్రియను మెరుగుపరచడంతో పాటు జలుబు, గొంతు నొప్పి వంటి సమస్యలను త్వరగా తగ్గిస్తుంది. ఒక కప్పు అల్లం టీ రోజూ తాగడం వల్ల శరీరం వెచ్చగా ఉండి రోగనిరోధక శక్తి పెరుగుతుంది.
వెల్లుల్లిలో అల్లిసిన్ అనే సహజ యాంటీబయోటిక్ పదార్థం ఉంటుంది. ఇది శరీరాన్ని బ్యాక్టీరియా, వైరస్ లు వంటి హానికరమైన సూక్ష్మజీవుల నుంచి కాపాడటంలో చాలా ముఖ్యమైన పాత్ర పోషిస్తుంది. వండిన కూరల్లో వెల్లుల్లిని కలిపి తీసుకోవడం వల్ల రోగనిరోధక శక్తి మెరుగుపడుతుంది.
నారింజ, నిమ్మకాయ, ద్రాక్ష వంటి పండ్లలో విటమిన్ సి ఎక్కువగా ఉంటుంది. ఇది శరీరంలో గుండె ఆరోగ్యాన్ని మెరుగుపరచడంలో, చర్మం అందంగా కనిపించడంలో, ముఖ్యంగా రోగనిరోధక శక్తిని చురుకుగా ఉంచడంలో సహాయపడుతుంది.
విటమిన్ ఏ, సి లతో పాటు, అరుగుదలకు సహాయపడే ఎంజైములు బొప్పాయిలో పుష్కలంగా ఉంటాయి. ఇది జీర్ణక్రియను మెరుగుపరచడంతో పాటు శరీరానికి అవసరమైన పోషకాలను అందిస్తూ రోగనిరోధక శక్తిని బలంగా ఉంచుతుంది. ఈ పోషకాలు ఉన్న ఆహారాలు మన రోజువారీ ఆహారంలో భాగంగా ఉండాలి. మీకు ఏవైనా ఆరోగ్య సమస్యలు ఉంటే తప్పకుండా డాక్టర్ ను సంప్రదించాలి.