మస్కిటో కాయిల్ వాడుతున్నారా..? అయితే, ఇంటిల్లిపాది ఆరోగ్యం డేంజర్‌లో పడినట్లే!
ఇంట్లో దోమల్ని నివారించడానికి చాలామంది మస్కిటో కాయిల్ వాడుతుంటారు. ఇంట్లోని వివిధ మూలల్లో మస్కిటో కాయిల్స్ పెట్టడం వల్ల దోమలు ఇంట్లోంచి పారిపోతాయి. మస్కిటో కాయిల్ నుండి వచ్చే పొగ దోమలను నియంత్రిస్తుంది. కానీ, ఈ దోమలను చంపే కాయిల్స్ మన ఆరోగ్యానికి కూడా కీడు చేస్తాయన్న విషయం మీకు తెలుసా? ఇందులో అనేక రకాల క్రిమిసంహారక రసాయనాలు వాడతారు. అందుకే కాయిల్స్ నుండి వచ్చే పొగ మనుషులకు అత్యంత ప్రమాదకరం అంటున్నారు నిపుణులు.
క్రానిక్ అబ్స్‌ట్రక్టివ్ పల్మనరీ డిసీజ్ (సీఓపీడీ) అనేది ఒక రకమైన ఊపిరితిత్తుల సమస్య. ఊపిరితిత్తుల్లో అడ్డంకులు వచ్చినపుడు ఈ సమస్య వస్తుంది. మస్కిటో కాయిల్ వాడేవారిలో ఈ సమస్య ఎక్కువగా కనిపిస్తుంది.
దోమలను చంపడానికి ఇంట్లో ప్రతిరోజూ కాయిల్ ఉపయోగిస్తే దాని పొగ వల్ల ఆస్తమా వంటి సమస్యలు వచ్చే అవకాశం ఉంది. అందుకే ఆ పొగకు దూరంగా ఉండండి. ఇంట్లో పిల్లలు ఉంటే వీలైనంత వరకు మస్కిటో కాయిల్స్ వాడటం మానేయండి. దీని పొగ వల్ల పిల్లలో శ్వాసకోశ సమస్యలు వచ్చే అవకాశం ఉంది.
దోమలను నివారించడానికి సహజ మార్గాలు ఎంచుకోండి. దోమ తెరలు మీరు పడుకునే బెడ్ చుట్టూ కట్టుకోండి. లేదంటే సహజంగా దోమలను తరిమేసే మార్గాలు చాలా ఉన్నాయి. వాటిని ఫాలో అవ్వండి.
మస్కిటో కాయిల్ నుంచి వెలువడే పొగ పీల్చుకోవడం వల్ల ఊపిరితిత్తులు దెబ్బతినే అవకాశం ఉంది. ఇది అనేక శ్వాస సంబంధ సమస్యలకు దారితీస్తుందని నిపుణులు హెచ్చరిస్తున్నారు. మస్కిటో కాయిల్స్‌లోని సమ్మేళనాలు తలనొప్పిని కూడా ప్రేరేపిస్తాయి. అందుకే చాలామందికి దోమల నివారణ మందు వాసన చూస్తే తలనొప్పి వస్తుంది.
మస్కిటో కాయిల్ ద్వారా చర్మంపై దద్దుర్లు వచ్చే అవకాశం ఉంది. ఎలర్జీ సమస్య ఉన్నవారు ఈ పొగకు దూరంగా ఉండటమే మంచిది. దోమలను నివారించడానికి ఉపయోగించే మస్కిటో కాయిల్స్‌లో క్యాన్సర్ కారకాలు ఎక్కువగా ఉంటాయి. ఇవి ఊపిరితిత్తుల క్యాన్సర్‌కు కారణమవుతాయి.