Lung Health Tips: శ్వాసకోశ సమస్యలా.. ఊపిరితిత్తులు బలంగా మారాలంటే ఈ యోగాసనాలు ట్రై చేయండి..
చలికాలంలో జలుబు, దగ్గు వంటి సమస్యలు సర్వసాధారణం. నార్మల్ వ్యక్తులే సీజనల్ వ్యాధులతో ఇబ్బంది పడితే.. ఇక శ్వాస సంబంధిత సమస్యలతో ఇబ్బంది పడేవారికి చలి కాలంలో వచ్చే జలుబు, దగ్గు సమస్యలు మరింత పెరుగుతాయి. వాతావరణంలో చలి తీవ్రత పెరిగినప్పుడు కఫం సమస్య మరింత తీవ్రత అవుతుంది. అప్పుడు శ్వాసకోశ వ్యాధులతో బాధపడేవారి సమస్యలు మరింత తీవ్రమవుతాయి. ఇటువంటి సమస్యలను నివారించడానికి రోజువారీ దినచర్యలో యోగాను చేర్చుకోండి. రోజూ కొన్ని నిమిషాల పాటు కొన్ని రకాల యోగాసనాలు చేయడం వలన ఊపిరితిత్తుల సమస్య ను నివారించుకోవచ్చు. అవి ఏమిటంటే..
ఊపిరితిత్తులను బలోపేతం చేసుకోవడానికి యోగా సనాలను దినచర్యలో భాగంగా చేసుకోవాలి. ఈ యోగాసనాల్లో భుజంగాసనం బెస్ట్.. దీనిని ప్రారంభంలో ప్రతిరోజూ కేవలం ఒకటి లేదా రెండు నిమిషాలు మాత్రమే సాధన చేయాలి. అయితే.. కాలక్రమంలో ఈ యోగాసనం చేసే కాల వ్యవధిని పెంచవచ్చు. ఇది ఛాతీ, ఊపిరితిత్తులు, పొట్ట, భుజాల కండరాలను బలపరుస్తుంది. అంతేకాదు వెన్నెముక కూడా ఫ్లెక్సిబుల్‌గా మారుతుంది.
శీతాకాలంలో లేదా మరేదైనా సీజన్‌లో శ్వాసకోశ సమస్యలతో ఇబ్బంది పడుతుంటే.. ఈ సమస్యల నుంచి ఉపశమనం పొందేందుకు ఉస్ట్రాసనం చేయడం ప్రయోజనకరంగా ఉంటుంది. ఈ యోగాసనం ఛాతీ కండరాలను సాగదీస్తుంది. ఊపిరితిత్తులను తెరవడంలో సహాయపడుతుంది. ఈ యోగాసనం చేయడం వల్ల వెన్నె, నడుము నొప్పి నుంచి ఉపశమనం లభిస్తుంది. ఉదర కండరాలు కూడా బలపడతాయి.
అర్ధమత్యేంద్రాసనాన్ని ఇంగ్లీషులో 'హాఫ్ స్పైనల్ ట్విస్ట్' అంటారు. ఈ యోగాసనం చేయడం వల్ల ఛాతీ తెరుచుకుంటుంది. ఊపిరితిత్తులకు ఆక్సిజన్ సరఫరా మెరుగవుతుంది. అంతేకాదు ఈ యోగా ఆసనాలు పీరియడ్స్, భుజాలకు సంబంధించిన సమస్యలను తగ్గించడంలో సహాయపడతాయి. ఎగువ వెనుక, మెడ కండరాల ఒత్తిడిని కూడా తగ్గిస్తుంది.
శ్వాసకోశ సమస్యలతో బాధపడేవారికి గౌముఖాసనం ఎంతో మేలు చేస్తుంది. ఆస్తమా ఉన్నవారు ఈ యోగాసనం చేయడం వల్ల ఈ సమస్య నుంచి ఉపశమనం పొందవచ్చు. అంతేకాదు ఈ యోగా ఆసనం తుంటి , వెన్నునొప్పి, భుజం దృఢత్వం, మెడ , వెన్నునొప్పి నుంచి ఉపశమనాన్ని అందిస్తుంది. శారీరక భంగిమను మెరుగుపరచడంలో కూడా ప్రయోజనకరంగా ఉంటుంది.
శ్వాస సంబంధిత సమస్యలను నివారించడానికి, ప్రాణాయామం చేయడం ఉత్తమం, ఎందుకంటే ప్రాణాయామం శ్వాస పద్ధతులపై ఆధారపడి ఉంటుంది. శీతాకాలంలో శ్వాసకోశ సమస్యలు మళ్లీ మళ్లీ తలెత్తకుండా చూసుకోవడానికి కపాలభాతి, నాడి శోధన ప్రాణాయామం, అనులోమ్-విలోమ్, భ్రమరి వంటి ఒకటి లేదా రెండు ప్రాణాయామంలను ప్రతిరోజూ చేయవచ్చు.