Beauty Care: మునగాకుతో మూడింతల అందం…అస్సలు మిస్ కావొద్దు..!
మునగాకు వల్ల పుష్కలమైన ఆరోగ్య ప్రయోజనాలు ఉన్నాయని మనందరికీ తెలిసిందే. అయితే, మునగాకుతో మీ అందాన్ని రెట్టింపు చేసుకోవచ్చని తెలిస్తే ఎగిరి గంతేస్తారు. మన చర్మాన్ని, జుట్టును సంరక్షించే గుణాలు మునగాకులో పుష్కలంగా ఉన్నాయని నిపుణులు చెబుతున్నారు. మునగాకు పొడి, మునగాకు నూనె.. మన సౌందర్య సంరక్షణలో ఎలా సహాయపడతాయో ఇక్కడ తెలుసుకుందాం..
మునగ ఆకుల్లో అద్భుతమైన ఔషధ గుణాలు ఉన్నాయి. మునగ ఆకుల్లో కార్బోహైడ్రేట్లు, ప్రోటీన్లు, కాల్షియం, పొటాషియం, ఐరన్, మెగ్నీషియం, విటమిన్-ఎ, సి, బి కాంప్లెక్స్, బీటా-కెరోటిన్, అమైనో యాసిడ్స్‌, ఫినోలిక్‌లతో పాటు, 40 కంటే ఎక్కువ రకాల యాంటీఆక్సిడెంట్లు ఉన్నాయి.
మునగాకు వల్ల అనేక ఆరోగ్య ప్రయోజనాలే కాదు.. మన చర్మాన్ని, జుట్టును సంరక్షించే గుణాలు ఉన్నాయని నిపుణులు చెబుతున్నారు. మునగాకు పొడి, మునగాకు నూనె.. మన సౌందర్య సంరక్షణలో అనేక విధాలుగా మేలు చేస్తుంది.
మునగాకు మొటిమల్నీ, మచ్చల్నీ, ముడతల్నీ తగ్గిస్తుంది. ఇందులో నారింజతో పోలిస్తే విటమిన్- సి ఏడురెట్లు ఎక్కువ. అమ్మాయిల్లో అత్యంత సాధారణంగా ఎదురయ్యే మంగు మచ్చల్నీ నియంత్రిస్తుంది. చెంచా మునగాకు పొడికి రెండు చెంచాల పెరుగులో కలిపి ముఖానికి పట్టించాలి. ఆరాక చల్లటినీటితో శుభ్రం చేస్తే సరి. వారానికి రెండుసార్లు చేస్తే సమస్య తగ్గుతుంది.
మునగాకు మాత్రమే కాదు.. మునగ కాయ గింజల్లో విటమిన్- ఎ, సి, ఇ లు మెండుగా ఉంటాయి. ఇవి చర్మానికి కావల్సిన తేమను అందించి మృదువుగా చేస్తాయి. దీనిలో ఉండే యాంటీ ఆక్సిడెంట్లు చర్మాన్ని ఫ్రీరాడికల్స్‌తో పోరాడేలా చేసి వృద్ధాప్యఛాయలను తగ్గిస్తాయి.
జుట్టును తేమగా ఉంచే అమైనో ఆమ్లాలు, ఒలియాక్‌ ఆమ్లాలు మునగాకులో సమృద్ధిగా ఉన్నాయి. ఇవి నిస్తేజమైన కురులను పునర్జీవింప చేయడంలో సాయపడతాయి. తేమను కోల్పోకుండా చేస్తాయి.