Employee Pension Rules: మరణించిన ప్రభుత్వ ఉద్యోగికి ఇద్దరు భార్యలు ఉంటే!.. పెన్షన్ ఎవరికి వస్తుంది?
Government Employee Pension Rules: ప్రభుత్వంలో పనిచేసే ఉద్యోగులు మరణిస్తే, కేంద్ర, రాష్ట్ర ప్రభుత్వాలు వారి భాగస్వాములకు పెన్షన్ను అందిస్తున్న విషయం అందరికీ తెలిసిందే.. ఒకవేళ చనిపోయిన ప్రభుత్వ ఉద్యోగికి ఇద్దరు భార్యలు ఉంటే.. ఇద్దరిలో ప్రభుత్వం పెన్షన్ను ఎవరికి అందిస్తుంది. ఈ డౌట్ మీకెప్పుడైనా వచ్చిందా.. అయితే లేటెందుకు తెలుసుకుందాం పదండి.
చనిపోయిన ప్రభుత్వ ఉద్యోగికి ఇద్దరు భార్యలు ఉంటే పెన్షన్ ఎవరికి ఇవ్వాలనే అంశంపై కేంద్ర ప్రభుత్వం ఇటీవలే మరోసారి క్లారిటీ ఇచ్చింది. ఇలాంటి విషయాల్లో సమస్యలు తలెత్తకుండా ఉండేందుకు లబ్ధిదారులు మంత్రిత్వ శాఖలు, చట్టపరమైన సలహాలు తీసుకోవాలని తెలిపింది.
ఈ పథకం మార్గదర్శకాల్లోని నియమం 50 ప్రకారం పెన్షనర్ మరణిస్తే అతని భార్య లేదా భర్తకు ఇస్తారు. వారు లేకపోతే, అది అర్హత కలిగిన వారి పిల్లలకు ఇస్తారు, వారు లేకపోతే వారిపై ఆధారపడిన తల్లిదండ్రులు, లేదా వికలాంగులైన సోదరులు/సోదరీమణులకు ఇస్తారు ఇది సాధారణంగా జరిగే ప్రక్రియ.
అయితే ఒక ఉద్యోగికి చట్టబద్ధంగా ఇద్దరు భార్యలు, భర్తలు ఉంటే నియమం 50(8)(c) ప్రకారం.. కుటుంబ పెన్షన్ను ఇద్దరు భార్యల మధ్య సమానంగా పంచుకోవాలి, అంటే 50-50. ఇందులో ఎటువంటి గందరగోళం లేదు.
అయితే ఇక్కడ మరో చిక్కుముడి ఉంది. ఇద్దరి భార్యల్లో ఒకరు చనిపోతే.. అప్పుడు మొత్తం పెన్షన్ మిగిలి ఉన్న భార్యకు వస్తుందా అంటే.. అలా రాదు.. చనిపోయిన భార్య పిల్లలకు ఆ పెన్షన్ అందుతుంది.
అయితే హిందూ వివాహ చట్టం ప్రకారం.. మొదటి వివాహం చెల్లుబాటులో ఉండగా మరో పెళ్లి చేసుకోవడం చట్ట విరుద్ధం. ఇది పెన్షన్ రూల్స్ను అతిక్రమించడం అవుతుంది. కాబట్టి ఇలాంటి సందర్భాల్లో అర్హతపై తగిన వివాదాలు వస్తాయి. అందుకే శాఖలు ఈ కేసులపై నిర్ణయం తీసుకునే ముందు జాగ్రత్తగా పరిశీలించి, చట్ట సలహా తప్పనిసరిగా తీసుకోవాలని మంత్రిత్వ శాఖ సూచిస్తోంది.