Eggs Boiling: గుడ్లు ఉడకబెట్టేటప్పుడు పగులుతున్నాయా.. ఇలా చేస్తే అస్సలు పగలవు..! వెరీ సింపుల్..
గుడ్లు ఆరోగ్యానికి చాలా మంచివి.. గుడ్లలో బోలెడన్ని ప్రోటీన్స్ ఉంటాయి. కాబట్టి.. వాటిని ఎవరైనా తినొచ్చు. పిల్లలకు గుడ్లు తినిపించడం చాలామంచిది. తగిన పోషకాలు అందుతాయి. ఉడికించిన గుడ్డు రుచికరమైన, ఆరోగ్యకరమైన ఆహారాలలో ఒకటిగా ఆరోగ్య నిపుణులు చెబుతున్నారు.. మీరు వాటిపై కొంచెం ఉప్పు, నల్ల మిరియాలు చల్లి తింటే ఎంతో రుచిగా ఉంటాయి. కానీ చాలా సందర్భాలలో గుడ్లు ఉడకబెడుతున్న క్రమంలో పగిలిపోతుంటాయి..అలా కాకుండా ఉండాలంటే.. గుడ్లని ఉడకబెట్టేటప్పుడు కొన్ని జాగ్రత్తలు పాటించాలి. ఇలా చేస్తే పెంకు సులువుగా రావడమే కాదు గుడ్లలో అవసరమైన పోషకాలు చెక్కుచెదరకుండా ఉంటాయి. దీనికి అద్భుతమైన రుచి ఉంటుందని కూడా చెబుతారు. అదేలాగో ఇక్కడ తెలుసుకుందాం..
గుడ్లు ఉడకబెట్టేటప్పుడు వాటికి సరిపడా పెద్ద సైజు గిన్నెను తీసుకోవాలి. గిన్నెలో గుడ్లు మొత్తం మునిగేవిధంగా నీరు పోయాలి. ఇలా చేయడం వల్ల గుడ్లు ఒకదానికొకటి తగలకుండా ఉంటాయి. దాంతో పగలకుండా ఉంటాయి.
మీరు గుడ్లు ఉడకబెడుతున్న గిన్నెలోని నీటిలో ఒక టీస్పూన్ ఉప్పు వేయాలి. ఇలా చేస్తే గుడ్లు పగలకుండా ఉంటాయి. ఇలా ఉప్పు నీటిలో గుడ్లను ఉడకబెట్టడం వల్ల వాటి పెంకు తీయటం సులభంగా ఉంటుంది.
అలాగే, చాలా మంది కోడిగుడ్లను ఫ్రిజ్లో నిల్వ చేస్తుంటారు. నేరుగా వంటకు ఉపయోగిస్తారు. అలా ఎప్పుడు చేయకూడదు. మొదటగా వాటిని గది ఉష్ణోగ్రతకు తీసుకురావాలి. ఆ తర్వాత వాటిని ఉడకబెట్టాలి. మీరు చల్లటి గుడ్లను నేరుగా వేడి నీటిలో ఉడకబెట్టినట్లయితే అవి పగిలిపోయే అవకాశాలు ఎక్కువగా ఉంటాయి.
గిన్నెలో నీరు మరుగుతుండగా గుడ్లు ఎప్పుడు అందులో వేయకూడదు. అలావేస్తే గుడ్డు నీటిలోనే పగిలిపోతాయి. ఒక గిన్నెలో 3-4 గుడ్ల కంటే ఎక్కువ ఉడకబెట్టకూడదు. ఇలా కూడా అవి పగిలిపోయే అవకాశం ఉంటుంది.
ఇకపోతే, గుడ్లు ఉడకబెట్టేటప్పుడు ఎక్కువ మంట మీద ఉడికించొద్దు. మీడియం వేడి మీద మరిగించాలి. మీరు ఇలా చేస్తే, అది పగలకుండా ఉంటుంది. సుమారు 15 నిమిషాలు ఉడికిన తర్వాత గ్యాస్ ఆఫ్ చేయాలి. ఇప్పుడు గుడ్లను వేడి నీటిలో నుంచి తీసి చల్లటి నీటిలో వేయాలి. సుమారు 10 నిమిషాల తరువాత వాటి పెంకులు తీయాలి. గుడ్డు పగలకుండా ఈజీగా వచ్చేస్తుంది.