టాలీవుడ్ ఫ్యూచర్ ఏంటి.. ఏం చేయబోతున్నారు ??
ఇకపై ప్రీమియర్ షోలకి అనుమతులు.. బెనిఫిట్ షోలకు పర్మిషన్స్.. టికెట్ రేట్లపై పెంపులు ఉండవు..! తెలంగాణ ప్రభుత్వం తీసుకున్న ఈ నిర్ణయంపైనే ఆసక్తికరమైన చర్చ జరుగుతుందిప్పుడు. మరి ఈ నిర్ణయం రాబోయే సినిమాలపై ఎలాంటి ప్రభావం చూపించబోతుంది..? టాలీవుడ్‌లో మారుతున్న పరిస్థితులపై ఎక్స్‌క్లూజివ్ స్టోరీ..
టాలీవుడ్‌లో జరుగుతున్న పరిస్థితులు హాట్ హాట్‌గా ఉన్నాయి. మరీ ముఖ్యంగా గవర్నమెంట్ తీసుకుంటున్న నిర్ణయాలు చర్చనీయాంశం అవుతున్నాయి. అల్లు అర్జున్ ఇష్యూతో ప్రభుత్వం సినిమా ఇండస్ట్రీపై కాస్త కన్నెర్ర చేసినట్లు అర్థమవుతుంది.
అయితే అది ఇండస్ట్రీ ఫ్యూచర్‌పై ఎలాంటి ప్రభావం చూపిస్తుందనేది ఆసక్తికరంగా మారింది. తెలంగాణలో ప్రభుత్వం ఏదైనా ఇండస్ట్రీకి ఎప్పుడూ సపోర్టింగ్‌గానే ఉంది. ప్రోత్సహిస్తూనే ఉన్నారు.. టాలీవుడ్ కోసం ఏమేం చేయాలో అన్నీ చేస్తున్నారు.
కొత్త ప్రభుత్వం వచ్చాక.. సలార్, దేవర, కల్కి లాంటి సినిమాలకు భారీ టికెట్ హైక్ ఇచ్చారు. ఇక పుష్ప 2కు అయితే మునుపెన్నడూ లేనంతగా ఏకంగా ప్రీమియర్స్‌పైనే 800 రూపాయల హైక్ ఇచ్చింది ప్రభుత్వం. పుష్ప 2 విడుదల వరకు అన్నీ బాగానే ఉన్నాయి.
కానీ ఆ తర్వాత జరిగిన కొన్ని ఘటనలతో పరిస్థితులన్నీ ఒక్కసారిగా మారిపోయాయి. ముఖ్యంగా సంధ్య థియేటర్ ఘటన తర్వాత ప్రభుత్వం సీరియస్ అయింది. ఇకపై ఏ సినిమాకు బెనిఫిట్ షోస్ ఉండవని.. టికెట్ రేట్ల పెంపు కూడా ఉండదనే ఆదేశాలు వచ్చాయి. ప్రభుత్వ నిర్ణయం రాబోయే పెద్ద సినిమాలపై ప్రభావం చూపించక మానదు.
ముఖ్యంగా సంక్రాంతికి రానున్న గేమ్ ఛేంజర్‌పైనే ఈ ఎఫెక్ట్ పడనుంది. అలాగే మిగిలిన సినిమాలపై కూడా..! మరి ఈ ఇష్యూపై సినిమా పెద్దలు మాట్లాడతారా..? ఒకవేళ సైలెంట్‌గా ఉంటే.. ఏపీలోనూ బెనిఫిట్ షోలు, టికెట్ రేట్ పెంపుకు అనుమతులు ఆపేస్తే ఏంటి అనే ఊహే టాలీవుడ్ ఫ్యూచర్‌ను గందరగోళంలో పడేస్తుంది.