2021 Top Movies: ఈ ఏడాది బాక్సాఫీస్‌ ముందు దుమ్మురేపిన సినిమాలివే.. రూ. వంద కోట్ల మార్క్‌ దాటేసి మరీ..
2021 Top Movies: కరోనా కారణంగా 2021లో సినిమా ఇండస్ట్రీ కుంటుపడింది. అయితే ఇలాంటి విప్కతర పరిస్థితులను సైతం తట్టుకొని కొన్ని సినిమాలు జయకేతనాన్ని ఎగరవేశాయి. రూ. 100 కోట్లకుపైగా వసూళ్లను రాబట్టి టాలీవుడ్‌ సత్తా చాటాయి..
గతేడాది టాలీవుడ్‌కు గడ్డు కాలమని చెప్పడంలో ఎలాంటి సందేహం లేదు. కరోనా ప్రభావంతో ప్రేక్షకులకు థియేటర్లవైపు చూడడానికి వెనకా ముందయ్యారు. అయితే ఇలాంటి పరిస్థితులను సైతం తట్టుకొని కొన్ని సినిమాలు బాక్సాఫీస్‌ ముందు సందడి చేశాయి. రికార్డు కలెక్షన్లతో దుమ్మురేపాయి. ఈ ఏడాది అత్యధిక కలెక్షన్లు రాబట్టిన సినిమాలపై ఓ లుక్కేయండి.
ఈ ఏడాది రూ. వంద కోట్ల మార్క్‌ను దాటిని తొలి చిత్రంగా 'ఉప్పెన' నిలిచింది. చిన్న సినిమాగా వచ్చిన ఈ చిత్రం రికార్డులను బద్దలు కొట్టింది. తొలి సినిమాతోనే వైష్ణవ్‌ తేజ్‌ అద్భుత విజయాన్ని అందుకున్నాడు. బుచ్చిబాబు మార్క్‌ దర్శకత్వం, కృతిశెట్టి క్యూట్‌ లుక్స్‌, దేవీశ్రీ సంగీతం వెరసి ఈ సినిమా విజయాన్ని సాధించింది. ఈ సినిమా ఏకంగా రూ. 100 కోట్ల (గ్రాస్‌) సాధించింది.
2021లో రూ. 100 కోట్ల వసూళ్లను దాటేసిన మరో చిత్రంగా 'వకీల్‌సాబ్‌' నిలిచింది. ఏప్రిల్‌ 9న విడుదలైన ఈ సినిమా బాక్సాఫీస్‌ వద్ద మంచి కలెక్షన్లను రాబట్టింది. హిందీలో వచ్చిన 'పింక్‌'కు రీమేక్‌గా తెరకెక్కిన ఈ సినిమా ఏకంగా రూ. 130 కోట్ల గ్రాస్‌ను వసూలు చేసింది. ఈ సినిమాలో పవన్‌ లాయర్‌ పాత్రలో అద్భుత నటనను కనబరిచి తన స్టామినా ఏమాత్రం తగ్గలేదని నిరూపించారు.
2021 టాలీవుడ్‌కు అందించిన మరో అద్భుమైన బహుమతి అఖండ మూవీ. బాలకృష్ణ నట విశ్వరూపం, బోయపాటి శ్రీను దర్శకత్వం వెరసి అఖండను బాక్సాఫీస్‌ ముందు హిట్‌గా నిలిపింది. ఈ సినిమా ఏకంగా రూ. 115 కోట్ల గ్రాస్‌ను కలెక్ట్‌ చేసి ఇంకా వసూళ్లను కొనసాగిస్తూనే ఉంది.
అల్లు అర్జున్‌, సుకుమార్‌ కాంబినేషన్‌లో వచ్చిన 'పుష్ప' పాన్‌ ఇండియా చిత్రాలకు ఊతమిచ్చింది. ఈ సినిమా విడుదలైన ప్రతీచోట మంచి టాక్‌ సొంతం చేసుకుంటూ దూసుకుపోతోంది. కేవలం ఆరు రోజుల్లోనే పుష్ప ఏకంగా రూ. 150 కోట్ల గ్రాస్‌ వసూలు చేసి రూ. 200 కోట్ల క్లబ్‌లో చేరడానికి దూసుకుపోతోంది. ఈ సినిమా బాలీవుడ్‌లోనూ మంచి విజయం సాధించడం మరో విశేషం.