Jr.NTR: నెట్టింట ఆ ఇద్దరినే ఫాలో అవుతున్న ఎన్టీఆర్.. ఆ ఒక్కరు చాలా స్పెషల్..
తెలుగు సినీ పరిశ్రమలో తిరుగులేని హీరో జూనియర్ ఎన్టీఆర్. ఇప్పటివరకు ఎన్నో అద్భుతమైన చిత్రాలతో ప్రేక్షకులను మెప్పించాడు. ఎలాంటి పాత్రలోనైనా ప్రాణం పెట్టి నటించడం ఈ హీరోకు వెన్నతో పెట్టిన విద్య. ఇండస్ట్రీలో తనకంటూ ప్రత్యేకమైన గుర్తింపును సంపాదించుకున్నాడు. గతేడాది దేవర సినిమాతో మరో బ్లాక్ బస్టర్ హిట్ అందుకున్నాడు.
జూనియర్ ఎన్టీఆర్ ప్రస్తుతం వార్ 2 చిత్రీకరణలో బిజీగా ఉన్న సంగతి తెలిసిందే. గతేడాది దేవర సినిమాతో పాన్ ఇండియా బాక్సాఫీస్ వద్ద చరిత్ర సృష్టించిన తారక్.. ఇప్పుడు మాత్రం బాలీవుడ్ ఇండస్ట్రీలోకి ఎంట్రీ ఇస్తున్నాడు.
వార్ 2 చిత్రంలో హృతిక్ రోషన్ ప్రధాన పాత్రలో నటిస్తుండగా.. ఎన్టీఆర్ కీలకపాత్ర పోషిస్తున్నాడు. త్వరలోనే దేవర పార్ట్ 2 షూటింగ్ స్టార్ట్ చేయనున్నాడు. అలాగే డైరెక్టర్ ప్రశాంత్ నీల్ దర్శకత్వంలో ఓ మూవీ చేయనున్నాడు.
ఇదిలా ఉంటే.. సోషల్ మీడియాలో ఎన్టీఆర్ ఎప్పుడో ఒకసారి పోస్ట్ చేస్తుంటారు. నెట్టింట యాక్టివ్ గా ఉండేందుకు తారక్ అసలు ఇష్టపడరు. అయినప్పటికీ ఈ హీరోను ఫాలో అయ్యేవాళ్ల సంఖ్య మిలియన్లలో ఉంటుంది.
తారక్ కు ఇన్ స్టాలో 7.4 మిలియన్ మంది ఫాలోవర్స్ ఉన్నారు. కానీ ఇన్ స్టాలో ఎన్టీఆర్ ఏ ఒక్కరిని ఫాలో కావడం లేదు. ఇక ఫేస్ బుక్ విషయానికి వస్తే అతడికి 6.3 మిలియన్ ఫాలోవర్స్ ఉన్నారు.
కానీ ఎన్టీఆర్ మాత్రం ఫేస్‌బుక్‌లో కేవలం రెండు ఖాతాలను మాత్రమే ఫాలో అవుతున్నారు. అందులో ఒకటి డైరెక్టర్ రాజమౌళి కాగా.. మరొకటి ఎన్టీఆర్ ఆర్ట్స్ ప్రొడక్షన్ బ్యానర్. ఇక ట్విట్టర్ లో కేవలం రాజమౌళిని మాత్రమే ఫాలో అవుతున్నారు.