Indian Railways: దేశంలో తొలి బుల్లెట్ ట్రైన్ ప్రారంభానికి డేట్ ఫిక్స్.. వచ్చే ఏడాదిలోనే పరుగులు.. ఎప్పుడంటే..?
ఇండియాలో తొలి బుల్లెట్ రైలు ఎప్పుడు ప్రారంభం అవుతుందనే విషయంపై స్పష్టత వచ్చింది. ఈ మేరకు కేంద్ర ప్రభుత్వం ముహూర్తం ఫిక్స్ చేసింది. వచ్చే ఏడాదిలోనే మొట్టమొదటి రైలు పట్టాలపై పరుగులు తీయనుంది. ఈ మేరకు రైల్వేశాఖ మంత్రి అశ్విని వైష్ణవ్ కీలక ప్రకటన చేశారు.
ఫిబ్రవరిలో ప్రవేశపెట్టిన కేంద్ర బడ్జెట్లో దేశవ్యాప్తంగా ఏడు మార్గాల్లో హైస్పీ్డ్ బుల్లెట్ రైళ్ల కారిడార్లను నిర్మించనున్నట్లు ప్రకటించిన విషయం తెలిసిందే. ఈ ప్రాజెక్ట్ పనులను పట్టాలెక్కించేందుకు రైల్వేశాఖ సన్నద్దమవుతోంది. అలైన్ మెంట్ సర్వే, డీపీఆర్ తయారీ, భూసేకరణ, టెండర్ల ప్రక్రియ వంటి పనులను చేపడుతోంది. ఈ క్రమంలో తొలి బుల్లెట్ ట్రైన్ ఎప్పుడు ప్రారంభం అవుతుందనే దానిపై దేశ ప్రజల్లో ఆసక్తి నెలకొంది.
దేశంలో తొలి బుల్లెట్ రైలు ప్రారంభానికి ముహూర్తం ఖరారు అయింది. వచ్చే ఏడాది ఆగస్ట్ 15న తొలి రైలును ప్రారంభించాలని కేంద్రం ముహూర్తం ఖరారు చేసింది. ముంబై-అహ్మదాబాద్ హైస్పీడ్ బుల్లెట్ రైలు కారిడార్ మార్గంలో తొలి రైలు పరుగులు పెట్టనుంది. జపాన్కు చెందిన షింకన్సెస్ టెక్నాలజీ ఆధారంగా పనులు చేపడుతున్నారు. ఇప్పటికే బుల్లెట్ రైళ్లు ఎలా ఉంటాయనే దానిపై కేంద్రం నమూనాలను విడుదల చేసిన విషయం తెలిసిందే.
ముంబై-అహ్మదాబాద్ కారిడార్ మొత్తం 508 కిలోమీటర్ల మేర ఉంటుంది. తొలి బుల్లెట్ ట్రైన్ ఈ మార్గంలోనే రానుంది. స్వాతంత్ర దినోత్సవం సందర్బంగా 2027, ఆగస్ట్ 15న తొలి రైలును ఈ మార్గంలో ప్రవేశపెట్టనున్నారు. ఈ విషయాన్ని ఇటీవల రైల్వేశాఖ మంత్రి అశ్విని వైష్ణవ్ స్వయంగా ప్రకటించారు. ఈ ప్రాజెక్టు పూర్తయితే ముంబై-అహ్మదాబాద్ మధ్య రెండు గంటల్లోపే చేరుకోవచ్చు.
బుల్లెట్ రైళ్ల వేగం, సమయపాలన, ప్రాజెక్ట్ మొత్తం షింకన్సెస్ టెక్నాలజీ ఆధారంగా పనిచేస్తుంది. ఈ కారిడార్లో మొత్తం 12 స్టేషన్లు ఉంటాయి. అహ్మదాబాద్, సబర్మతి, ఆనంద్, వడోదర, భరూచ్, సూరత్, బిలిమోరా, వాపి, బోయిసర్, థానే, ముంబై స్టేషన్లను ప్రతిపాదించారు. ఈ మార్గంలో నడిపించేందుకు తొలి బుల్లెట్ రైలుును బీఈఎంఎల్ అభివృద్ది చేస్తోంది. మేడ్ ఇన్ ఇండియా బీ28 రైలు సెట్ తయారుచేస్తున్నారు.
దేశీయ సాంకేతికత ఆధారంగా బుల్లెట్ ట్రైన్ అభివృద్ది చేస్తున్నారు. 2029 నాటికి అహ్మదాబాద్-ముంబై కారిడార్ పనులన్నీ పూర్తి కానున్నాయి. దశలవారీగా పనులను పూర్తి చేయనున్నారు. పూర్తయిన కొంత మార్గంలో బుల్లెట్ రైళ్లను తొలుత నడపనున్నారు.