Gold Loans: బంగారం తాకట్టు పెడుతున్నారా? ముందు ఇవి తెలుసుకోండి..
మన దేశంలో అత్యంత ప్రసిద్ధి చెందిన, సులభంగా మంజూరయ్యే రుణాలు.. బంగారంపై రుణాలు. సాధారణంగా ఏ రుణానికైనా ఆ సంబంధిత వ్యక్తుల క్రెడిట్ స్కోరు, రుణ గ్రహీత తిరిగి చెల్లించగలిగే సామర్థ్యం వంటికి తనిఖీ చేస్తారు. అయితే బంగారంపై లోన్లకు అలాంటివేమి చూడరు. ఎందుకంటే లోన్ కంటే విలువైన బంగారం వారి దగ్గర తనఖా ఉంటుంది కాబట్టి. అయితే ఈ రుణం తీసుకునే సమయంలో కొన్ని జాగ్రత్తలు తీసుకోవాలి. కొన్ని అంశాలను సరిచూసుకోవాలి. అవేంటో ఇప్పుడు తెలుసుకుందాం..
ఎంత రుణం ఇస్తారు.. ప్రస్తుతం బంగారం ధరలు ఆకాశంలో ఉన్నాయి. చరిత్రలోనే ఇప్పుడున్న రేట్లు ఎప్పుడూ లేవు. ఇది ఇంకా పెరుగుతాయని మార్కెట్ వర్గాలు చెబుతున్నాయి. ఈ క్రమంలో రుణం కూడా ఆ బంగారం నాణ్యతపై ఆధారపడి ఉంటుంది. తప్పనిసరిగా 18 నుంచి 24 క్యారెట్ల మధ్య బంగారం ఉండాలి. సాధారణంగా బ్యాంకులు మీరు ఇచ్చే ఆభరణం విలువలో 70శాతం రుణంగా ఇస్తారు. ఆ రోజు రేటును బట్టి మీకు లోన్ వస్తుంది.
1 / 5
వడ్డీ రేటు సరిపోల్చండి.. బంగారంపై రుణాలు సాధారంగా తక్కువ వడ్డీ రేటుకే వస్తాయి. కానీ మీరు రుణం తీసుకునే ముందు, ఎక్కడ తక్కవ వడ్డీ ఉంది? అనేది విచారణ చేయాలి. ఎందుకంటే అన్ని బ్యాంకుల్లో వడ్డీ రేటు ఒకేలా ఉండదు. సాధారణంగా ప్రముఖ ప్రభుత్వ రంగ బ్యాంకులు వడ్డీ రేటు 8.8శాతం నుంచి అందిస్తాయి. అలాగే తిరిగి చెల్లించే కాలవ్యవధి గురించి కూడా చూసుకోవాలి.
2 / 5
తిరిగి చెల్లించే విధానం.. ఇటీవల కాలంలో చాలా బ్యాంకులు బంగారంపై రుణాలకు కూడా ఈఎంఐ ఆప్షన్ ను అందిస్తున్నాయి. అసలు, వడ్డీ కలిపి వాయిదాలలో చెల్లించుకునే అవకాశం ఇస్తున్నాయి. అలా కానీ పక్షంలో ఏడాది కాల వ్యవధితో సాధారణంగా బంగారంపై రుణాలు వస్తాయి. ఏడాది తర్వాత వాటిని వడ్డీ తో సహా చెల్లించి తీసుకోవాల్సి ఉంటుంది. కొన్ని బ్యాంకులు ఓవర్ డ్రాఫ్ట్ సౌకర్యాన్ని కల్పిస్తున్నాయి. ముందస్తు చెల్లింపులు చేసుకోవచ్చు.
3 / 5
రుణం డిఫాల్టయితే.. ఈ రుణాన్ని తిరిగి చెల్లించలేని పక్షంలో బ్యాంకు నోటీసు ఇచ్చి మీ బంగారాన్ని వేలం వేస్తుంది. దీని వల్ల మీ బంగారాన్ని కోల్పోతారు. ఒకేవేళ నిర్ణీత సమయానికి రుణం చెల్లించకపోతే రీషెడ్యూల్ చేయించుకోవచ్చు. ఇది ఉపయుక్తంగా ఉంటుంది.
4 / 5
సురక్షితమేనా.. మన బంగారం తాకట్టు పెడుతున్నప్పుడు కొన్ని నెలలు లేదా సంవత్సరాల పాటు అక్కడే బంగారం భద్రంగా ఉంచాల్సిన బాధ్యత బ్యాంకులకు ఉంటుంది. సరిగ్గా ఇదే విషయంలో బ్యాంకుల నుంచి కచ్చితమైన సమాచారాన్ని తీసుకోవాలి. బంగారాన్ని భద్రపరిచేందుకు స్ట్రాంగ్ రూం ఉందా? ఎదైనా ఊహించని ప్రమాదం, దోపిడీ, అగ్నిప్రమాదం, విద్రోహ చర్యల వంటివి జరిగితే మీ బంగారానికి బీమా వర్తిస్తుందా అనేది చూసుకోవాలి. ఆ బ్యాంకుకు సీసీ టీవీలు ఉన్నాయా లేదా కూడా సరిచూసుకోవాలి.
